AKP ភ្នំពេញ ថ្ងៃទី០៧ ខែតុលា ឆ្នាំ២០២៥ -- ប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) បាននិយាយកាលពីចុងសប្តាហ៍មុនថា កិច្ចចរចាដែលកំពុងបន្តជាមួយក្រុមហាម៉ាស់ជុំវិញសំណើបទឈប់បាញ់នៅតំបន់ហ្គាហ្សារបស់លោក បាននិងកំពុងដំណើរការយ៉ាងឆាប់រហ័ស មុនពេលកិច្ចប្រជុំដ៏សំខាន់មួយនៅក្នុងប្រទេសអេហ្ស៊ីប។

លោក ត្រាំ បានសរសេរនៅលើវេទិកាសង្គម Truth Social ថា «មានកិច្ចពិភាក្សាជាវិជ្ជមានយ៉ាងខ្លាំងជាមួយក្រុមហាម៉ាស់ និងប្រទេសមកពីជុំវិញពិភពលោក (អារ៉ាប់ មូស្លីម និងអ្នកគ្រប់រូបផ្សេងទៀត) នៅចុងសប្តាហ៍នេះ ដើម្បីដោះលែងចំណាប់ខ្មាំង បញ្ចប់សង្រ្គាមនៅតំបន់ហ្គាហ្សាប៉ុន្តែសំខាន់ជាងនេះទៅទៀត ទីបំផុតបានស្វែងរកសន្តិភាពដែលចង់បានជាយូរមកហើយនៅមជ្ឈិមបូព៌ា»។

លោកបានបន្ថែមថា «កិច្ចពិភាក្សាទាំងនេះទទួលបានជោគជ័យយ៉ាងខ្លាំង ហើយមានដំណើរការយ៉ាងឆាប់រហ័ស។ ក្រុមបច្ចេកទេសនឹងជួបប្រជុំគ្នាម្តងទៀតនៅក្នុងប្រទេសអេហ្ស៊ីប ដើម្បីធ្វើការឆ្លងកាត់ និងបញ្ជាក់ពីព័ត៌មានលម្អិតចុងក្រោយ។ ខ្ញុំត្រូវបានគេប្រាប់ថា ដំណាក់កាលទីមួយគួរតែបញ្ចប់នៅក្នុងសប្តាហ៍នេះ ហើយខ្ញុំកំពុងស្នើឱ្យអ្នកគ្រប់គ្នាដំណើរការវាឱ្យលឿន»។

កាលពីថ្ងៃអាទិត្យ ក្រុមហាម៉ាស់បានប្រកាសថា គណៈប្រតិភូរបស់ខ្លួនដែលដឹកនាំដោយលោក ខាលីល អាល់-ហាយយ៉ា (Khalil al-Hayya)បានទៅដល់ប្រទេសអេហ្ស៊ីបដើម្បីចាប់ផ្តើមកិច្ចពិភាក្សាអំពីយន្តការសម្រាប់បទឈប់បាញ់ ការដកកងកម្លាំងអ៊ីស្រាអែល និងការដោះដូរអ្នកទោស។

វាមិនបានបញ្ជាក់អំពីរយៈពេលនៃដំណើរទស្សនកិច្ច ឬព័ត៌មានលម្អិតនៃរបៀបវារៈនៃកិច្ចពិភាក្សានោះទេ ប៉ុន្តែជុំថ្មីនៃកិច្ចចរចាកើតឡើងចំពេលដែលកិច្ចខិតខំប្រឹងប្រែងក្នុងតំបន់ និងអន្តរជាតិកាន់តែខ្លាំងឡើងដើម្បីបញ្ចប់សង្គ្រាមអ៊ីស្រាអែលដែលរយៈពេលជិតពីរឆ្នាំនៅហ្គាហ្សា។

គួររំលឹកថា កាលពីថ្ងៃទី២៩ ខែកញ្ញា ឆ្នាំ២០២៥ លោក ត្រាំ បានបង្ហាញផែនការ ២០ចំណុច ដែលរួមមានការដោះលែងជនជាតិអ៊ីស្រាអែលទាំងអស់ជាថ្នូរនឹងអ្នកទោសប៉ាឡេស្ទីន បទឈប់បាញ់ ការរំសាយអាវុធរបស់ក្រុមហាម៉ាស់ និងការកសាងតំបន់ហ្គាហ្សាឡើងវិញ៕

ដោយ៖ យា ចិន្តាខន្តី (ប្រភព៖ AA-AKP)