AKP កំពង់ធំ ថ្ងៃទី២៣ ខែតុលា ឆ្នាំ២០២៥-- លោក សាយ គឹមឡម អភិបាលស្រុកស្ទោង បានណែនាំដល់អាជ្ញាធរឃុំត្រូវធ្វើអនាម័យ និងកាត់សម្អាតមែកឈើតាមផ្លូវជាតិលេខ៦ឱ្យបានល្អជាប្រចាំក្នុងឱកាសដែលលោកដឹកនាំដាំដើមឈើធ្នង់ប្រមាណ២៥០ដើមនៅក្នុងភូមិសាស្ត្រឃុំចំណារក្រោម ស្រុកស្ទោង ខេត្តកំពង់ធំ នាព្រឹកថ្ងៃទី២៣ ខែតុលា ឆ្នាំ២០២៥។

លោកអភិបាលស្រុកបានបញ្ជាក់ថា ការដាំដើមឈើនៅក្នុងឱកាសនេះគឺជាការចូលរួមចំណែកឆ្លើយតបជាមួយនឹងប្រសាសន៍ណែនាំចង្អុលបង្ហាញដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក៏ដូចជាការណែនាំដ៏ខ្ពង់ខ្ពស់របស់ឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ ក្នុងការដាក់សូឡាបំភ្លឺផ្លូវជាតិលេខ៦ ចាប់ពីព្រំប្រទល់ខេត្តកំពង់ចាម រហូតដល់ព្រំប្រទល់ខេត្តសៀមរាបដែលកំពុងដំណើរការហើយការដាំឈើនេះគឺជាការរួមចំណែកបន្ថែមទៀតក្នុងការលើកកម្ពស់បរិស្ថានសោភ័ណ និងកាត់បន្ថយកម្ដៅបរិយាកាសសកល។

លោក សាយ គឹមឡម អភិបាលស្រុកស្ទោង បានបញ្ជាក់ថា ការចូលរួមធ្វើអនាម័យ សម្អាតបរិស្ថាន និងថែរក្សាកាត់មែកឈើ ឬដើមឈើដែលចាស់ពុក ឬមានការគ្រប់ដណ្ដប់ខ្លាំងមកលើផ្លូវជាតិឬអំពូលសូឡាគឺជាការងារមួយដ៏ប្រសើរបំផុតដែលអាចបញ្ចៀសនូវគ្រោះថ្នាក់ជាយថាហេតុ ឬឧបទ្ទវហេតុផ្សេងៗ និងជួយឱ្យអំពូលសូឡាកាន់តែភ្លឺបានខ្លាំងប្រកបដោយសោភ័ណភាព ហើយអ្នកធ្វើដំណើរនៅតាមដងផ្លូវប្រកបដោយសុវត្ថិភាពថែមទៀតផង។

សូមបញ្ជាក់ថា រដ្ឋបាលស្រុកស្ទោងគ្រោងដាំដើមក្ងោកដើម ធ្នង់ និងឈើប្រណីតជាច្រើនពាន់ដើមចាប់ពីព្រំប្រទល់ស្រុកកំពង់ស្វាយ រហូតដល់ព្រំប្រទល់ខេត្តសៀមរាបដែលមានចម្ងាយជិត៤០គីឡូម៉ែត្រ៕

ដោយ ស៊ុម វណ្ណា