AKP ភ្នំពេញ ថ្ងៃទី០៧ ខែតុលា ឆ្នាំ២០២៥--សហព័ន្ធកីឡាកាយវប្បកម្ម និងលំហាត់ប្រាណកម្ពុជាគ្រោងនឹងបញ្ជូនប្រតិភូ ចៅក្រមអន្តរជាតិ គ្រូបង្វឹក កីឡាករកាយវប្បកម្ម សរុប៤នាក់ទៅចូលរួមការប្រកួតកីឡាកាយវប្បកម្មជើងឯកពិភពលោក លើកទី១៦ (The 16th WORLD BODYBUILDING AND PHYSIQUE SPORTS CHAMPIONSHIPS) រយៈពេល១សប្តាហ៍ ក្នុងខែវិច្ឆិកា ឆ្នាំ២០២៥ នៅកោះបាតាំ ប្រទេសឥណ្ឌូណេស៊ី។

លោកស្រី អេមី អគ្គលេខាធិការ សហព័ន្ធកីឡាកាយវប្បកម្ម និងលំហាត់ប្រាណកម្ពុជាបានគូសបញ្ជាក់ថា ដោយមានការអញ្ជើញរបស់សហព័ន្ធកីឡាកាយវប្បកម្ម និងលំហាត់ប្រាណពិភពលោក (WBPF) សហព័ន្ធកីឡាកាយវប្បកម្ម និងលំហាត់ប្រាណកម្ពុជាត្រៀមនឹងបញ្ជូនប្រតិភូ ចៅក្រមអន្តរជាតិ ម្នាក់ គ្រូបង្វឹកម្នាក់ និងកីឡាករ២នាក់ទៅចូលរួមការប្រកួតកីឡាកាយវប្បកម្មជើងឯកពិភពលោក លើកទី១៦ (The 16th WORLD BODYBUILDING AND PHYSIQUE SPORTS CHAMPIONSHIPS) ចាប់ពីថ្ងៃទី១១-១៧ ខែវិច្ឆិកា ឆ្នាំ២០២៥ នៅកោះបាតាំ សាធារណរដ្ឋឥណ្ឌូណេស៊ី។

លោកស្រី អេមី បន្ថែមថា ការចូលរួមប្រកួតនេះ សហព័ន្ធកីឡាកាយវប្បកម្ម និងលំហាត់ប្រាណកម្ពុជា ជាអ្នកទទួលរ៉ាប់រងលើថ្លៃធ្វើដំណើរ ហូបចុក ស្នាក់នៅ និងទិដ្ឋាការ ក្នុងអំឡុងពេលប្រកួត។ សហព័ន្ធបានធ្វើលិខិតសុំការអនុញ្ញាតពីឯកឧត្តមបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា តាមរយៈនាយកដ្ឋានកីឡាជំនាញ និងកីឡាមហាជន។ រាល់ការចេញទៅប្រកួតខាងក្រៅប្រទេសក្នុងកម្រិតអន្តរជាតិនានា សហព័ន្ធតែងតែទទួលបានការអនុញ្ញាតពីឯកឧត្តមបណ្ឌិតសភាចារ្យឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាជាផ្លូវការ ដើម្បីចូលរួមការប្រកួតបង្កើនគុណភាពបច្ចេកទេសរបស់អត្តពលិកកម្ពុជា ក្នុងកម្រិតអន្តរជាតិ ក្នុងនាមជាសមាជិកពេញសិទ្ធិរបស់ពិភពលោក៕

ដោយ ហេង ណាលីន