AKP ភ្នំពេញ ថ្ងៃទី២០ ខែតុលា ឆ្នាំ២០២៥ -- ប្រធានាធិបតីប្រេស៊ីល លោក ល្វីស អ៊ីណាស៊ីអូ លូឡា ដា ស៊ីលវ៉ា (Luiz Inacio Lula da Silva) បាននិយាយថា ប្រទេសប្រេស៊ីលមានបំណងបង្កើតសម្ព័ន្ធភាពជាយុទ្ធសាស្ត្រជាមួយប្រទេសឥណ្ឌា ដែលគ្របដណ្តប់លើវិស័យនយោបាយ សេដ្ឋកិច្ច និងបច្ចេកវិទ្យា។

លោក លូឡា បាននិយាយនៅក្នុងសារវីដេអូមួយដែលបានបង្ហោះនៅលើបណ្តាញសង្គមអ៊ិច (X) កាលពីចុងសប្តាហ៍មុនថា «សម្រាប់ដំណើរទស្សនកិច្ចរបស់អនុប្រធានាធិបតី លោក ហ្គេរ៉ាល់ដូ អាឡាកមីន (Geraldo Alckmin) ទៅកាន់ប្រទេសឥណ្ឌា ក្នុងការរៀបចំសម្រាប់ការធ្វើដំណើររបស់ខ្ញុំនៅដើមឆ្នាំក្រោយ គឺមានសារៈសំខាន់ខ្លាំងណាស់ ពីព្រោះឥណ្ឌាមានទីផ្សារពិសេស។ យើងអាចមានសម្ព័ន្ធភាពដ៏អស្ចារ្យជាមួយឥណ្ឌា ដូចជានយោបាយ លំហ សហគ្រិន សេដ្ឋកិច្ច។ ដូច្នេះ យើង​នឹង​បង្កើត​សម្ព័ន្ធភាព​យុទ្ធសាស្ត្រ​ជាមួយ​ឥណ្ឌា និង​អភិវឌ្ឍន៍​សេដ្ឋកិច្ច​របស់​ប្រេស៊ីល»។

លោកបានកត់សម្គាល់ថា ដំណើរទស្សនកិច្ចរបស់លោក អាឡាកមីន គឺសំដៅពង្រីកទំនាក់ទំនងអាជីវកម្ម ចាប់តាំងពីសហគ្រិនប្រេស៊ីលជាច្រើនចង់ចូលទៅក្នុងទីផ្សារឥណ្ឌា។ លោក លូឡា បានបន្ថែមថា លោក អាឡាកមីន បានត្រលប់មកពីប្រទេសឥណ្ឌាវិញជាមួយនឹងព័ត៌មានជាច្រើន រួមទាំងការបើកការិយាល័យ Embraer និងការណែនាំអំពីទិដ្ឋាការអេឡិចត្រូនិច ដើម្បីសម្រួលដល់អាជីវកម្ម និងភាពជាដៃគូថ្មី៕

ដោយ៖ យា ចិន្តាខន្តី (ប្រភព៖ ស្ពុតនីក)