AKP ភ្នំពេញ ថ្ងៃទី២៣ ខែតុលា ឆ្នាំ២០២៥ -- មន្ត្រីកូរ៉េខាងត្បូងបាននិយាយថា អនុរដ្ឋមន្ត្រីការពារជាតិ លោក លី ឌូហេ (Lee Doo-hee) បានជួបជាមួយសមភាគីកាហ្សាក់ស្ថាន លោក កៃរ៉ាត់ សាឌីកូវ (Kairat Sadykov) កាលពីថ្ងៃពុធ ដើម្បីពិភាក្សាគ្នាអំពីវិធីពង្រីកកិច្ចសហប្រតិបត្តិការទ្វេភាគីក្នុងវិស័យការពារជាតិ និងឧស្សាហកម្មសព្វាវុធ។

លោក លី បានជួបពិភាក្សាជាមួយលោក កៃរ៉ាត់ សាឌីកូវ អនុរដ្ឋមន្ត្រីក្រសួងការពារជាតិកាហ្សាក់ស្ថាន នៅខាងក្រៅកម្មវិធីពិព័រណ៍អាកាសចរណ៍ និងការពារជាតិទីក្រុងសេអ៊ូល ឆ្នាំ២០២៥ ដែលបាននិងកំពុងប្រព្រឹត្តទៅចាប់ពីថ្ងៃទី១៧-២៤ ខែតុលា ឆ្នាំ២០២៥។ នេះបើយោងតាមក្រសួងការពារជាតិកូរ៉េខាងត្បូង។

ក្នុងអំឡុងពេលនៃកិច្ចពិភាក្សានោះ លោក លី បានលើកឡើងអំពីតួនាទីរបស់កាហ្សាក់ស្ថានជាដៃគូពាណិជ្ជកម្មដ៏ធំបំផុតរបស់កូរ៉េខាងត្បូងសម្រាប់តំបន់អាស៊ីកណ្តាល ដែលជំរុញដោយកិច្ចសហប្រតិបត្តិការយ៉ាងសកម្មក្នុងការអភិវឌ្ឍរថយន្ត និងធនធានរ៉ែ។

លោកក៏បានសម្តែងក្តីសង្ឃឹមផងដែរថា ប្រទេសទាំងពីរនឹងបង្កើតទំនាក់ទំនងមិត្តភាព និងធ្វើឱ្យកិច្ចសហប្រតិបត្តិការកាន់តែស៊ីជម្រៅក្នុងវិស័យការពារជាតិ និងសព្វាវុធ ដោយលោកបានកត់សម្គាល់ថា ជនជាតិកូរ៉េខាងត្បូងប្រមាណ ១២០.០០០នាក់កំពុងរស់នៅក្នុងតំបន់នោះ។

លោក សាឌីកូវ បានសម្តែងក្តីសង្ឃឹមថា ប្រទេសទាំងពីរនឹងពង្រីកកិច្ចសហប្រតិបត្តិការបន្ថែមទៀតទៅក្នុងវិស័យផ្សេងៗដោយផ្អែកលើការយល់ដឹង និងការជឿទុកចិត្តគ្នាទៅវិញទៅមក ដែលប្រទេសទាំងពីរបានកសាងក្នុងរយៈពេលប៉ុន្មានឆ្នាំកន្លងមកនេះ៕

ដោយ៖ យា ចិន្តាខន្តី (ប្រភព៖ កូរ៉េថាមស៍)