AKP សៀមរាប ថ្ងៃទី១៥ ខែតុលា ឆ្នាំ២០២៥-- រដ្ឋបាលខេត្តសៀមរាបនឹងរៀបចំកម្មវិធីជិះទូកកម្សាន្ត និងផ្សារស្ទឹងសៀមរាប រយៈពេលបីថ្ងៃ ចាប់ពីថ្ងៃទី០៤ ដល់ថ្ងៃទី០៦ ខែវិច្ឆិកា ឆ្នាំ២០២៥ ខាងមុខនេះ ដើម្បីទាក់ទាញដល់ភ្ញៀវទេសចរជាតិ និងអន្តរជាតិ ខណៈដែលឆ្នាំនេះ ខេត្តពុំមានការរៀបចំព្រះរាជពិធីបុណ្យអុំទូកនោះទេ។

‎
‎ក្នុងឱកាសដឹកនាំក្រុមការងារចុះត្រួតពិនិត្យទីតាំងត្រៀមរៀបចំកម្មវិធីនៅតាមដងស្ទឹងសៀមរាប នាថ្ងៃទី១៥ ខែតុលា ឆ្នាំ២០២៥ ឯកឧត្តម ប្រាក់ សោភ័ណ អភិបាលខេត្តសៀមរាប បានបញ្ជាក់ថា ឆ្នាំ២០២៥នេះ រដ្ឋបាលខេត្តពុំបានរៀបចំព្រះរាជពិធីបុណ្យអុំទូកនោះទេ ប៉ុន្តែមានការរៀបចំកម្មវិធីផ្សារទឹក និងជិះទូកកម្សាន្តតាមដងស្ទឹងសៀមរាប ក្រោមការរៀបចំរបស់សហភាពសហព័ន្ធយុវជនកម្ពុជាខេត្តសៀមរាប ក្នុងគោលបំណងបម្រើដល់ភ្ញៀវទេសចរ។

‎
‎ឯកឧត្តមបានបញ្ជាក់ទៀតថា កម្មវិធីទាំងបីថ្ងៃនេះ នឹងប្រព្រឹត្តទៅតាមដងស្ទឹងសៀមរាប ចាប់ពីស្ពានព្រះរាជដំណាក់ ដល់ស្ពានវត្តរាជបូណ៌ ក្រុងសៀមរាប ដោយរួមមានកម្មវិធីកម្សាន្តសំខាន់ៗដូចជា៖ កម្មវិធីជិះទូកកម្សាន្តលក្ខណៈមហាជន និងការប្រណាំងទូកខ្នាតតូច «សៀមរាបផ្ទះខ្ញុំ»។ កម្មវិធីផ្សារលើទឹក និងពិព័រណ៍ពាណិជ្ជកម្ម ដែលមានលក់ដូរម្ហូបអាហារ និងផលិតផលនានាតាមទូក និងស្តង់នៅសងខាងផ្លូវតាមដងស្ទឹងសៀមរាប។ ការសម្ដែងសិល្បៈ រួមមាន ល្ខោនបាសាក់ ប្រដាល់គុនខ្មែរ និងតន្ត្រីស្គរដៃ។ ព្រះរាជពិធីសំពះព្រះខែ អកអំបុក និងបណ្ដែតប្រទីប អុជកាំជ្រួច ដែលនឹងធ្វើឲ្យទេសចរអាចទស្សនាទិដ្ឋភាពស្រស់ស្អាតគួរជាទីគយគន់ផងដែរ។‎
‎ឯកឧត្តមក៏បានឱ្យដឹងថា កម្មវិធីទាំងនេះ នឹងរួមចំណែកយ៉ាងសំខាន់ក្នុងការទាក់ទាញទេសចរ និងជំរុញសេដ្ឋកិច្ចមូលដ្ឋានក្នុងខេត្តសៀមរាប៕

ដោយ ឃុត សៅ