AKP ភ្នំពេញ ថ្ងៃទី០៨ ខែតុលា ឆ្នាំ២០២៥ -- រដ្ឋមន្ត្រីការបរទេសចិនលោក វ៉ាង យី (Wang Yi) បាននិយាយកាលពីថ្ងៃអង្គារថា ប្រទេសចិនមានឆន្ទៈក្នុងការធ្វើការជាមួយប្រទេសកូរ៉េខាងត្បូង ដើម្បីពង្រឹងទំនុកចិត្តគ្នាទៅវិញទៅមក ជៀសវាងការរំខាន ធ្វើឱ្យកិច្ចសហប្រតិបត្តិការស៊ីជម្រៅ និងរួមចំណែកដល់ភាពជោគជ័យដើម្បីការពារសន្តិភាព ស្ថិរភាព និងវិបុលភាពក្នុងតំបន់។

នៅក្នុងកិច្ចសន្ទនាតាមទូរស័ព្ទជាមួយរដ្ឋមន្ត្រីការបរទេសកូរ៉េខាងត្បូងលោក ចូ យ៉ុន (Cho Hyun) លោក វ៉ាង ដែលជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន បាននិយាយថាដោយសារប្រទេសទាំងពីរជាអ្នកជិតខាងដ៏សំខាន់ ក៏ដូចជាដៃគូដែលជិតស្និទ្ធ ប្រទេសចិនតែងតែយកចិត្តទុកដាក់យ៉ាងខ្លាំងចំពោះទំនាក់ទំនងរបស់ខ្លួនជាមួយប្រទេសកូរ៉េខាងត្បូង។

ខណៈដែលប្រទេសកូរ៉េខាងត្បូង និងចិននឹងធ្វើជាម្ចាស់ផ្ទះនៃកិច្ចប្រជុំមេដឹកនាំសេដ្ឋកិច្ច APEC នៅឆ្នាំនេះ និងឆ្នាំក្រោយ លោក វ៉ាង បានសម្តែងក្តីសង្ឃឹមថា ភាគីទាំងពីរនឹងគាំទ្រគ្នាទៅវិញទៅមកក្នុងការកសាងមតិឯកភាពពង្រឹងសាមគ្គីភាព និងកិច្ចសហប្រតិបត្តិការ ការពារពាណិជ្ជកម្មអន្តរជាតិលើកកម្ពស់ពហុភាគីនិយម និងជំរុញដំណើរការកសាងតំបន់ពាណិជ្ជកម្មសេរីនៃអាស៊ីប៉ាស៊ីហ្វិក (FTAAP) ក្នុងការស្វែងរកសហគមន៍អាស៊ីប៉ាស៊ីហ្វិក។

ចំណែកលោក ចូ បាននិយាយថា ប្រទេសកូរ៉េខាងត្បូងយកចិត្តទុកដាក់ខ្ពស់ចំពោះទំនាក់ទំនងរបស់ខ្លួនជាមួយប្រទេសចិន។ លោកបានសម្តែងក្តីសង្ឃឹមថា ប្រទេសកូរ៉េខាងត្បូងនឹងយកកិច្ចប្រជុំមេដឹកនាំសេដ្ឋកិច្ចAPEC ជាឱកាសមួយដើម្បីសម្រួលដល់ការផ្លាស់ប្តូរកម្រិតកំពូលរវាងប្រទេសទាំងពីរ និងធ្វើឱ្យកិច្ចសហប្រតិបត្តិការកាន់តែស៊ីជម្រៅ៕

ដោយ៖ មូល មិនា (ប្រភព៖ ភីបផលដេលី)