AKP កំពង់ធំ ថ្ងៃទី២៣ ខែតុលា ឆ្នាំ២០២៥-- លោក ញង កង ប្រធានកម្រងអង់ឃ្លាំ សហការជាមួយអង្គការកូហ្វាព ដឹកនាំគណៈកម្មការទ្រទ្រង់សាលារៀន នាយក នាយិកា លោកគ្រូអ្នកគ្រូ អាជ្ញាធរភូមិ/ឃុំ ប៉ុសិ៍រដ្ឋបាល គណៈកម្មការគ្រប់គ្រងសាលា អាណាព្យាបាលសិស្ស និងសិស្សានុសិស្ស ធ្វើយុទ្ធនាការប្រមូលកុមារចូលរៀននៅក្នុងកម្រងអង់ឃ្លាំ ស្ថិតនៅក្នុងឃុំប្រឡាយ ស្រុកស្ទោង ខេត្តកំពង់ធំ នាព្រឹកថ្ងៃទី២៣ ខែតុលា ឆ្នាំ២០២៥។

លោក ញង កង បានឱ្យដឹងថា យុទ្ធនាការប្រមូលកុមារចូលរៀននៅព្រឹកនេះគឺមានការចូលរួមពីគ្រប់សាលាទាំង១០នៅក្នុងកម្រងអង់ឃ្លាំ ព្រមទាំងមានការចូលរួមពីអង្គការដៃគូ អាជ្ញាធរដែនដី សំដៅធ្វើយ៉ាងណាប្រមូលកុមារដែលគ្រប់អាយុចាប់ពី៧០ខែ ឬ៦ឆ្នាំ ឱ្យមកចុះឈ្មោះចូលរៀននៅតាមសាលាបឋមសិក្សាក្នុងភូមិរបស់ខ្លួនឱ្យបានអស់ ប្រកបដោយសមធម៌ និងបរិយាបន្ន ការចុះឈ្មោះចូលរៀនពុំមានបង់ប្រាក់ឡើយ។ យុទ្ធនាការនាពេលនេះជាសារមួយសម្រាប់បញ្ជូនដល់ឪពុកម្ដាយ អាណាព្យាបាលសិស្សគ្រប់រូប ជាពិសេសកុមារាកុមារីខ្លួនឯងត្រូវមកចុះឈ្មោះចូលរៀនឬនាំកូនចៅមកចុះឈ្មោះឱ្យបានគ្រប់ៗគ្នា ដែលក្នុងនោះត្រូវនាំមកជាមួយនូវសៀវភៅគ្រួសារ ឬសំបុត្រកំណើត សំដៅឆ្លើយតបតាមគោលនយោបាយយុទ្ធសាស្ត្ររបស់រាជរដ្ឋាភិបាលអណត្តិទី៧ ក្នុងការកសាងអភិវឌ្ឍមូលធនមនុស្ស ដែលជាកម្លាំងស្នូលដែលមិនអាចខ្វះបានក្នុងការកសាងអភិវឌ្ឍប្រទេសជាតិស្របតាមបរិបទឌីជីថល។

ទន្ទឹមនឹងនេះ លោកគ្រូ ញង កង ប្រធានកម្រងអង់ឃ្លាំ បានអំពាវនាវដល់សិស្សានុសិស្ស អាណាព្យាបាលសិស្ស ព្រមទាំងឪពុកម្ដាយគ្រប់រូប ត្រូវត្រៀមលក្ខណៈឱ្យបានគ្រប់គ្រាន់ សម្រាប់ចូលរួមបើកបវេសនកាលឆ្នាំថ្មី ក៏ដូចជាត្រៀមសម្ភារសិក្សា មានផែនការអប់រំណែនាំ និងបង្រៀនក៏ដូចជារៀននៅតាមផ្ទះឱ្យបានហ្មត់ចត់បំផុត ហើយត្រូវចៀសឱ្យឆ្ងាយនៅអំពើអបាយមុខទាំងឡាយ ព្រមទាំងគោរពច្បាប់ចរាចរណ៍ផ្លូវគោកឱ្យបានខ្ជាប់ខ្ជួនទាំងនៅផ្ទះក៏ដូចជាធ្វើដំណើរទៅមកសាលារៀន ធ្វើខ្លួនឱ្យក្លាយជាកុមារបីល្អគឺកូនល្អ សិស្សល្អ មិត្តល្អ សំដៅទទួលបានលទ្ធផលល្អនៅក្នុងចុងឆ្នាំសិក្សាឆ្នាំនេះ និងជាទំពាំងស្នងឬស្សីហើយជាមូលធនមនុស្សសម្រាប់អភិវឌ្ឍប្រទេសជាតិទៅថ្ងៃអនាគត។

សូមបញ្ជាក់ថា កម្រងអង់ឃ្លាំមានអគារសិក្សាចំនួន១៦ខ្នង មាន៦៧បន្ទប់ លោកគ្រូអ្នកគ្រូសរុបចំនួន ៦២នាក់ (ស្រី៣៩នាក់) និងសិស្សានុសិស្សចំនួន៥៥០នាក់ (ស្រី២៨៤នាក់)៕

ដោយ ស៊ុម វណ្ណា