AKP បន្ទាយមានជ័យ ថ្ងៃទី២២ ខែតុលា ឆ្នាំ២០២៥--ផ្លូវប្រវែងជាង១៥គីឡូម៉ែត្រ ដែលតភ្ជាប់ពីភូមិកុងសៀម ទៅភូមិកូនខ្លែង នៅក្នុងមូលដ្ឋានឃុំប៉ោយចារ និងឃុំណាំតៅ ស្រុកភ្នំស្រុក ខេត្តបន្ទាយមានជ័យ កំពុងត្រូវបានអាជ្ញាធរមូលដ្ឋានចាប់ផ្តើមធ្វើការជួសជុលឡើងវិញ បន្ទាប់ពីផ្លូវនេះបានរងការខូចខាតយ៉ាងដំណំដោយសារជំនន់ទឹកភ្លៀងកាលពីពេលកន្លងទៅ ដើម្បីជួយសម្រួលដល់ការធ្វើដំណើរ និងការដឹកជញ្ជូនរបស់ប្រជាពលរដ្ឋ។

លោក ហីរី ហាំង អភិបាលរងស្រុកភ្នំស្រុក បានប្រាប់នៅថ្ងៃទី២១ ខែតុលា ឆ្នាំ២០២៥ ថា ក្រុមការងារស្រុក រដ្ឋបាលឃុំប៉ោយចារ និងរដ្ឋបាលឃុំណាំតៅ បានសហការគ្នាជួសជុលផ្លូវដែលរងការខូចខាតដោយសារទឹកជំនន់កន្លងមកនេះ ក្នុងនោះក៏មានការចូលរួមឧបត្ថម្ភថវិកាពីអង្គការទស្សនៈពិភពលោកប្រចាំស្រុកភ្នំស្រុក និងសប្បុរសជននានាផងដែរ។

លោកបានបញ្ជាក់ថា ផ្លូវនេះគឺជាផ្លូវដ៏មានសារសំខាន់ក្នុងការតភ្ជាប់ពីទីប្រជុំជនទៅកាន់តំបន់ជនបទនានាក្នុងស្រុក ក៏ដូចជាខេត្តនានា ក្នុងការសម្រួលការធ្វើដំណើររបស់ប្រជាពលរដ្ឋ សិស្សានុសិស្សទៅកាន់សាលារៀន ការដឹកអ្នកជំងឺទៅមណ្ឌលសុខភាព មន្ទីរពេទ្យ ជាពិសេស ការដឹកជញ្ជូនកសិផលទៅកាន់ទីផ្សារបានលឿន និងទាន់ពេលវេលា។ ផ្លូវប្រវែង១៥គីឡូម៉ែត្រនេះ ធ្លាប់ជួបការលំបាក ក៏ប៉ុន្តែឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានផ្តល់គ្រឿងចក្រមកធ្វើការជួសជុលដោយក្រាលថ្មបំបែកកៀរកិនរួចរាល់ទាំងស្រុងកាលពីចុងខែសីហា ឆ្នាំ២០២៥ បន្ទាប់ពីបានចាប់ផ្តើមតាំងពីដើមខែកក្កដា ឆ្នាំ២០២៥។ ក៏ប៉ុន្តែ ផ្លូវនេះត្រូវរងការបំផ្លាញដោយជំនន់ទឹកភ្លៀងកន្លងមក ដោយត្រូវទឹកហូរកាត់ដាច់ដោយអន្លើៗឡើងវិញ។

លោកក៏បានឱ្យដឹងដែរថា អាជ្ញាធរស្រុកភ្នំស្រុកកំពុងចុះពិនិត្យមើលផ្លូវថ្នល់ផ្សេងៗទៀតនៅតាមបណ្តាមូលដ្ឋានដែលបានទទួលរងការខូចខាតដោយទឹកភ្លៀង ដើម្បីជួយជំរុញការជួសជុលជាបន្ទាន់ សម្រួលការធ្វើដំណើររបស់ប្រជាពលរដ្ឋ។ ពលរដ្ឋដែលរស់នៅតាមដងផ្លូវនៃឃុំទាំងពីរ (ប៉ោយចារ និងណាំតៅ) បានសម្តែងនូវក្តីរីករាយយ៉ាងខ្លាំង និងថ្លែងអំណរគុណចំពោះអាជ្ញាធរស្រុកភ្នំស្រុក ក៏ដូចជាថ្នាក់ដឹកនាំខេត្ត ដែលបានយកចិត្តទុកដាក់ និងចាត់ចែងជួសជុលផ្លូវឡើងវិញជាបន្ទាន់។

អ្នកស្រី សុខា ដែលជាអ្នករស់នៅក្នុងភូមិកូនខ្លែង បានឱ្យដឹងថា «ពួកខ្ញុំពិតជាត្រេកអរខ្លាំងណាស់ ព្រោះផ្លូវនេះខូចខ្លាំងពេក រអិលពិបាកធ្វើដំណើរ ហើយកូនៗទៅសាលាក៏ពិបាកដែរ។ ឥឡូវអាជ្ញាធរជួយជួសជុល ពួកខ្ញុំអាចដឹកកសិផលទៅលក់បានលឿន ហើយធ្វើដំណើរទៅណាក៏ងាយស្រួលវិញដែរ»។ ចំណែកឯ លោក ជា វណ្ណា ដែលជាពលរដ្ឋនៅភូមិកុងសៀម ក៏បានលើកឡើងដែរថា «ការជួសជុលនេះពិតជាមានតម្លៃណាស់សម្រាប់ពួកយើង។ កាលផ្លូវខូចខ្លាំង យើងពិបាកដឹកអ្នកជំងឺទៅពេទ្យណាស់ ហើយការដឹកទំនិញក៏ខាតពេលច្រើនដែរ។ ឥឡូវឃើញគេមកធ្វើហើយ ពួកខ្ញុំសង្ឃឹមថាវានឹងរឹងមាំហើយមិនងាយខូចទៀតទេ»។

ការជួសជុលផ្លូវនេះ គឺជាការឆ្លើយតបយ៉ាងឆាប់រហ័សរបស់អាជ្ញាធរចំពោះទុក្ខលំបាករបស់ប្រជាពលរដ្ឋដែលរងផលប៉ះពាល់ដោយទឹកជំនន់ និងបង្ហាញពីការយកចិត្តទុកដាក់ខ្ពស់ក្នុងការស្តារហេដ្ឋារចនាសម្ព័ន្ធឡើងវិញដើម្បីធានាបាននូវការរស់នៅប្រកបដោយភាពងាយស្រួល៕

ដោយ ឈុន សារ៉ាត