AKP ភ្នំពេញ ថ្ងៃទី២១ ខែតុលា ឆ្នាំ២០២៥ -- ការិយាល័យរបស់លោក គូ យុនជេអុល (Koo Yun-cheol) រដ្ឋមន្រ្តីក្រសួងហិរញ្ញវត្ថុកូរ៉េខាងត្បូង បាននិយាយថា លោករដ្ឋមន្ត្រីក្រសួងហិរញ្ញវត្ថុ និងរដ្ឋមន្ត្រីក្រសួងវិទ្យាសាស្ត្រលោក បែ ក្យុងហ៊ូន (Bae Kyung-hoon) កាលពីថ្ងៃចន្ទបានព្រមព្រៀងគ្នាក្នុងការពង្រឹងកិច្ចសហប្រតិបត្តិការអន្តរក្រសួង ដើម្បីបង្កើនប្រសិទ្ធភាពនៃគោលនយោបាយរបស់រដ្ឋាភិបាល។

លោក គូ ដែលឡើងឋានៈជាឧបនាយករដ្ឋមន្ត្រីទទួលបន្ទុកកិច្ចការសេដ្ឋកិច្ច និងលោក បែ ដែលឥឡូវនេះឡើងកាន់តំណែងជាឧបនាយករដ្ឋមន្ត្រីទទួលបន្ទុកវិទ្យាសាស្ត្រ និងបច្ចេកវិទ្យា បានជួបប្រជុំគ្នាជាលើកដំបូងបន្ទាប់ពីការដំឡើងតួនាទីរដ្ឋមន្រ្តីក្រសួងវិទ្យាសាស្ត្រ និងបច្ចេកវិទ្យា ដល់កម្រិតឧបនាយករដ្ឋមន្ត្រីក្នុងការរៀបចំរដ្ឋាភិបាលឡើងវិញនាពេលថ្មីៗនេះ។

លោក គូ បាន​និយាយ​ក្នុង​អំឡុង​ពេលនៃ​កិច្ច​ប្រជុំនោះ​ថា «វិទ្យាសាស្ត្រនិង​បច្ចេកវិទ្យា​មាន​ទំនាក់ទំនង​យ៉ាង​ជិតស្និទ្ធ​ជាមួយ​នឹង​ការ​អភិវឌ្ឍ​សេដ្ឋកិច្ចនិង​ឧស្សាហកម្ម»។

លោកក៏បានកត់សម្គាល់ផងដែរថា វិធីសាស្រ្តដ៏ទូលំទូលាយនៅក្នុងការបង្កើតគោលនយោបាយសេដ្ឋកិច្ច គឺជាការចាំបាច់ ដោយពិចារណាទៅលើផលប៉ះពាល់យ៉ាងសំខាន់នៃបញ្ញាសិប្បនិម្មិត (AI) ដែលជារបៀបវារៈស្នូលនៅក្នុងយុទ្ធសាស្ត្រកំណើនរបស់រដ្ឋបាលបច្ចុប្បន្ន។

រដ្ឋបាលរបស់លោកប្រធានាធិបតី លី ជែម្យុង (Lee Jae Myung)នៅពេលមុននេះ បានបង្ហាញផែនការអភិវឌ្ឍន៍សេដ្ឋកិច្ចរយៈពេលប្រាំឆ្នាំដែលមានបំណងជំរុញសេដ្ឋកិច្ចនវានុវត្តន៍ទំនើប ដែលផ្តោតទៅលើ AI និងបច្ចេកវិទ្យាទំនើបផ្សេងៗទៀត៕

ដោយ៖ យា ចិន្តាខន្តី (ប្រភព៖ កូរ៉េថាមស៍)