AKP ភ្នំពេញ ថ្ងៃទី២២ ខែតុលា ឆ្នាំ២០២៥ -- ប្រធានផ្នែកស៊ើបការណ៍អេហ្ស៊ីប លោក ហាស់សាន់ រ៉ាស្សាដ (Hassan Rashad) បានទៅដល់ប្រទេសអ៊ីស្រាអែលកាលពីថ្ងៃអង្គារ ដើម្បីពិភាក្សាអំពីបទឈប់បាញ់នៅតំបន់ហ្គាហ្សាជាមួយមន្ត្រីអ៊ីស្រាអែល។

ទូរទស្សន៍សាធារណៈរបស់អ៊ីស្រាអែល KAN បាននិយាយថា លោក រ៉ាស្សាដ បានជួបជាមួយនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ដើម្បីពិភាក្សាអំពីការអនុវត្តកិច្ចព្រមព្រៀងបទឈប់បាញ់។

បណ្តាញព័ត៌មានរដ្ឋ Al-Qahera របស់អេហ្ស៊ីបបាននិយាយថាកិច្ចពិភាក្សារបស់លោក រ៉ាស្សាដ នៅក្នុងប្រទេសអ៊ីស្រាអែល ក៏នឹងទទួលយកការបញ្ចូលនូវជំនួយមនុស្សធម៌ចូលទៅក្នុងតំបន់ហ្គាហ្សាផងដែរ។

ប្រមុខចារកម្មអេហ្ស៊ីបក៏នឹងជួបជាមួយបេសកជនពិសេសរបស់សហរដ្ឋអាមេរិកសម្រាប់តំបន់មជ្ឈិមបូព៌ា លោក ស្ទីវ វីតកូហ្វ (Steve Witkoff) នៅក្នុងដំណើរទស្សនកិច្ចនោះផងដែរ។

ដំណើរ​ទស្សនកិច្ច​នេះ​ជាដំណើរទស្សនកិច្ច​លើក​ដំបូង​របស់​មន្ត្រី​ជាន់ខ្ពស់​អេហ្ស៊ីបទៅកាន់​ប្រទេស​អ៊ីស្រាអែល ចាប់​តាំង​ពី​សង្រ្គាម​ប្រល័យ​ពូជសាសន៍​របស់​ទីក្រុងតែលអាវីវនៅក្នុង​តំបន់ហ្គាហ្សា ចាប់តាំងពីក្នុង​ខែ​តុលា ឆ្នាំ​២០២៣ មក។

កិច្ចព្រមព្រៀងបទឈប់បាញ់បានចូលជាធរមាននៅថ្ងៃទី១០ ខែតុលាឆ្នាំ២០២៥ នៅតំបន់ហ្គាហ្សា ដោយផ្អែកលើផែនការដំណាក់កាលដែលបង្ហាញដោយប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump)។ ដំណាក់កាលទី១ រួមមានការដោះលែងចំណាប់ខ្មាំងអ៊ីស្រាអែលជាថ្នូរនឹងអ្នកទោសប៉ាឡេស្ទីន។

ផែនការ​នេះ​ក៏បាន​គិត​គូរ​ដល់​ការ​កសាង​តំបន់​ហ្គាហ្សា​ឡើង​វិញ និង​ការ​បង្កើត​យន្តការ​គ្រប់គ្រង​ថ្មី​ដោយ​គ្មាន​ក្រុម​ហាម៉ាស់ផងដែរ។

ចាប់តាំងពីខែតុលា ឆ្នាំ២០២៣ មក សង្គ្រាមប្រល័យពូជសាសន៍អ៊ីស្រាអែលបានសម្លាប់មនុស្សជាង ៦៨.២០០នាក់ និងរបួសជាង១៧០.៣០០នាក់។ នេះបើយោងតាមក្រសួងសុខាភិបាលតំបន់ហ្គាហ្សា៕

ដោយ៖ យា ចិន្តាខន្តី (ប្រភព៖ AA-AKP)