AKP ព្រះសីហនុ ថ្ងៃទី២២ ខែតុលា ឆ្នាំ២០២៥-- គណៈកម្មាធិការជាតិសន្តិសុខលម្ហសមុទ្របើកកិច្ចប្រជុំលើកទី៤ ស្តីពីការផ្លាស់ប្តូរព័ត៌មានលើផ្ទៃសមុទ្ររវាងទីបញ្ជាការជួរមុខអគ្គលេខាធិការដ្ឋាននៃគណ:កម្មាធិការជាតិសន្តិសុខលម្ហសមុទ្រកម្ពុជា (គ.ជ.ស.ស) នារសៀលថ្ងៃពុធ ទី២២ ខែតុលា ឆ្នាំ២០២៥ ជាមួយបញ្ជាការដ្ឋានឆ្នាំសមុទ្រតំបន់៤  វៀតណាម ដឹកនាំដោយលោកវរសេនីយឯក ងៀន វណ្ណចាញ់ ប្រធានការិយាល័យនាវាចរគយ នៃនាយកដ្ឋានបង្ការ និងបង្ក្រាបបទល្មើស និងលោកឧត្តមនាវីទោ លី ហួត មេបញ្ចាការ ទីបញ្ចាការជួរមុខអគ្គលេខាធិការដ្ឋាន សន្តិសុខលម្ហសមុទ្រ (គ.ជ.ស.ស)។

លោកឧត្តមនាវីទោ លី ហួត មេបញ្ជាការទីបញ្ជាការជួរមុខអគ្គលេខាធិការដ្ឋានសន្តិសុខលម្ហសមុទ្រ (គ.ជ.ស.ស) បានស្វាគមន៍កិច្ចប្រជុំលើកទី៤ ដើម្បីបង្កើនកិច្ចសហប្រតិបត្តិការ រក្សាសន្តិភាព សន្តិសុខ សណ្តាប់ធ្នាប់ក្នុងតំបន់ដែនទឹកប្រវត្តិសាស្ត្រ និងតំបន់សមុទ្រជាប់គ្នារវាងប្រទេសទាំងពីរ កម្ពុជា វៀតណាម ឪ្យកាន់តែល្អប្រសើរ និងស៊ីជម្រៅថែមទៀត។

លោកមេបញ្ជាការអគ្គលេខាធិការដ្ឋានសន្តិសុខលម្ហសមុទ្របានបញ្ជាក់ថា ការផ្លាស់ប្តូរព័ត៌មានរវាងអង្គភាពទាំងពីរមានភាពល្អប្រសើរ ប៉ុន្តែនៅមានកម្រិត គឺមានតែការផ្លាស់ប្កូរព័ត៌មានអំពីឧប្បហេតុមួយចំនួនទាក់ទង និងសន្តិសុខ សណ្តាប់ធ្នាប់ និងសុវត្ថិភាព ការជួយសង្គ្រោះក្នុងដែនទឹកប្រវត្តិសាស្ត្រកម្ពុជា វៀតណាម ខ្ញុំសង្ឃឹមថា អង្គភាពទាំងពីរនឹងជំរុញលទ្ធផលដែលបានសម្រេចបាន និងផ្លាស់ប្តូរព័ត៌មានឪ្យបានញឹកញាប់លើគ្រប់ខ្លឹមសារស្របតាមយន្តការដែលបានចុះហត្ថលេខា សំដៅពង្រឹងទំនាក់ទំនងមិត្តភាព កិច្ច សហប្រតិបត្តិការ រួមចំណែកកសាងសន្តិភាពដែនសមុទ្រ ទប់ស្កាត់ និងបង្ក្រាបការចូលនេសាទខុសច្បាប់ក្នុងដែនទឹកនៃប្រទេសទាំងពីរ បង្ក្រាបការជួញដូរគ្រឿងញៀន ការរត់ពន្ធ ឬការនាំចូលទំនិញឆ្លងកាត់គយ ទប់ស្កាត់ការធ្វើអន្តោប្រវេសន៍ដោយខុសច្បាប់ ការរក្សាបរិស្ថានសមុទ្រ ការស្វែងរក និងជួយសង្គ្រោះនៅក្នុងដែនសមុទ្រប្រវត្តិសាស្ត្រជាដើម។ តាមការសង្កេតឃើញថា ការផ្លាស់ប្តូរព័តមានមានភាពល្អប្រសើរ សង្ឃឹមថា អង្គភាពទាំងពីរធ្វើការផ្លាស់ប្តូព័ត៌មានគ្នាកាន់តែស៊ីជម្រៅបន្ថែមទៀត។

