AKP ភ្នំពេញ ថ្ងៃទី០៧ ខែតុលា ឆ្នាំ២០២៥ -- នាយករដ្ឋមន្ត្រីបារាំង លោកសេបាស្ទៀន ឡឺកូនូ (Sebastien Lecornu) បានដាក់ពាក្យលាលែងពីតំណែងទៅកាន់លោកប្រធានាធិបតី អេមម៉ានុយអ៊ែល ម៉ាក្រុន (Emmanuel Macron) កាលពីថ្ងៃចន្ទ ចំពេលដែលមានការរិះគន់កាន់តែខ្លាំងឡើងទៅលើគណៈរដ្ឋមន្ត្រីដែលបានប្រកាសនាពេលថ្មីៗនេះ ហើយលោក ម៉ាក្រុន បានទទួលយកការលាលែងពីតំណែងរបស់លោក ឡឺកូនូ។

ការលាលែងពីតំណែងរបស់លោក ឡឺកូនូ បានកើតឡើងភ្លាមៗបន្ទាប់ពីលោកបានបង្ហាញពីរដ្ឋាភិបាលថ្មីដែលមានឈ្មោះភាគច្រើនដូចគ្នានឹងរដ្ឋាភិបាលដែលបានដួលរលំកាលពីថ្ងៃទី០៨ ខែកញ្ញា ឆ្នាំ២០២៥ កន្លងមក។

គណៈរដ្ឋមន្រ្តីថ្មី​របស់​លោក​បាន​ចាប់​ផ្តើម​ទទួលបាន​ការ​រិះគន់​ភ្លាមៗ​ពី​គណបក្ស​ប្រឆាំង។

មេដឹកនាំគណបក្សស្តាំនិយមជ្រុល លោកស្រី ម៉ារីន ឡឺ ប៉ង់ (Marine Le Pen) បាននិយាយតាមរយៈប្រព័ន្ធផ្សព្វផ្សាយសង្គមអ៊ិច (X) របស់សហរដ្ឋអាមេរិកថា «ជម្រើសក្នុងការរក្សារដ្ឋាភិបាលចាស់នៅដដែល គឺជារឿងគួរឱ្យសោកស្តាយ»។

មេដឹកនាំគណបក្សបៃតង លោកស្រី ម៉ារីន តុនដឺលីញ៉ែរ (Marine Tondelier) បានកត់សម្គាល់ថា «ការមើលងាយលទ្ធិប្រជាធិបតេយ្យរបស់អ្នកគាំទ្រលោក ម៉ាក្រុន ឈានដល់កម្រិតថ្មីមួយ» ដោយលោកបានរិះគន់ចំពោះការវិលត្រឡប់មកកាន់រដ្ឋាភិបាលថ្មីនេះរបស់លោក ប្រ៊ុយណូ ឡឈ ម៉ែរ (Bruno Le Maire)។

មេដឹកនាំគណបក្សក្រុមសង្គមនិយម លោក បូរីស វ៉ាល់ឡូដ (Boris Vallaud) ក៏បាននិយាយផងដែរថា «ភាពល្ងង់ខ្លៅរបស់អ្នកគាំទ្រលោក ម៉ាក្រុន ធ្វើឱ្យប្រទេសកាន់តែធ្លាក់ជ្រៅទៅក្នុងភាពវឹកវរជារៀងរាល់ថ្ងៃ»។

ទន្ទឹមនឹងនេះដែរ រដ្ឋមន្ត្រីក្រសួងមហាផ្ទៃ លោ ប្រ៊ុយណូ រេធែល័រ (Bruno Retailleau) បានប្រកាសថា លោកបានកោះប្រជុំគណៈកម្មាធិការយុទ្ធសាស្ត្រនៃគណបក្សសាធារណរដ្ឋកាលពីថ្ងៃចន្ទ បន្ទាប់ពីស្ថានភាពនយោបាយត្រូវបានបង្កើតឡើងជាមួយនឹងសេចក្តីប្រកាសថ្មី។

