AKP បន្ទាយមានជ័យ ថ្ងៃទី២៣ ខែតុលា ឆ្នាំ២០២៥--ព្រះពុទ្ធសាសនាបានបំពេញតួនាទីយ៉ាងសំខាន់ក្នុងការងារមនុស្សធម៌ និងការជួយសង្គមជាតិ។ ជាក់ស្ដែងកាលពីថ្ងៃទី២២ ខែតុលា ឆ្នាំ២០២៥ គណៈសង្ឃជាន់ខ្ពស់មួយក្រុម ក្រោមអធិបតីភាពដ៏ខ្ពង់ខ្ពស់ព្រះសិរីសម្មតិវង្ស ទេព ផាន ព្រះរាជាគណៈថ្នាក់ត្រី សមាជិកថេរសភាព្រះពុទ្ធសាសនានៃព្រះរាជាណាចក្រកម្ពុជា ព្រះបាឡាត់គណរាជធានីភ្នំពេញ និងជាព្រះគ្រូសូត្រស្តាំ វត្តមុនីសុវណ្ណជំពុះក្អែក រាជធានីភ្នំពេញ បានដឹកនាំគណៈកម្មការមនុស្សធម៌ អញ្ជើញចុះចែកអំណោយដ៏ថ្លៃថ្លាជូនប្រជាពលរដ្ឋរងគ្រោះ និងកងកម្លាំងប្រដាប់អាវុធនៅតាមបន្ទាត់ព្រំដែនកម្ពុជា-ថៃ ស្ថិតនៅបរិវេណ វត្តពុទ្ធិសីមារាម ហៅវត្តជោគជ័យ ភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។

ពិធីចែកអំណោយដ៏មហាកុសលនេះបានប្រព្រឹត្តទៅក្រោមបរិយាកាសរីករាយ និងបានប្រគល់អំណោយជូនដល់ប្រជាពលរដ្ឋសរុបចំនួន ៩៨៧គ្រួសារ ដែលមានទីលំនៅភូមិជោគជ័យ និងភូមិព្រៃចាន់ រួមទាំងកងកំលាំង និងអង្គភាពនានា ដែលឈរជើងការពារបូរណភាពទឹកដីនៅតាមព្រំដែន។ អំណោយដែលបានចែកជូនរួមមាន សម្ភារៈប្រើប្រាស់ប្រចាំថ្ងៃ គ្រឿងឧបភោគ បរិភោគ និងថវិកាមួយចំនួន ដើម្បីជួយសម្រាលទុក្ខលំបាក និងលើកទឹកចិត្តដល់បងប្អូនប្រជាពលរដ្ឋ និងវីរកងទ័ព ដែលបានពលីកម្លាំងកាយចិត្តការពារជាតិមាតុភូមិ។

ព្រះសិរីសម្មតិវង្ស ទេព ផាន បានមានសង្ឃដីកាក្នុងឱកាសនោះថា "ការចែករំលែកនេះ គឺកើតចេញពីសទ្ធាជ្រះថ្លា និងទឹកចិត្តមនុស្សធម៌ ស្របតាមពុទ្ធោវាទ ដែលបានបង្រៀនឱ្យមនុស្សចេះជួយគ្នាក្នុងគ្រាក្រ និងចេះធ្វើទាន។ ព្រះពុទ្ធសាសនា មានតួនាទីដ៏សំខាន់ក្នុងការរួមចំណែកអភិវឌ្ឍសង្គម និងជួយឧបត្ថម្ភដល់ប្រជាពលរដ្ឋគ្រប់ស្រទាប់ ជាពិសេសបងប្អូនដែលជួបការលំបាក និងកងកម្លាំងទាំងអស់ដែលកំពុងតែបំពេញភារកិច្ចដ៏ឧត្តុង្គឧត្តម។ ការផ្តល់អំណោយថ្ងៃនេះ មិនត្រឹមតែជាសម្ភារៈប៉ុណ្ណោះទេ តែជាការបង្ហាញពីការយកចិត្តទុកដាក់ និងការដឹងគុណចំពោះវីរៈភាពរបស់យោធិនគ្រប់រូប ដែលបានលះបង់ដើម្បីសុខសន្តិភាព និងការរីកចម្រើនរបស់ជាតិមាតុភូមិ។ សូមបងប្អូនទាំងអស់ទទួលបាននូវពរជ័យ សេចក្តីសុខ សេចក្តីចម្រើនគ្រប់ប្រការ"។

