AKP ភ្នំពេញ ថ្ងៃទី២១ ខែតុលា ឆ្នាំ២០២៥ -- ការិយាល័យប្រធានាធិបតីកូរ៉េខាងត្បូងបាននិយាយថា លោក លី ជេយ៉ុង (Lee Jae Myung) បានធ្វើការសន្ទនាតាមទូរស័ព្ទជាលើកដំបូងជាមួយប្រធានាធិបតីអេហ្ស៊ីប លោក អាប់ដេល ហ្វាតតាហ៍ អែល ស៊ីស៊ី (Abdel Fattah El-Sisi) កាលពីថ្ងៃចន្ទហើយបានពិភាក្សាអំពីវិធីពង្រីកកិច្ចសហប្រតិបត្តិការរវាងប្រទេសទាំងពីរ។

អ្នកនាំពាក្យប្រធានាធិបតី លោក គីម ណាមជុន (Kim Nam-jun)បាននិយាយនៅក្នុងការចេញផ្សាយមួយថា ក្នុងអំឡុងពេលនៃការសន្ទនាទូរស័ព្ទនេះ មេដឹកនាំទាំងពីរបានអបអរសាទរខួប ៣០ឆ្នាំដែលជាការកត់សម្គាល់នៃការបង្កើតទំនាក់ទំនងការទូតរវាងប្រទេសទាំងពីរ។

លោក លី និងលោក អែល ស៊ីស៊ី ក៏បានចែករំលែកពីការយោគយល់គ្នាថា ប្រទេសទាំងពីរបានអភិវឌ្ឍន៍កិច្ចសហប្រតិបត្តិការដែលមានផលប្រយោជន៍ទៅវិញទៅមកក្នុងវិស័យផ្សេងៗ រួមទាំងសេដ្ឋកិច្ច និងឧស្សាហកម្មការពារជាតិ ដោយលោកបានកត់សម្គាល់ថាមានសក្តានុពលដ៏អស្ចារ្យសម្រាប់កិច្ចសហប្រតិបត្តិការបន្ថែមទៀត។

ភាគីទាំងពីរក៏បានចែករំលែកក្តីសង្ឃឹមសម្រាប់ការពង្រឹងកិច្ចសហប្រតិបត្តិការរបស់ពួកគេបន្ថែមទៀតនៅក្នុងវប្បធម៌ ការអប់រំ និងការផ្លាស់ប្តូរប្រជាជនទៅប្រជាជន ដោយសារការពេញនិយមនាពេលថ្មីៗនេះនៃវប្បធម៌កូរ៉េនៅក្នុងប្រទេសអេហ្ស៊ីប។

ប្រធានាធិបតីអេហ្ស៊ីបបាននិយាយថា ការវិនិយោគរបស់ក្រុមហ៊ុនកូរ៉េខាងត្បូងដែលនាំមុខគេបានរួមចំណែកយ៉ាងសំខាន់ដល់សេដ្ឋកិច្ចរបស់ប្រទេសអាហ្រ្វិក ដោយបានបន្ថែមថា លោកសង្ឃឹមសម្រាប់សកម្មភាពអាជីវកម្មបន្តរបស់ពួកគេ។

មេដឹកនាំទាំងពីរក៏បានចែករំលែកគំនិតរបស់ពួកគេអំពីស្ថានភាពសន្តិសុខជុំវិញឧបទ្វីបកូរ៉េ និងតំបន់មជ្ឈិមបូព៌ា ហើយបានប្តេជ្ញាថានឹងជួបគ្នានាពេលខាងមុខដើម្បីពិភាក្សាអំពីការអភិវឌ្ឍនៃទំនាក់ទំនងរបស់ពួកគេ៕

ដោយ៖ មូល មិនា (ប្រភព៖ យ៉ុនហាប់)