AKP ភ្នំពេញ ថ្ងៃទី១៣ ខែតុលា ឆ្នាំ២០២៥ -- រដ្ឋមន្ត្រីក្រសួងកិច្ចការសមុទ្រ និងនេសាទរបស់ប្រទេសឥណ្ឌូណេស៊ី លោក សាគីត វ៉ាយុ ត្រេងហ្គោណូ (Sakti Wahyu Trenggono) បានធានាថា ការនាំចេញផលិតផលសមុទ្ររបស់ប្រទេសឥណ្ឌូណេស៊ីទៅកាន់សហរដ្ឋអាមេរិក រួមទាំងបង្គាផងនោះ សុទ្ធតែមានសុវត្ថិភាពពីការបំពុលដោយសារធាតុវិទ្យុសកម្ម ជាពិសេសសារធាតុវិទ្យុសកម្មនុយក្លេអ៊ែរ Cesium-137 (Cs-137)។

ដូចដែលត្រូវបានរាយការណ៍ដោយទីភ្នាក់ងារសារព័ត៌មានឥណ្ឌូណេស៊ី Antara ដែលកំពុងនិយាយជាមួយអ្នកសារព័ត៌មាននៅខាងក្រៅវេទិកានិរន្តរភាពអន្តរជាតិឥណ្ឌូណេស៊ី (IISF) ឆ្នាំ២០២៥ លោក ត្រេងហ្គោណូ បានបញ្ជាក់ថា ក្រសួងកំពុងពង្រឹងការសម្របសម្រួល និងកិច្ចចរចាជាមួយរដ្ឋបាលចំណីអាហារ និងឱសថសហរដ្ឋអាមេរិក (USFDA) ដើម្បីធានានូវការបន្តការនាំចេញបង្គា ដែលលោកធានាថាមានសុវត្ថិភាព និងគ្រប់គ្រងបានល្អ។

ក្រសួងកិច្ចការសមុទ្រ និងនេសាទឥណ្ឌូណេស៊ី និងរដ្ឋបាល USFDA បានព្រមព្រៀងគ្នាទៅលើសេចក្តីព្រាងនៃអនុស្សរណៈយោគយល់គ្នា (MoU) ស្តីពីវិញ្ញាបនប័ត្រសុវត្ថិភាពផលិតផលបង្គា។ រដ្ឋបាល USFDA ធ្លាប់បានសង្កត់ធ្ងន់ថា ទីផ្សារសហរដ្ឋអាមេរិកនៅតែបើកចំហចំពោះផលិតផលបង្គារបស់ឥណ្ឌូណេស៊ី ប្រសិនបើពួកគេបំពេញតាមស្តង់ដារសុវត្ថិភាពចំណីអាហារ។

លោក ត្រេងហ្គោណូ ក៏បានបញ្ជាក់ផងដែរថា ការព្រួយបារម្ភអំពីសារធាតុវិទ្យុសកម្មនឹងមិនប៉ះពាល់ដល់កិច្ចចរចាពន្ធពាណិជ្ជកម្មនាពេលអនាគតជាមួយសហរដ្ឋអាមេរិកនោះទេ។

សហរដ្ឋអាមេរិក គឺជាទីផ្សារនាំចេញអាហារសមុទ្រដ៏ធំបំផុតមួយរបស់ឥណ្ឌូណេស៊ី។ បង្គា គឺជាមុខទំនិញនាំចេញដ៏សំខាន់របស់ឥណ្ឌូណេស៊ី ដែលរួមចំណែកយ៉ាងសំខាន់ដល់ប្រាក់ចំណូលពាណិជ្ជកម្មបរទេសរបស់ប្រទេសក្នុងតំបន់អាស៊ីអាគ្នេយ៍មួយនេះ៕
ដោយ៖ យា ចិន្តាខន្តី (ប្រភព៖ VNA)