ជាមួយគ្នានោះដែរ លោក លី សុវណ្ណារិទ្ធ អភិបាលរងខេត្តបន្ទាយមានជ័យ ដែលបានចូលរួមជាគណៈអធិបតីក្នុងពិធីនេះ ក៏បានថ្លែងនូវអំណរគុណយ៉ាងជ្រាលជ្រៅចំពោះព្រះមន្ត្រីសង្ឃជាន់ខ្ពស់ ព្រះសិរីសម្មតិវង្ស ទេព ផាន និងគណៈកម្មការមនុស្សធម៌ ដែលបានចំណាយព្រះកាយពល ពេលវេលា និងធនធានផ្ទាល់ខ្លួន ក្នុងការជួយសង្គ្រោះ និងឧបត្ថម្ភដល់ប្រជាពលរដ្ឋខេត្តបន្ទាយមានជ័យ ជាពិសេសតំបន់ព្រំដែន។

លោកអភិបាលរងខេត្ត បានមានប្រសាសន៍លើកឡើងថា "ក្នុងនាមថ្នាក់ដឹកនាំខេត្ត ក៏ដូចជាប្រជាពលរដ្ឋខេត្តបន្ទាយមានជ័យទាំងមូល ខ្ញុំសូមថ្លែងអំណរគុណឥតល្ហែចំពោះទឹកចិត្តសប្បុរសធម៌ និងការជួយឧបត្ថម្ភគាំទ្រនេះ។ អំណោយទាំងនេះពិតជាមានតម្លៃមិនអាចកាត់ថ្លៃបានសម្រាប់ប្រជាពលរដ្ឋរបស់យើង ជាពិសេសគឺបងប្អូនកងកម្លាំងដែលកំពុងឈរជើងការពារព្រំដែន។ នេះជាការបង្ហាញនូវការរួបរួមសាមគ្គីរវាងអាជ្ញាធរ សង្ឃ និងសប្បុរសជន ក្នុងការកសាងសង្គមមួយដែលពោរពេញទៅដោយក្តីមេត្តាធម៌។ ខ្ញុំសូមសំណូមពរឱ្យបងប្អូនប្រជាពលរដ្ឋ រក្សាសុខភាពល្អ និងចូលរួមថែរក្សាសន្តិភាពដែលមានស្រាប់ ហើយសូមជូនពរឱ្យព្រះតេជព្រះគុណ ព្រះសិរីសម្មតិវង្ស ទេព ផាន ព្រមទាំងគណៈកម្មការទាំងអស់ បានប្រកបដោយពុទ្ធពរទាំងបួនប្រការកុំបីឃ្លៀងឃ្លាតឡើយ"។

សូមបញ្ជាក់ថា ការចែកអំណោយនេះបានបង្ហាញឱ្យឃើញយ៉ាងច្បាស់អំពីការយកចិត្តទុកដាក់ខ្ពស់ពីគ្រប់មជ្ឈដ្ឋាន ទាំងវិស័យព្រះពុទ្ធសាសនា ទាំងអាជ្ញាធរមូលដ្ឋាន ចំពោះសុខទុក្ខរបស់ប្រជាពលរដ្ឋ និងការលះបង់របស់កងកម្លាំងដែលជាខែលការពារជាតិ៕

ដោយ ឈុន សារ៉ាត