AKP ភ្នំពេញ ថ្ងៃទី២៣ ខែតុលា ឆ្នាំ២០២៥ -- នាយករដ្ឋមន្ត្រីស្លូវ៉ាគី លោករ៉ូបឺត ហ្វីកូ (Robert Fico) ជឿជាក់ថា សហភាពអឺរ៉ុបត្រូវតែធ្វើអ្វីៗគ្រប់យ៉ាងដើម្បីធ្វើឱ្យមានជំនួបរវាងប្រធានាធិបតីរុស្ស៊ី លោក វ្ល៉ាឌីមៀ ពូទីន(Vladimir Putin) និងសមភាគីសហរដ្ឋអាមេរិក លោក ដូណាល់ ត្រាំ(Donald Trump) នៅទីក្រុងប៊ូដាប៉េស្ត ក្នុងពេលឆាប់ៗនេះតាមដែលអាចធ្វើទៅបាន ប្រសិនបើសម្ព័ន្ធមិត្តពិតជាចង់បានសន្តិភាពនៅអ៊ុយក្រែន។

លោកបានសរសេរនៅលើទំព័ររបណ្តាញសង្គមហ្វេសប៊ុករបស់លោកថា «ប្រសិនបើសហភាពអឺរ៉ុបពិតជាចង់បានសន្តិភាពឆាប់រហ័សនៅអ៊ុយក្រែន ខ្លួនគួរតែធ្វើអ្វីៗគ្រប់យ៉ាងដើម្បីធ្វើឱ្យកិច្ចប្រជុំរវាងលោក ត្រាំ និងលោក ពូទីន កើតឡើងនៅទីក្រុងប៊ូដាប៉េស្តដោយគ្មានឧបសគ្គ និងឱ្យបានឆាប់តាមដែលអាចធ្វើទៅបាន។ កិច្ចប្រជុំកំពូល ត្រាំ-ពូទីន ក្នុងពេលឆាប់បំផុតនៅទីក្រុងប៊ូដាប៉េស្តដោយមិនមានការរារាំង និងដោយមានការគាំទ្រពេញទំហឹងពីសហភាពអឺរ៉ុបនោះ គឺជាជំហរផ្លូវការរបស់ខ្ញុំ»។

យោងតាមរូបលោក បានឱ្យដឹងថា «កិច្ចប្រជុំរបស់ប្រធានាធិបតីសហរដ្ឋអាមេរិក និងរុស្ស៊ីនៅទីក្រុងប៊ូដាប៉េស្ត មិនទាន់ត្រូវបានព្រមព្រៀងគ្នានៅឡើយទេ ហើយមានភស្តុតាងច្បាស់លាស់រួចហើយនៃកិច្ចខិតខំប្រឹងប្រែងដើម្បីទប់ស្កាត់មិនឱ្យមានកិច្ចប្រជុំនេះ។ វាជារឿងដ៏សោកសៅមួយដែលត្រូវមើលឃើញ»។ លោក ហ្វីកូ បានអះអាងថា «ខ្ញុំតែងតែនិយាយថា សហភាពអឺរ៉ុបបានប្រែក្លាយទៅជាគណៈរដ្ឋមន្ត្រីសង្គ្រាម ដែលផ្នែកសំខាន់នៃរដ្ឋជាសមាជិកសហភាពអឺរ៉ុបគាំទ្រចំពោះសង្រ្គាមនៅអ៊ុយក្រែនក្នុងជំនឿដ៏ឆោតល្ងង់មួយថា វាអាចធ្វើឱ្យរុស្ស៊ីចុះខ្សោយ និងកម្ចាត់រុស្ស៊ីតាមរបៀបនេះ»៕

ដោយ៖ យា ចិន្តាខន្តី (ប្រភព៖ តាសស៍)