AKP ភ្នំពេញ ថ្ងៃទី០២ ខែតុលា ឆ្នាំ២០២៥-- ក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញ នាព្រឹកថ្ងៃទី០២ ខែតុលា ឆ្នាំ២០២៥នេះ ប្រជាពលរដ្ឋរស់នៅខណ្ឌបឹងកេងកង ភាគច្រើនលើកឡើងពាក់ព័ន្ធនឹងវិស័យសាធារណការ ដើម្បីឱ្យអាជ្ញាធររាជធានីភ្នំពេញជួយ ពិសេសគឺការសុំជួយដាក់បង្គោលភ្លើង អំពូល ការស្តារលូនិងដាក់បណ្តាញលូថ្មីជាដើម ដោយវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញនេះ ត្រូវបានធ្វើឡើងនៅសាកលវិទ្យាល័យប៊ែលធីអន្តរជាតិ ស្ថិតក្នុងសង្កាត់បឹងកេងកងទី៣ ខណ្ឌបឹងកេងកង ក្រោមអធិបតី ឯកឧត្ដម  ជូប ខុន សមាជិកក្រុមប្រឹក្សារាជធានីភ្នំពេញ តំណាងឯកឧត្ដម ម៉ប់ សារិន ប្រធានក្រុមប្រឹក្សារាជធានីភ្នំពេញ និងឯកឧត្ដម ហួត ហៃ  អភិបាលរងរាជធានីភ្នំពេញ និងជាតំណាង ឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ។

ឯកឧត្ដម ហួត ហៃ  អភិបាលរងរាជធានីភ្នំពេញ បានបញ្ជាក់ថា វេទិកាផ្សព្វផ្សាយ និងពិគ្រោះយោបល់នេះ មានសំណើ និងសំណូមពរផ្ទាល់មាត់ចំនួន៨នាក់ និងសំណើជាលាយលក្ខណ៍អក្សចំនួន២០ បញ្ហា ដោយមានប្រជាពលរដ្ឋចូលរួមប្រមាណ៤១៦នាក់។ បញ្ហាដែលពលរដ្ឋលើកឡើងក្នុងវេទិកាខាងលើនេះ ភាគច្រើនពាក់ព័ន្ធ នឹងវិស័យសាធារ ណការ ដូចជាសុំជួយដាក់បង្គោលភ្លើង អំពូលភ្លើងសាធារ ណៈ ការស្តារលូនិងដាក់បណ្តាញលូថ្មីជាដើម ជាមួយនិងការសុំមានវិធានការជុំវិញ ម៉ូតូ ដឹកទំនិញនិងម្ហូបអាហារតាមអនឡាញ បានបើកបរលឿន ជ្រែគេឯង និងមើលទូរស័ព្ទពេលបើកបរ ធ្វើឱ្យគ្រោះថ្នាក់ចរាចរដ៏អ្នកដទៃ។ ចំពោះការស្នើឡើងរបស់ប្រជាពលរដ្ឋ អាជ្ញាធររាជធានីនឹងពន្លឿនការដោះស្រាយបញ្ហាទាំងអស់នេះ ដើម្បីឆ្លើយតបទៅនឹងសំណើរនិងសំណូមពរដែលជាការលើកឡើងរបស់ប្រជាពលរដ្ឋ។ ចំពោះបញ្ហា មិនទាន់ដោះស្រាយបាន រដ្ឋបាលរាជធានីភ្នំពេញនឹងបន្តពិភាក្សាជាមួយគ្រប់ស្ថាប័នពាក់ព័ន្ធ ដើម្បីពន្លឿនការដោះស្រាយជួនប្រជាពលរដ្ឋឱ្យបានទាន់ពេលវេលា។

