AKP ភ្នំពេញ ថ្ងៃទី២២ ខែតុលា ឆ្នាំ២០២៥-- សម្តេចកិត្តិសង្គហបណ្ឌិត ម៉ែន សំអន ប្រធានសមាគមនារីកម្ពុជា ដើម្បីសន្តិភាព និងអភិវឌ្ឍន៍ បានអញ្ជើញជាអធិបតីក្នុងពិធីសំណេះសំណាល និងផ្សព្វផ្សាយពីភារកិច្ចចំពោះមុខរបស់សមាគមនារីកម្ពុជាដើម្បីសន្តិភាព និងអភិវឌ្ឍន៍ តាមរយៈប្រព័ន្ធ Zoom និងដោយមានការចូលរួមផ្ទាល់ពីសំណាក់លោកជំទាវ ទុយ សិរីរតនៈ នេត្រ ភក្រ្តា ប្រធានកិត្តិយសសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងព័ត៌មាន សមាជិកាកិត្តិយស ក្រុមប្រតិបត្តិ ប្រធាន និងអនុប្រធាននារីតាមអគ្គនាយកដ្ឋានទាំងប្រាំរបស់ក្រសួងព័ត៌មាន នាព្រឹកថ្ងៃទី២២ ខែតុលា ឆ្នាំ២០២៥។

សម្តេចកិត្តិសង្គហបណ្ឌិត ម៉ែន សំអន បាននាំយកការផ្តាំផ្ញើសាកសួរ សុខទុក្ខ និងការនឹករលឹកពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកិត្តិយសសមាគមនារីកម្ពុជា ដើម្បីសន្តិភាព និងអភិវឌ្ឍន៍ ជូនដល់សមាជិកសមាជិកា និងសហការីទាំងអស់ដែលកំពុងបំពេញការងារដ៏មមាញឹក។ សម្តេចកិត្តិសង្គហបណ្ឌិតបានរំលឹកដល់សាវតារបស់សមាគម ដោយបានរំលេចនូវប្រវត្តិនៃការកកើតសមាគម  រួមទាំងដំណើរវិវត្តរបស់សមាគមតាំងពីដំណាក់កាលចូលរួមពលី រំដោះជាតិ មាតុភូមិ និងការចូលរួមក្នុងសកម្មភាពសង្គម មនុស្សធម៌ជាបន្តបន្ទាប់ក្នុងសម័យសន្តិភាព។

ស្របពេលជាមួយគ្នានេះ សម្តេចកិត្តិសង្គហបណ្ឌិតក៏បានលើកឡើងអំពីគំរូវីរភាពរបស់ថ្នាក់ដឹកនាំដែលបានលះបង់ កម្លាំងកាយចិត្ត ប្រាជ្ញាស្មារតី ស្វែងរកបាននូវសុខសន្តិភាព និងការអភិវឌ្ឍរហូតមកដល់សព្វថ្ងៃនេះ និងមានប្រសាសន៍ថ្លែងអំណរគុណដល់សមាជិក សមាជិកានៃសមាគមតាមស្ថាប័នទូទាំងប្រទេសដែលបានដឹកនាំសកម្មភាពអំណោយមនុស្សធម៌ និងការឆ្លើយតបទាន់ពេលវេលា ចូលរួមយ៉ាងសកម្ម និងធ្វើការដោយផ្ទាល់ជាមួយរាជរដ្ឋាភិបាលជួយដល់វីរកងទ័ពជួរមុខ ក្រុមគ្រួសារវីរកងទ័ព និងប្រជាជនភៀសសឹក នៅតាមព្រំដែនកម្ពុជា-ថៃ។

ក្នុងឱកាសនេះដែរ សម្តេចប្រធានសមាគម និងសមាជិកទាំងអស់បានថ្លែងការដឹងគុណដល់យុទ្ធជន យុទ្ធនារី វីរកងទ័ពទាំងអស់ដែលបានលះបង់កម្លាំងកាយកម្លាំងចិត្តការពារជាតិមាតុភូមិ ដែលបានកំពុងឈរជើងយ៉ាងស្វាហាប់ដើម្បីការពារទឹកដី អធិបតេយ្យភាពជាតិកម្ពុជាពីការរំលោភឈ្លានពានរបស់កងទ័ពថៃ៕

ដោយ៖ ទូច វលក័្ខណ រូបថត៖ ឡុង ដេវីត