AKP ភ្នំពេញ ថ្ងៃទី២៣ ខែតុលា ឆ្នាំ២០២៥-- ឯកឧត្តម ហ៊ែល តូនី អនុប្រធានក្តាប់រួមអាជ្ញាធរទន្លេសាប និងតំណាងធនាគារពិភពលោក (World Bank - WB) International Central for Environment Management (ICEM) ក្រសួងកិច្ចការបរទេស និងពាណិជ្ជកម្ម នៃប្រទេសអូស្ត្រាលី (DFAT) និង Australian Water Partnership (AWP) នៅរសៀលទី២២ ខែតុលា ឆ្នាំ២០២៥ បានបន្តរៀបចំកិច្ចប្រជុំពិភាក្សាជាមួយអង្គការជាតិ អន្តរជាតិ និងដៃគូអភិវឌ្ឍន៍ ដើម្បីពិភាក្សានិងប្រមូលធាតុចូលបន្ថែមលើសេចក្តីព្រាងរបាយការណ៍ ស្តីពីការវាយតម្លៃសន្តិសុខទឹកក្នុងអាងទន្លេសាប នៅសាលប្រជុំទីស្តីការក្រសួងធនធានទឹក (ក្បាលថ្នល់)។

ឯកឧត្តម ហ៊ែល តូនី បានលើកឡើងថា កិច្ចប្រជុំពិភាក្សាខាងលើមានការចូលរួមពីស្ថាប័នអប់រំ និងសិក្សាស្រាវជ្រាវ និងដៃគូអភិវឌ្ឍន៍នានាដែលពាក់ព័ន្ធ ដោយផ្ដោតលើការងារសំខាន់ចំនួន៤៖ ទី១. ការចែករំលែក និងផ្តល់សុពលភាពការរកឃើញបឋមនៃរបាយការណ៍អាងទន្លេសាប ទី២. ការសម្របសម្រួលកិច្ចសន្ទនារវាងរដ្ឋាភិបាល សង្គមស៊ីវិល និងដៃគូអភិវឌ្ឍន៍ស្តីពីសន្តិសុខទឹក និងភាពធន់នឹងបញ្ហាប្រឈម ព្រមទាំងឱកាស ទី៣. កំណត់សកម្មភាពអាទិភាព កំណែទម្រង់គោលនយោបាយ និងតម្រូវការវិនិយោគសម្រាប់ការគ្រប់គ្រងទឹកប្រកបដោយនិរន្តរភាពក្នុងអាងទន្លេសាប និងទី៤. ការពង្រឹងភាពជាម្ចាស់នៃភាគីពាក់ព័ន្ធ និងការកសាងសម្ព័ន្ធសម្រាប់សកម្មភាពតាមដាន និងការចូលរួមនាពេលអនាគត។

សូមបញ្ជាក់ថា កិច្ចប្រជុំនេះមានគោលបំណងសំខាន់ប្រមូលផ្ដុំភាគីពាក់ព័ន្ធសំខាន់ៗទាំងអស់ ដើម្បីកំណត់ និងឯកភាពគ្នាយ៉ាងច្បាស់លើគោលដៅគម្រោង វិសាលភាព ពេលវេលា តួនាទី ទំនួលខុសត្រូវ និង ហានិភ័យដែលអាចកើតមានឡើងធ្វើយ៉ាងណាឱ្យភាគីពាក់ព័ន្ធទាំងអស់មានការយល់ដឹងរួមគ្នាមុននឹងឈានទៅមុខជាមួយនឹងការអនុវត្តគម្រោងរួមគ្នា៕

ដោយ ណយ នឿន (ប្រភព៖ អាជ្ញាធរទន្លេសាប)