AKP ភ្នំពេញ ថ្ងៃទី០៣ ខែតុលា ឆ្នាំ២០២៥ -- ទីក្រុងម៉ូស្គូ និងទីក្រុងវ៉ាស៊ីនតោន រក្សាទំនាក់ទំនងនៅកម្រិតរដ្ឋបាល ប៉ុន្តែប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) មិនទាន់មានប្រតិកម្មចំពោះសំណើរបស់មេដឹកនាំរុស្ស៊ី លោក វ្ល៉ាឌីមៀ ពូទីន (Vladimir Putin)ក្នុងការរក្សាការរឹតបន្តឹងដែលមានចែងនៅក្នុងសន្ធិសញ្ញាកាត់បន្ថយអាវុធយុទ្ធសាស្ត្រថ្មី (New START)។ នេះបើយោងតាមអ្នកនាំពាក្យវិមានក្រឹមឡាំង លោក ឌីមីទ្រី ប៉េសកូវ (Dmitry Peskov) បានប្រាប់អ្នកសារព័ត៌មាន។

លោក​បាន​បន្ត​ថា​ «តាម​ការពិត ការ​ទំនាក់​ទំនង​កំពុង​បន្ត ប៉ុន្តែ​មិន​ទាន់​មាន​ការ​ឆ្លើយ​តប​នៅ​ឡើយ​ទេ [ចំពោះ​សំណើ New START]»។

លោក ប៉េសកូវ បាន​បញ្ជាក់​ថា ​កិច្ច​ពិភាក្សា​កំពុង​ដំណើរការ​ជា​ទូទៅនិងមាន​បណ្តាញ​សម្រាប់​កិច្ច​សន្ទនា ដែល​នៅ​តែ​បើក​ចំហ។

លោក ពូទីន បានប្រកាសនៅក្នុងកិច្ចប្រជុំក្រុមប្រឹក្សាសន្តិសុខរុស្ស៊ីកាលពីថ្ងៃទី២២ ខែកញ្ញា ឆ្នាំ២០២៥ ថា ទីក្រុងម៉ូស្គូបានត្រៀមខ្លួនរួចជាស្រេចដើម្បីរក្សាការអនុលោមតាមកម្រិតបរិមាណដែលបានផ្តល់ឱ្យនៅក្នុងសន្ធិសញ្ញាសម្រាប់រយៈពេលមួយឆ្នាំទៀត បន្ទាប់ពីឯកសារផុតកំណត់នៅខែកុម្ភៈឆ្នាំក្រោយ។ ទោះជា​យ៉ាង​ណា លោក​បាន​សង្កត់​ធ្ងន់​ថាវិធានការ​នេះ​នឹង​មាន​សុពលភាព​លុះត្រា​តែទី​ក្រុង​វ៉ាស៊ីនតោន​ធ្វើ​ដូច​គ្នា។

អនុរដ្ឋមន្ត្រីការបរទេសរុស្ស៊ី លោក ស៊ែរហ្គេយ រីយ៉ាបកូវ (Sergey Ryabkov) បានប្រាប់ សារព័ត៌មានតាសស៍ (TASS) ថា ទីក្រុងម៉ូស្គូនៅតែរង់ចាំការឆ្លើយតបពីប្រធានាធិបតីអាម៉េរិក លោក ដូណាល់ ត្រាំ។ មន្ត្រីសេតវិមានបាននិយាយថា មេដឹកនាំអាម៉េរិកនឹងធ្វើសេចក្តីថ្លែងការណ៍អំពីបញ្ហានេះ ប៉ុន្តែរឿងនេះនៅមិនទាន់កើតឡើងនៅឡើយទេ៕

ដោយ៖ យា ចិន្តាខន្តី (ប្រភព៖ តាសស៍)