AKP ភ្នំពេញ ថ្ងៃទី២៣ ខែតុលា ឆ្នាំ២០២៥-- តាមការអង្កេតតាមដានជាប្រចាំរបស់មន្រី្តនៃអង្គការចលនាដើម្បីសុខភាពកម្ពុជាពាក់ព័ន្ធទៅលើសកម្មភាពចែកចាយ ជួញដូរ និងការធ្វើអាជីវកម្មបារីអេឡិចត្រូនិកនៅតាមប្រព័ន្ធផ្សព្វផ្សាយសង្គម រួមមាន ទំព័រហ្វេសប៊ុក ក្រុមហ្វេសប៊ុក ក្រុមតេឡេក្រាម ក្រុមតិកតុក និងក្រុមអ៊ីនស្តាក្រាម បានបង្ហាញថា បាន និងកំពុងធ្វើសកម្មភាពយ៉ាងសកម្ម ដែលក្រុមនីមួយៗមានចំនួនដូចជា៖ ១. ទំព័រហ្វេសប៊ុក (Facebook page) មានចំនួន១៧៦  ត្រូវបានរកឃើញថាកំពុងតែមានសកម្មភាពចែកចាយបារីអេឡិចត្រូនិក និងផលិតផល HTP  ដែលទំព័រហ្វេសប៊ុកមួយចំនួនជាទំព័រហ្វេសប៊ុកចាស់ និងមួយចំនួនជាទំព័រហ្វេសប៊ុកថ្មីដែលទើបតែរកឃើញ ឬទើបតែបង្កើតឡើងថ្មីៗ។ ២. ក្រុមហ្វេសប៊ុក (Facebook group) មានចំនួន១៦៧  ត្រូវបានរកឃើញថាកំពុងតែមានសកម្មភាពចែកចាយបារីអេឡិចត្រូនិក និងផលិតផល HTP ដែលក្រុមហ្វេសប៊ុកមួយចំនួនជាក្រុមចាស់ដែលបានផ្អាកប្រើមួយរយៈ ហើយក៏ប្រើប្រាស់ឡើងវិញ និងមួយចំនួនទៀតជាក្រុមហ្វេសប៊ុកថ្មីដែលទើបតែបង្កើត និងកំពុងតែដំណើរការសកម្មភាព។៣. ក្រុមតេឡេក្រាម(Telegram group) មានចំនួន២១៦ ត្រូវបានរកឃើញថាកំពុងតែមានសកម្មភាពចែកចាយបារីអេឡិចត្រូនិក និងផលិតផល HTP យ៉ាងសកម្ម និងជាប្រព័ន្ធសង្គមដែលពេញនិយមក្នុងការបញ្ជាទិញពីអតិថិជន។ ៤. ក្រុមតិកតុក (Tik Tok group) មានចំនួន៤០ ត្រូវបានរកឃើញថាកំពុងតែមានសកម្មភាពចែកចាយបារីអេឡិចត្រូនិក និងផលិតផល HTP ដោយការថតជាវីដេអូបង្ហាញពីសកម្មភាពជក់ទៀតផង និង ៥. ក្រុមអ៊ីនស្តាក្រាម(Instagram group) មានចំនួន៨៩ត្រូវបានរកឃើញថាកំពុងមានសកម្មភាពក្នុងការចែកចាយ ដោយការដាក់បង្ហាញនូវរូបភាពបារីអេឡិចត្រូនិក និងផលិតផល HTP ប្លែកៗ និងដ៏សម្បូរបែប។

បើតាមអង្គការចលនាដើម្បីសុខភាពកម្ពុជាបានឱ្យដឹងថា ការប្រើប្រាស់បារីអេឡិចត្រូនិក និងផលិតផល HTP បានបណ្តាលឱ្យប៉ះពាល់យ៉ាងធ្ងន់ធ្ងរដល់មូលធនមនុស្សរបស់កម្ពុជា។ វាប៉ះពាល់ដល់ការវិវឌ្ឍន៍របស់ខួរក្បាល ដែលបណ្តាលឱ្យប៉ះពាល់ដល់ការសិក្សារបស់កុមារ និងយុវជន។ ក្រៅពីនេះវាបណ្តាលឱ្យមានរបួសសួតយ៉ាងធ្ងន់ធ្ងរ និងប៉ះពាល់ដល់សរីរាង្គដទៃៗថែមទៀតផង៕

ដោយ៖ ចាន់ សុភឿន (ប្រភព៖ អង្គការចលនាដើម្បីសុខភាពកម្ពុជា)