AKP កំពង់ធំ ថ្ងៃទី២៣ ខែតុលា ឆ្នាំ២០២៥-- រដ្ឋបាលខេត្តកំពង់ធំបានរៀបចំវេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សាខេត្តកំពង់ធំអាណត្តិទី៤ ឆ្នាំ២០២៥ នៅស្រុកសណ្ដាន់ និងស្រុកប្រាសាទសំបូរ កាលពីថ្ងៃទី២២ ខែតុលា ឆ្នាំ២០២៥ ក្រោមអធិបតីភាពឯកឧត្តម ជាតិ ស៊ីវុត្ថា សមាជិកក្រុមប្រឹក្សាខេត្ត និងលោក អ៊ុន បុត្ត អភិបាលរងខេត្តកំពង់ធំ ដោយមានការអញ្ជើញចូលរួមពីឯកឧត្តមលោកជំទាវ សមាជិកក្រុមប្រឹក្សាខេត្ត អភិបាលរងខេត្ត ព្រះរាជអាជ្ញារង ប្រធានមន្ទីរជុំវិញខេត្តកងកម្លាំងទាំង៣ អភិបាលស្រុកសណ្ដាន់ និងស្រុកប្រាសាទសំបូរ សមាជិកក្រុមប្រឹក្សាស្រុក/ឃុំ និងបងប្អូនប្រជាពលរដ្ឋជាច្រើននាក់។

ឯកឧត្តម ជាតិ ស៊ីវុត្ថា សមាជិកក្រុមប្រឹក្សាខេត្ត បានលើកឡើងពីប្រធានបទសម្រាប់វេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សាខេត្តកំពង់ធំ ឆ្នាំ២០២៥រួមមាន៖ ១. ការងារសន្តិសុខសណ្តាប់ធ្នាប់សាធារណៈ ផ្តោតលើគោលនយោបាយភូមិ/ឃុំ/សង្កាត់ មានសុវត្ថិភាព បញ្ហាលួច ឆក់ ប្លន់ បញ្ហាគ្រឿងញៀន បញ្ហាក្មេងទំនើង បញ្ហាល្បែងស៊ីសងនិងការប្រើប្រាស់អាវុធខុសច្បាប់បញ្ហាចរាចរណ៍និងប៉ុស្តិ៍ត្រួតពិនិត្យគ្មានច្បាប់ បញ្ហាជួញដូរស្ត្រី និងកុមារ អំពើហិង្សាក្នុងគ្រួសារ បញ្ហារៀបចំសណ្តាប់ធ្នាប់តាមដងផ្លូវសាធារណៈ និងទីប្រជុំជន។ ២. ប្រសិទ្ធភាពនៃការគ្រប់គ្រងធនធានធម្មជាតិមាន បញ្ហាបរិស្ថាន ព្រៃឈើ ជលផលការគ្រប់គ្រងប្រើប្រាស់ដីធ្លី (ការចុះបញ្ជីដីធ្លី)។ ៣. ការពង្រឹងប្រសិទ្ធភាពនៃការផ្តល់សេវារដ្ឋបាលនិងសេវាសាធារណៈការធ្វើ ឬចម្លងសំបុត្រកំណើត អត្តសញ្ញាណប័ណ្ណ សៀវភៅគ្រួសារ ស្នាក់នៅ។ ៤. ការពង្រឹងប្រសិទ្ធភាពនៃការអនុវត្តគោលនយោបាយគាំពារសង្គម ប្រសិទ្ធភាពនៃការផ្តល់បណ្ណសមធម៌ បណ្ណក្រីក្រ បណ្ណប.ស.ស និង៥. បញ្ហាផ្សេងៗ។

