AKP ភ្នំពេញ ថ្ងៃទី០៧ ខែតុលា ឆ្នាំ២០២៥ -- ក្រសួងការបរទេសរបស់រុស្ស៊ីបាននិយាយកាលពីថ្ងៃចុងសប្តាហ៍មុនថា រដ្ឋមន្ត្រីការបរទេសរុស្ស៊ី លោកស៊ែរហ្គេយ ឡាវរ៉ូវ (Sergey Lavrov) និងសមភាគីវេណេហ្ស៊ុយអេឡាលោក អ៊ីវែន ហ្គីល (Yvan Gil) បានធ្វើការសន្ទនាគ្នាតាមទូរស័ព្ទក្នុងអំឡុងពេលដែលពួកគេបានសម្តែងការព្រួយបារម្ភយ៉ាងខ្លាំងអំពីសកម្មភាពថ្មីៗនេះរបស់សហរដ្ឋអាមេរិកនៅក្នុងសមុទ្រការីបបៀន។

កាលពីថ្ងៃទី០៣ ខែតុលា ឆ្នាំ២០២៥ រដ្ឋមន្ត្រីក្រសួងសង្រ្គាមរបស់សហរដ្ឋអាមេរិក លោក ភែត ហេកសេត (Pete Hegseth) បាននិយាយថាសហរដ្ឋអាមេរិកបានធ្វើការវាយប្រហារលើនាវាជួញដូរគ្រឿងញៀនដែលត្រូវបានចោទប្រកាន់មួយគ្រឿងនៅក្នុងតំបន់ទទួលខុសត្រូវនៃបញ្ជាការខាងត្បូងរបស់សហរដ្ឋអាមេរិកនៅឆ្នេរសមុទ្រវេណេហ្ស៊ុយអេឡា ដែលបណ្តាលឱ្យមានក្រុមភេរវករគ្រឿងញៀនចំនួន ០៤នាក់បានស្លាប់។

សេចក្តីថ្លែងការណ៍មួយបាននិយាយថា «រដ្ឋមន្ត្រីទាំងពីរបានសម្តែងការព្រួយបារម្ភយ៉ាងខ្លាំងចំពោះសកម្មភាពកាន់តែខ្លាំងឡើងរបស់ទីក្រុងវ៉ាស៊ីនតោននៅក្នុងសមុទ្រការីបបៀន ដែលពោរពេញដោយផលវិបាកដ៏ធំធេងសម្រាប់តំបន់ទាំងមូល»។

ក្រសួងការបរទេសរុស្ស៊ីបាននិយាយថា ប្រទេសរុស្ស៊ីថ្កោលទោសយ៉ាងខ្លាំងចំពោះការវាយប្រហារដែលធ្វើឡើងដោយយោធាអាម៉េរិកកាលពីថ្ងៃទី០៣ ខែតុលា ប្រឆាំងនឹងនាវានៅក្នុងដែនទឹកអន្តរជាតិពីឆ្នេរសមុទ្ររបស់វេណេហ្ស៊ុយអេឡា៕

ដោយ៖ យា ចិន្តាខន្តី (ប្រភព៖ ស្ពុតនីក)