លោកបានសរសេរនៅលើបណ្តាញសង្គមអ៊ិចថា «សមាសភាព​រដ្ឋាភិបាលថ្មី​មិនបាន​ឆ្លុះ​បញ្ចាំង​ពី​ការមិនបានគោរពការ​សន្យានោះទេ»។

នៅក្រោមគណៈរដ្ឋមន្ត្រីថ្មីនេះ លោក រ៉ូឡង់ ឡេសគ័រ (Roland Lescure) សមាជិកនៃគណបក្សរបស់លោក ម៉ាក្រុន និងជាអតីតរដ្ឋមន្ត្រីក្រសួងឧស្សាហកម្ម បានជំនួសលោក អេរីក ឡុមបាដ (Eric Lombard)សម្រាប់មុខតំណែងជារដ្ឋមន្ត្រីក្រសួងហិរញ្ញវត្ថុ។

អតីតរដ្ឋមន្ត្រីក្រសួងហិរញ្ញវត្ថុ លោក ប្រ៊ុយណូ ឡឺ ម៉ែរ បានត្រលប់មកកាន់រដ្ឋាភិបាលថ្មីនេះវិញ ដោយចូលកាន់តំណែងនៅក្នុងក្រសួងការពារជាតិ ដែលពីមុនដឹកនាំដោយលោក ឡឺកូនូ។

លោក ឡឺកូនូ ត្រូវបានតែងតាំងជានាយករដ្ឋមន្ត្រី បន្ទាប់ពីលោកហ្រ្វង់ស័រ បាយរូ (Francois Bayrou) ដែលបានបាត់បង់ការបោះឆ្នោតផ្តល់សេចក្តីទុកចិត្តនៅក្នុងរដ្ឋសភាកាលពីថ្ងៃទី០៨ ខែកញ្ញា ឆ្នា២០២៥។

លោក បាយរូ ដែលបានបង្ហាញពីក្របខណ្ឌថវិកាឆ្នាំ២០២៦ កាលពីក្នុងខែកក្កដា កំពុងស្វែងរកការគាំទ្រសម្រាប់ផែនការសន្សំប្រាក់ប្រមាណជិត៤៤ពាន់លានអឺរ៉ូ (៥១ពាន់លានដុល្លារអាម៉េរិក) ដែលជាផ្នែកមួយនៃកិច្ចខិតខំប្រឹងប្រែងដើម្បីកាត់បន្ថយបំណុលសាធារណៈរបស់ប្រទេសបារាំងដែលមានការកើនឡើងដល់ ១១៥% នៃផលិតផលក្នុងស្រុកសរុប (GDP) របស់ខ្លួន។

ប្រទេស​បារាំង​មាន​ឱនភាព​ថវិកា​ធំ​បំផុត​មួយ​នៅក្នុង​សហភាព​អឺរ៉ុប ​ដែល​មាន​ចំនួន ៥,៨% នៃ GDP។

កិច្ច​ចរចា​ថវិកា​ជា​ប្រភព​ដ៏​សំខាន់​នៃ​ភាព​តានតឹង​ក្នុង​នយោបាយ​បារាំង។

ការបរាជ័យក្នុងការឈានដល់កិច្ចព្រមព្រៀង ស្តីពីថវិកាឆ្នាំ២០២៥កាលពីឆ្នាំមុន ក៏បាននាំទៅដល់ការដួលរលំនៃរដ្ឋាភិបាលរបស់លោក មីឈែល បានីញ៉ែរ (Michel Barnier) កាលពីក្នុងខែធ្នូផងដែរ បន្ទាប់ពីគណបក្សឆ្វេងនិយម និងស្តាំនិយមបានរួបរួមគ្នានៅពីក្រោយចលនាមួយ៕

ដោយ៖ យា ចិន្តាខន្តី (ប្រភព៖ AA-AKP)