លោកវរសេនីយឯក ងៀន វណ្ណចាញ់ ប្រធានការិយាល័យនាវាចរគយនៃនាយកដ្ឋានបង្ការ និងបង្ក្រាបបទល្មើសលើផ្ទៃសមុទ្រតំបន់ភូមិភាគ៤ វៀតណាម បានឱ្យដឹងថា ដើម្បីផ្លាស់ប្តូរព័ត៌មានដែលបានឯកភាពគ្នាចំនួន ៧ចំណុចខាងលើ រួមមាន៖ សកម្មភាពនេសាទក្នុងដែនទឹកប្រវត្តិសាស្ត្រ ជម្លោះលើដែននេសាទ និងការធ្វើអន្តោប្រវេសន៍ខុសច្បាប់លើផ្ទៃសមុទ្រ ការស្វែងរក និងជួយសង្គ្រោះលើផ្ទៃសមុទ្រ ស្ថានភាពបទល្មើស និងឧក្រិដ្ឋកម្ម ការល្បាត និងត្រួតពិនិត្យដែនទឹកប្រវត្តិសាស្រ្ត ស្ថានភាពសន្តិសុខលើផ្ទៃសមុទ្រ និងសុវត្ថិភាពផ្សេងៗទៀត ប្រព័ន្ធទំនាក់ទំនងរវាងទីបញ្ជាការជួរមុខ ជាមួយបញ្ជាការដ្ឋានឆ្នាំសមុទ្រតំបន់៤ វៀតណាម។

ដោយឈរលើយន្តការទំនាក់ទំនងហេតុការណ៍រវាងឆ្នាំសមុទ្រវៀតណាម និងគណ:កម្មាធិការជាតិសន្តិសុខលម្ហសមុទ្រ ក្នុងការផ្លាស់ប្តូរព័ត៌មានរវាងភាគីទាំងពីរ និងសកម្មភាពទូកនេសាទខុសច្បាប់ ជម្លោះដែននេសាទ ការឆ្លងដែនខុសច្បាប់ គ្រោះថ្នាក់នៅសមុទ្រ ការស្វែងរក និងជួយសង្គ្រោះ ការការពារបរិស្ថានសមុទ្រ ឧក្រិដ្ឋកម្ម ការរត់ពន្ធខុសច្បាប់ អំពើប្រឆាំងភេរវកម្ម សន្តិសុខ សណ្តាប់ធ្នាប់ និងសុវត្ថិភាពលើផ្ទៃសមុទ្រ។ ពាក់ព័ន្ធការឆ្លងដែនខុសច្បាប់រវាងប្រទេសទាំងពីរ កម្ពុជា វៀតណាម មិនមានករណីជនជាតិវៀតណាម ឬពលរដ្ឋខ្មែរចូល ចេញពីប្រទេសដោយខុសច្បាប់នោះទេ។ ទាក់ទងការផ្លាស់ប្តូរ ការយាមល្បាត និងការត្រួតពិនិត្យក្នុងដែនទឹកប្រវត្តិសាស្ត្រ ភាគីទាំងពីរបង្កើនការផ្លាស់ប្តូរព័ត៌មានអំពីស្ថានភាពសន្តិសុខ សណ្តាប់ធ្នាប់លើផ្ទៃសមុទ្រកាន់តែស៊ីជម្រៅបន្ថែមទៀត។

សូមបញ្ជាក់ថា កិច្ចប្រជុំស្តីពីការទំនាក់ទំនងកិច្ចសហប្រតិបត្តិការលើផ្ទៃសមុទ្ររវាងទីបញ្ជាការជួរមុខ អគ្គលេខាធិការសន្តិសុខលម្ហសមុទ្រកម្ពុជា ជាមួយបញ្ជាការដ្ឋានឆ្នាំសមុទ្រតំបន់ ៤ វៀតណាម បានរៀបចំធ្វើឡើងចំនួន៣លើករួចមកហើយ ចំពោះលទ្ធផលកិច្ចសហប្រតិបត្តិការមួយចំនួន បានឯកភាពគ្នាធ្វើឱ្យបទល្មើសខុសច្បាប់ផ្សេងៗមានការថយចុះ ហើយភាគីទាំងពីរបន្តបង្កើនកិច្ចសហប្រតិបត្តិការបង្ក្រាប ទប់ស្កាត់នូវរាល់បទល្មើសផ្សេងៗដែលកើតមានឡើងលើផ្ទៃសមុទ្រឱ្យបាន៕

ដោយ ងូ សុមុនី