AKP ភ្នំពេញ ថ្ងៃទី២៣ ខែតុលា ឆ្នាំ២០២៥ -- ទីភ្នាក់ងារទិញសព្វាវុធរបស់រដ្ឋកូរ៉េខាងត្បូង កាលពីថ្ងៃពុធបានចុះហត្ថលេខាលើអនុស្សរណៈនៃការយោគយល់គ្នា (MOU) មួយជាមួយក្រសួងការពារជាតិរបស់ប្រទេសប្រេស៊ីល ដើម្បីជំរុញកិច្ចសហប្រតិបត្តិការទ្វេភាគីនៅក្នុងឧស្សាហកម្មការពារជាតិ។

កិច្ចព្រមព្រៀងនេះត្រូវបានចុះហត្ថលេខារវាងលោក សឹក ជុងគុន (Seok Jong-gun) រដ្ឋមន្ត្រីនៃរដ្ឋបាលកម្មវិធីទិញសព្វាវុធរបស់ក្រសួងការពារជាតិកូរ៉េខាងត្បូង និងលោក ហឺរ៉ាល់ដូ ល្វីស រ៉ូឌ្រីហ្គេស (Heraldo Luiz Rodrigues) រដ្ឋលេខាធិការការពារជាតិប្រេស៊ីល ក្នុងពិធីចុះហត្ថលេខាកាលពីពេលថ្មីៗនេះ។

MOU នេះផ្តោតសំខាន់ទៅលើការសម្របសម្រួលកិច្ចសហប្រតិបត្តិការការស្រាវជ្រាវ ការអភិវឌ្ឍ និងការទិញសម្ភារៈការពារជាតិ ពង្រីកកិច្ចសហប្រតិបត្តិការឧស្សាហកម្ម និងការពង្រឹងការផ្លាស់ប្តូរបុគ្គលិកការពារជាតិរវាងប្រទេសទាំងពីរ។

ក្រោមកិច្ចព្រមព្រៀងនេះ ប្រទេសទាំងពីរនឹងធ្វើកិច្ចសហប្រតិបត្តិការលើវិស័យនានា រួមទាំងវិស័យដីគោក សមុទ្រ អវកាស និងផ្កាយរណបព្រមទាំងចែករំលែកបទពិសោធន៍គ្នាទៅវិញទៅមកក្នុងវិស័យស្រាវជ្រាវ និងអភិវឌ្ឍន៍បច្ចេកវិទ្យាការពារជាតិជឿនលឿន។

ក្នុងនាមជាប្រទេសក្នុងតំបន់អាម៉េរិកឡាទីនដំបូងគេដែលបង្កើតទំនាក់ទំនងការទូតជាមួយកូរ៉េខាងត្បូងនៅក្នុងឆ្នាំ១៩៥៩ ប្រេស៊ីលគឺជាប្រទេសសេដ្ឋកិច្ច និងការពារជាតិដ៏សំខាន់ ដោយផលិតយន្តហោះយោធានាំមុខគេ និងជាផ្ទះរបស់ក្រុមហ៊ុនអាកាសចរណ៍ឈានមុខគេមួយរបស់ពិភពលោក គឺក្រុមហ៊ុន Embraer ៕

ដោយ៖ យា ចិន្តាខន្តី (ប្រភព៖ កូរ៉េថាមស៍)