AKP កំពង់ចាម ថ្ងៃទី២១ ខែតុលា ឆ្នាំ២០២៥-- ឯកឧត្ដម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានធ្វើការណែនាំដល់អាជ្ញាធរពាក់ព័ន្ធទាំងអស់ និងលើកទឹកចិត្តដល់កងកម្លាំងមានសមត្ថកិច្ចគ្រប់ថ្នាក់ រដ្ឋបាលឃុំ សង្កាត់ បន្តពង្រឹងការផ្សព្វផ្សាយគោលនយោបាយភូមិ ឃុំ សង្កាត់មានសុវត្ថិភាព ប្រកបដោយប្រសិទ្ធភាព និងទទួលបានលទ្ធផលកាន់តែល្អប្រសើរឡើងបន្ថែមទៀតព្រោះ គោលនយោបាយភូមិឃុំមានសុវត្ថិភាពជា កត្តាគ្រឹះដ៏សំខាន់នៃស្ថិរភាព សន្តិសុខសណ្តាប់ធ្នាប់សង្គមនៅក្នុងមូលដ្ឋានរបស់ខ្លួន។ ឯកឧត្តមថ្លែងបែបនេះក្នុងកិច្ចប្រជុំពិនិត្យវឌ្ឍនភាព ដំណើរការផ្តល់ជ័យលាភី នៃការអនុវត្គគោលនយោបាយ ភូមិ ឃុំសង្កាត់ មានសុវត្ថិភា និងសេវាសង្គមសម្រាប់រដ្ឋបាលឃុំ សង្កាត់ ឆ្នាំ២០២៥ នារសៀលថ្ងៃទី២០ ខែតុលា ឆ្នាំ២០២៥។

ឯកឧត្ដម អ៊ុន ចាន់ដា បានបញ្ជាក់ថា ក្រុមប្រឹក្សាឃុំ សង្កាត់រួមទាំងប៉ុស្តិ៍នគរបាលរដ្ឋបាល មណ្ឌលសុខភាព គឺជា ក្រុមប្រតិបត្តិករដ៏សំខាន់ក្នុងការអនុវត្តគោល-នយោបាយ ភូមិ-ឃុំ-សង្កាត់មានសុវត្ថិភាព  ប្រកបដោយ ប្រសិទ្ធភាពបំផុតនៅមូលដ្ឋានរបស់ខ្លួន ដោយធានានិងរក្សាបាននូវសន្តិសុខ សណ្តាប់ធ្នាប់សាធារណៈនៅក្នុងមូលដ្ឋានរ ការលើកកម្ពស់ការផ្តល់សេវារដ្ឋបាលសាធារណការ ចូលរួមដោយផ្ទាល់ក្នុងកម្មវិធីអភិវឌ្ឍ មូលដ្ឋានការចូលរួមថែរក្សាអនាម័យ សោភ័ណភាព និងបរិស្ថានល្អក្នុងដែនសមត្ថកិច្ច របស់ខ្លួន។

ឯកឧត្តមអភិបាលខេត្តបានបញ្ជាក់ថា ដើម្បីចូលរួមប្រឡងប្រណាំងនៃការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព និងសេវាសង្គម ឆ្នាំ២០២៥ ឱ្យទទួលបានលទ្ធផលល្អប្រសើរ រដ្ឋបាលឃុំ សង្កាត់ ត្រូវតែបន្តអនុវត្តនិងឆ្លើយតបខ្លឹមសារគោលនយោបាយ «ភូមិ-ឃុំ-សង្កាត់មានសុវត្ថិភាព» ដែលមានលក្ខណសម្បត្តិ៧យ៉ាង រួមមាន ១-ផ្តល់សេវាសាធារណៈ ជាពិសេស សេវារដ្ឋបាល ប្រកបដោយគុណភាព តម្លាភាព និងទទួលបានជំនឿទុកចិត្ត។ ២- គ្មានបទល្មើស លួច ឆក់ ប្លន់ គ្រឿងញៀន ល្បែងស៊ីសងខុសច្បាប់ និងបទល្មើសគ្រប់ប្រភេទ។ ៣- មានសណ្តាប់ធ្នាប់សាធារណៈល្អ ជាពិសេសគ្មានគ្រោះថ្នាក់ចរាចរណ៍។ ៤- គ្មានអំពើអាណាចារ គ្មានការជួញដូរ មនុស្ស ជាពិសេស ស្ត្រី និងកុមារ គ្មានអំពើហឹង្សាក្នុងគ្រួសារ និង គ្មានក្មេងទំនើង។ ៥- ដោះស្រាយវិវាទនៅមូលដ្ឋានក្រៅប្រព័ន្ឋតុលាការប្រកបដោយគុណភាពនិងតម្លាភាព។ ៦- មានអនាម័យ មានសោភ័ណភាពល្អ និង បរិស្ថានល្អ និង៧- ឆ្លើយតបបានទាន់ពេលវេលា ចំពោះគ្រោះមហន្តរាយ និងរាល់ជំងឺឆ្លងរាតត្បាតកាចសាហាវប្រកបដោយប្រសិទ្ធភាព៕

ដោយ ឆាយ ម៉ុត