លោក អ៊ុន បុត្ត មានប្រសាសន៍បញ្ជាក់ថា ការរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តនាឱកាសនេះគឺជាការអនុវត្តតាមច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ដែលតម្រូវឱ្យក្រុមប្រឹក្សាខេត្តត្រូវរៀបចំវេទិកាផ្សព្វផ្សាយ និងពិគ្រោះយោបល់នៅតាមក្រុងស្រុកនានាក្នុងអំឡុងត្រីមាសទី៤នៃឆ្នាំនីមួយៗ។ វេទិកាផ្សព្វផ្សាយនាឱកាសនេះគឺជាយន្តការមួយដើម្បីលើកកម្ពស់គណនេយ្យ តម្លាភាព និងការឆ្លើយតបរបស់ក្រុមប្រឹក្សាខេត្ត ជាមួយនឹងប្រជាពលរដ្ឋរបស់ខ្លួន ក្នុងដំណើរការអភិបាលកិច្ចនិងកិច្ចអភិវឌ្ឍមូលដ្ឋាន ក្នុងន័យដើម្បីធានាថា៖ ១. រាល់បញ្ហាអាទិភាពរបស់ប្រជាពលរដ្ឋក្នុងមូលដ្ឋានត្រូវបានពិនិត្យ ដោះស្រាយនិងឆ្លើយតបបានទាន់ពេលវេលានិងប្រកបដោយប្រសិទ្ធភាព និង២. គ្រប់អ្នកពាក់ព័ន្ធទាំងអស់ក្នុងមូលដ្ឋានបានចូលរួមក្នុងដំណើរការអភិវឌ្ឍតាមបែប ប្រជាធិបតេយ្យ។

លោកអភិបាលរងខេត្តបានបញ្ជាក់បន្ថែមទៀតថា វេទិកាដែលរៀបចំដោយក្រុមប្រឹក្សាខេត្តផ្តល់ឱកាសដើម្បីផ្តល់ព័ត៌មានជូនប្រជាពលរដ្ឋនូវសមិទ្ធផលដែលក្រុមប្រឹក្សាសម្រេចបានកន្លងមក បញ្ហាប្រឈមនានា និងផែនការអភិវឌ្ឍរបស់ក្រុមប្រឹក្សាសម្រាប់ឆ្នាំខាងមុខ។ផ្តល់ប្រឹក្សាតាមរយៈការពិភាក្សា និងផ្តល់ព័ត៌មានត្រឡប់ដល់ក្រុមប្រឹក្សាអំពីការងារនៅក្នុងឆ្នាំកន្លងមក និងលើកជាសំណើសម្រាប់ឆ្នាំបន្ទាប់។ ជំរុញឱ្យមានការចូលរួមពីប្រជាពលរដ្ឋ ក្នុងដំណើរការធ្វើសេចក្តីសម្រេចដែលក្នុង នោះសំណើនិងការព្រួយបារម្ភរបស់ប្រជាពលរដ្ឋត្រូវបានលើកយកមកពិចារណា នៅក្នុងការសម្រេចចុងក្រោយរបស់ក្រុមប្រឹក្សា។ លើកកម្ពស់កិច្ចសហការរវាងក្រុមប្រឹក្សា និងប្រជាពលរដ្ឋសំដៅចូលរួមចំណែកក្នុងការបង្កើតនូវដំណោះស្រាយដែលផ្តល់ផលប្រយោជន៍ដល់ប្រជាពលរដ្ឋ។

សូមបញ្ជាក់ថា វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកំពង់ធំ អាណត្តិទី៤ ឆ្នាំ២០២៥នៅស្រុកសណ្ដាន់មាន២៣សំណួរ (សំណួរផ្ទាល់មាត់មាន៥សំណួរ និងសំណួរសំណូមពរចំនួន១៨សំណួរ) សម្រាប់នៅស្រុកប្រាសាទសំបូរមាន២២សំណួរ (សំណួរផ្ទាល់មាត់១សំណួរ និងសំណួរសំណូមពរ២១សំណួរ)៕

ដោយ ស៊ុម វណ្ណា