ឯកឧត្ដម ហួត ហៃ បញ្ជាក់ថា វេទិកានេះបានរកឃើញនូវបញ្ហាសំខាន់ៗជាអាទិភាព សម្រាប់ឱ្យរដ្ឋបាលរាជធានីភ្នំពេញ យកទៅធ្វើការពិចារណា កែលម្អ ក្នុងការអនុវត្តសកម្មភាពរបស់ខ្លួន ដើម្បីលើកកម្ពស់គុណភាព នៃជីវភាពរស់នៅរបស់ប្រជាពលរដ្ឋ ក្នុងរាជធានីភ្នំពេញ។ ការចូលរួមផ្តល់មតិយោបល់ និងការលើកឡើងនូវសំណើ និងសំណូមពររបស់ប្រជាពលរដ្ឋ គឺពិតជាបាននាំមកនូវសក្តានុពលដ៏ធំធេង និងធ្វើឱ្យរដ្ឋបាលរាជធានីភ្នំពេញ អាចឆ្លុះប ញ្ចាំងបាននូវចំណុចខ្វះខាត ចំណុចអសកម្ម ដែលបានអនុវត្តកន្លងមក និងអាចឱ្យគណៈអភិបាលរាជធានីភ្នំពេញ យកទៅពិចារណាធ្វើការកែលម្អឡើងវិញ ឱ្យបានសមស្របតាមសេចក្តីត្រូវការរបស់ប្រជាពលរដ្ឋក្នុងមូលដ្ឋាននីមួយៗ។

លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានឱ្យដឹងថា ចំពោះសុំជួយដាក់បង្គោលភ្លើង អំពូលភ្លើងសាធារណៈ ការស្តារលូ និងដាក់បណ្តាញលូថ្មី មន្ទីរនិងអនុវត្តភ្លាមៗ តែចំពោះគម្រោងសុំធ្វើលូថ្មីនៅផ្លូវ៣៩២ នៅផ្សារបឹងកេងកង មន្ទីរនឹងសុំគោលការ ណ៍ទៅអភិបាលរាជធានីភ្នំពេញ ដើម្បីដោះស្រាយឱ្យទាន់ពេលផងដែរ។ ដោយឡែកចំពោះការស្នើសុំមានវិធានការជុំវិញ ម៉ូតូ ដឹកទំនិញ ម្ហូបអាហារតាមអនឡាញ បើកបរលឿនជ្រែគេឯងនោះ ត្រូវ បានលោកអធិការនរគបាលខណ្ឌបឹងកេងកង បញ្ជាក់ថា នៅក្នុងខណ្ឌបឹងកេងកងមានក្រុមហ៊ុនដឹកជញ្ជូនបែបនេះ ២ក្រុមហ៊ុន យើងធ្លាប់បានណែនាំពួកគាត់ហើយ ធ្វើយ៉ាងណា កុំតែដើម្បីផលប្រយោជន៍ខ្លួនឯងធ្វើឱ្យប៉ះពាល់អ្នកដទៃ។

ឯកឧត្ដម ជួប ខុន សមាជិកក្រុមប្រឹក្សារាជធានីភ្នំពេញ បានបញ្ជាក់ថា វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញ ដោយផ្តោត សំខាន់ពាក់ព័ន្ធ និងកង្វល់ផ្ទាល់របស់ប្រជាពលរដ្ឋលើបញ្ហាសន្តិសុខ សណ្តាប់ ធ្នាប់ បញ្ហាបរិស្ថាន និងបញ្ហាអភិវឌ្ឍន៍នៅមូលដ្ឋាន ដើម្បីឱ្យអាជ្ញាធរបានដឹងឮ និងរកយន្ត ការដោះស្រាយជូន។ វេទិកាផ្សព្វផ្សាយ នាថ្ងៃនេះ ផ្តល់ជូនដល់ប្រជា ពលរដ្ឋ ក្នុងការចូលរួមដំណើរការអភិបាលកិច្ចល្អ និងជាឧបករណ៍មួយ សម្រាប់លើកកម្ពស់ គណនេយ្យភាព តម្លាភាព ក្នុងដំណើរការពិនិត្យមើល លើការផ្តល់សេវាសាធារណៈ របស់រដ្ឋបាលរាជធានីភ្នំពេញ រដ្ឋបាលខណ្ឌ រដ្ឋបាលសង្កាត់ ក្នុងគោលបំណង ដើម្បីធានាថា រាល់បញ្ហាអាទិភាពរបស់ប្រជាពលរដ្ឋក្នុងមូលដ្ឋាន ត្រូវបានពិនិត្យ ដោះស្រាយ និងឆ្លើយតប៕

ដោយ សួស សំរិត