AKP ភ្នំពេញ ថ្ងៃទី២០ ខែតុលា ឆ្នាំ២០២៥ -- កាសែត Times of Israel បានរាយការណ៍កាលពីថ្ងៃអាទិត្យថា អ៊ីស្រាអែលបានធ្វើការវាយប្រហារតាមផ្លូវអាកាសទៅលើទីក្រុងរ៉ាហ្វា នៅភាគខាងត្បូងតំបន់ហ្គាហ្សាស្រ្ទីប ដែលជាការសងសឹកចំពោះការវាយប្រហារទៅលើកងកម្លាំងការពារអ៊ីស្រាអែល (IDF) នៅក្នុងតំបន់នោះ។

ការរាយការណ៍នោះបាននិយាយថា ពួកសកម្មប្រយុទ្ធមកពីតំបន់ហ្គាហ្សាស្ទ្រីបបានបើកការវាយប្រហារជាលើកដំបូងទៅលើកងកម្លាំងអ៊ីស្រាអែលនៅទីក្រុងរ៉ាហ្វា។

កិច្ចព្រមព្រៀងបទ​ឈប់​បាញ់​គ្នា​រវាង​អ៊ីស្រាអែល ​និង​ចលនា​ប៉ាឡេស្ទីន​ហាម៉ាស់ បាន​ចូល​ជា​ធរមាន​នៅ​ថ្ងៃ​ទី១០ ខែ​តុលា ឆ្នាំ២០២៥។

កាលពីថ្ងៃសៅរ៍ ក្រសួងការបរទេសសហរដ្ឋអាមេរិកបាននិយាយថា សហរដ្ឋអាមេរិកបានជូនដំណឹងដល់ប្រទេសអ្នកធានានៃកិច្ចព្រមព្រៀងសន្តិភាពតំបន់ហ្គាហ្សា អំពីការរំលោភបទឈប់បាញ់ដោយក្រុមហាម៉ាស់។ ចលនាហាម៉ាស់ប៉ាឡេស្ទីន កាលពីថ្ងៃអាទិត្យបាននិយាយថា ខ្លួនបានច្រានចោល និងបដិសេធការចោទប្រកាន់របស់សហរដ្ឋអាមេរិកពីការរំលោភលើកិច្ចព្រមព្រៀងឈប់បាញ់នៅតំបន់ហ្គាហ្សាស្ទ្រីប៕

ដោយ៖ យា ចិន្តាខន្តី (ប្រភព៖ ស្ពុតនីក)