AKP ភ្នំពេញ ថ្ងៃទី២៣ ខែតុលា ឆ្នាំ២០២៥-- ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី ប្រធានក្រុមការងារជំរុញការវិនិយោគក្នុងភូមិភាគឦសាន (ក.វ.ឦសាន) បានដឹកនាំកិច្ចប្រជុំផ្ទៃក្នុងលេខាធិការដ្ឋាន ក.វ.ឦសាន ដោយមានការអញ្ជើញចូលរួមពីឯកឧត្តមអនុរដ្ឋលេខាធិការ ជាប្រធាន និង អនុប្រធានលេខាធិការដ្ឋាន, ព្រមទាំង សមាជិកលេខាធិការដ្ឋាន ដើម្បីពិនិត្យវឌ្ឍនភាពការងារ និង កំណត់ទិសដៅការងារអាទិភាពរបស់លេខាធិការដ្ឋាន ក.វ.ឦសាន សម្រាប់ចុងឆ្នាំ២០២៥ កាលពីថ្ងៃទី២២ ខែតុលា ឆ្នាំ២០២៥ នៅទីស្តីការក្រសួងសេដ្ឋកិច្ច និង ហិរញ្ញវត្ថុ។

ឯកឧត្តមបណ្ឌិតសភាចារ្យ បានណែនាំ និងដាក់ចេញទិសដៅការងាររបស់លេខាធិការដ្ឋាន ក.វ.ឦសាន ក្នុងការជំរុញការអនុវត្តកម្មវិធីពិសេសនេះ ឱ្យកាន់តែសស្រាក់សស្រាំបន្ថែមទៀត ដោយត្រូវយកចិត្តទុកដាក់ខ្ពស់លើ ការងារផ្សព្វផ្សាយ ការទាក់ទាញវិនិយោគិនថ្មី ការពង្រីកអាជីវកម្មបន្ថែម និង ការពង្រឹងការថែទាំវិនិយោគិនដែលមានស្រាប់ តាមរយៈការចុះពិនិត្យដល់ទីតាំងផ្ទាល់របស់វិនិយោគិន ដើម្បីជួបផ្ទាល់ និង ស្តាប់កង្វល់ ព្រមទាំងបញ្ហាប្រឈមនានារបស់វិនិយោគិន ដើម្បីជួយសម្របសម្រួល និងដោះស្រាយបញ្ហាប្រឈមនានារបស់វិនិយោគិន។

ជាមួយគ្នានេះ ឯកឧត្តមបណ្ឌិតសភាចារ្យបានណែនាំឱ្យពង្រឹងការផ្សព្វផ្សាយកាន់តែទូលំទូលាយថែមទៀត អំពីកម្មវិធីពិសេសនេះ ជាពិសេស តួនាទីរបស់ ក.វ.ឦសាន ដែលជា “ច្រកចេញចូលតែមួយ” ក្នុងការពិនិត្យ វាយតម្លៃ និង ផ្តល់ការលើកទឹកចិត្ត ជួយសម្របសម្រួល និង ធ្វើសាមញ្ញកម្ម នៃនីតិវិធីវិនិយោគ ដើម្បីបង្កលក្ខណៈងាយស្រួលដល់វិនិយោគិន និងធុរជន សំដៅជំរុញ និង បង្កបរិយាកាសវិនិយោគក្នុងខេត្តទាំងបួននៅភូមិភាគឦសាន នៃព្រះរាជាណាចក្រកម្ពុជា ឱ្យកាន់តែមានអំណោយផល និង ភាពទាក់ទាញ។

សូមបញ្ជាក់ជូនថា “កម្មវិធីពិសេសជំរុញការវិនិយោគក្នុងខេត្តទាំងបួននៅភូមិភាគឦសាន” ត្រូវបានដាក់ឱ្យអនុវត្តជាផ្លូវការ កាលពីថ្ងៃទី០៩ ខែមេសា ឆ្នាំ២០២៥ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា សំដៅជំរុញការអភិវឌ្ឍវិស័យអាទិភាព ចំនួន៣ គឺ កសិកម្ម កសិឧស្សាហកម្ម និងទេសចរណ៍ ដែលស្របតាមទាយជ្ជទានដែលមានស្រាប់របស់ខេត្តទាំងបួន ដែលគួរជំរុញការវិនិយោគបន្ថែម ដោយមានការគាំទ្រយ៉ាងទូលំទូលាយពីរាជរដ្ឋាភិបាល ហើយកម្មវិធីពិសេសនេះ បានគូសបញ្ជាក់យ៉ាងច្បាស់នូវការលើកទឹកចិត្តដ៏ច្រើន ដែលរាជរដ្ឋាភិបាលអាចផ្តល់ជូនវិស័យឯកជន ហើយក៏មានការគិតគូរពីការផ្តល់ហិរញ្ញប្បទាន ដែលមានអត្រាការប្រាក់សមរម្យ ការជួយកាត់បន្ថយថ្លៃដើមផលិតកម្ម ការសម្រួលនីតិវិធី និងការគាំទ្រសកម្មភាពវិនិយោគឯកជនផងដែរ៕

ដោយ ទូច វលក័្ខណ (ប្រភព៖ ក្រសួងសេដ្ឋកិច្ច)