AKP កំពង់ធំ ថ្ងៃទី២២ ខែតុលា ឆ្នាំ២០២៥-- ឯកឧត្តម នួន ផារ័ត្ន អភិបាលខេត្តកំពង់ធំ បានផ្ដល់គោលការណ៍៧ចំណុចដល់មន្ទីរអង្គភាព និងអាជ្ញាធរក្រុង ស្រុក ឃុំ សង្កាត់ទាំងអស់សូមបន្តខិតខំបំពេញកិច្ចការឱ្យកាន់តែមានប្រសិទ្ធភាពដើម្បីបម្រើសេវា និងឧត្តមប្រយោជន៍ជូនប្រជាពលរដ្ឋ។ ឯកឧត្តមអភិបាលខេត្តថ្លែងដូចនេះក្នុងឱកាសបិទសន្និបាតបូកសរុបលទ្ធផលការងារឆ្នាំ២០២៥និងលើកទិសដៅការងារឆ្នាំ២០២៦ របស់មន្ទីររៀបចំដែនដី នគរូបនីយកម្ម សំណង់និងសុរិយោដីខេត្តកំពង់ធំ កាលពីថ្ងៃទី២១ ខែតុលា ឆ្នាំ២០២៥។

ឯកឧត្តម នួន ផារ័ត្ន បានបញ្ជាក់ថា រាជរដ្ឋាភិបាលអាណត្តិទី៧នេះក្នុងយុទ្ធសាស្ត្របញ្ចកោណដំណាក់កាលទី១ បានកំណត់យកជាអាទិភាពគន្លឹះ៥ គឺ មនុស្ស ផ្លូវ ទឹក ភ្លើង និងបច្ចេកទេសវិទ្យា ជាពិសេសបច្ចេកវិទ្យាឌីជីថល។ អាជ្ញាធរគ្រប់ជាន់ថ្នាក់ស្ថាប័នពាក់ព័ន្ធព្រមទាំងមន្រ្តីជំនាញទាំងអស់ដែលបាននិងកំពុងអនុវត្តការងារបម្រើសេវាសាធារណៈជូនប្រជាពលរដ្ឋត្រូវយកចិត្តទុកដាក់ដូចជា៖ ១. យកចិត្តទុកដាក់តាមដានរាល់ការណែនាំរបស់ក្រសួងនិងរដ្ឋបាលខេត្តក្នុងការងារចុះបញ្ជីដីធ្លីមានលក្ខណៈជាប្រព័ន្ធឱ្យបានចប់តាមផែនការដើម្បីផ្ទេរកម្មសិទ្ធិជូនប្រជាពលរដ្ឋ។ ២. ចូលរួមជំរុញយន្តការគណៈកម្មាធិការរៀបចំដែនដី និងនគរូបនីយកម្មថ្នាក់ខេត្ត និងថ្នាក់ក្រុង-ស្រុក ដើម្បីបង្កើនប្រសិទ្ធភាពការងាររៀបចំដែនដី។ ៣. ជំរុញការងារកំណត់តំបន់ទីប្រជុំជន និងការធ្វើផែនការប្រើប្រាស់ដីក្នុងទីប្រជុំជនត្រូវរៀបចំប្លង់គោលដោយផ្តោតលើទំហំផ្លូវ ប្រព័ន្ធលូ អាងស្តុបទឹកនិងកន្លែងទុកដាក់សំរាម។ ៤. ជំរុញការងារដោះស្រាយវិវាទដីធ្លី តាមយន្តការគណៈកម្មាធិការសុរិយោដីឱ្យបានល្អប្រសើរ ពិសេសត្រូវធ្វើផែនការដោះស្រាយវិវាទ។ ៥. ពង្រឹងការចុះត្រួតពិនិត្យសំណង់ជាប្រចាំ និងសហការជាមួយស្ថាប័នពាក់ព័ន្ធ ដើម្បីផ្សព្វផ្សាយឱ្យប្រជាពលរដ្ឋអនុវត្តតាមបទប្បញ្ញត្តិសំណង់ទប់ស្កាត់ឱ្យបានទាន់ពេលវេលានៅសំណង់ដែលសាងសង់ខុសច្បាប់ពិសេស ឃុំ សង្កាត់ ត្រូវពិនិត្យមើលតាមដងស្ទឹងកុំឱ្យប្រជាពលរដ្ឋសាងសង់សំណង់នៅជាប់មាត់ស្ទឹង។ ៦. បន្តកិច្ចសហការជាមួយគណៈកម្មាធិការ សម្បទានដីសង្គមកិច្ចថ្នាក់ជាតិនិងគណៈកម្មាធិការប្រើប្រាស់និងបែងចែកដីថ្នាក់ខេត្តដើម្បីអនុវត្តគម្រោង LASED III តាមផែនការគ្រោងទុក និង៧. គ្រប់មន្ទីរអង្គភាពត្រូវចូលរួម សហការអនុវត្តការងារស្របតាមជវភាពនៃប្រព័ន្ធតួអង្គតែមួយ។

ឯកឧត្តម នួន ផារ័ត្ន បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ដ្រីរាជការទាំងអស់នៃមន្ទីររៀបចំដែនដី នគរូបនីយកម្ម សំណង់ និងសុរិយាដី ខេត្តកំពង់ធំ និងអាជ្ញាធរពាក់ព័ន្ធគ្រប់លំដាប់ថ្នាក់ ដែលបំពេញការងារប្រកបដោយឆន្ទៈខ្ពស់ និងទទួលបានលទ្ធផលល្អនិងបានលើកទឹកចិត្តឱ្យបន្តខិតខំបំពេញកិច្ចការឱ្យកាន់តែមានប្រសិទ្ធភាពដើម្បីបម្រើសេវា និងឧត្តមប្រយោជន៍ជូនប្រជាពលរដ្ឋ៕

ដោយ ស៊ុម វណ្ណា