AKP ភ្នំពេញ ថ្ងៃទី០២ ខែតុលា ឆ្នាំ២០២៥ -- ទីភ្នាក់ងារសារព័ត៌មានរដ្ឋកូរ៉េខាងជើង (KCNA) បានរាយការណ៍កាលពីថ្ងៃពុធថា មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានអះអាងសារជាថ្មីពីការត្រៀមខ្លួនរបស់ទីក្រុងព្យុងយ៉ាងក្នុងការពង្រឹងការយល់ដឹងពីគ្នាទៅវិញទៅមកជាយុទ្ធសាស្រ្តជាមួយទីក្រុងប៉េកាំង និងបន្តអភិវឌ្ឍន៍ទំនាក់ទំនងមិត្តភាព បើទោះបីជាមានការផ្លាស់ប្តូរនៅក្នុងស្ថានភាពអន្តរជាតិក៏ដោយ ។

សារព័ត៌មាន KCNA រាយការណ៍ថា លោក គីម បានផ្ញើសារអបអរសាទរទៅកាន់ប្រធានាធិបតីចិន លោក ស៊ី ជីនពីង (Xi Jinping) ក្នុងឱកាសខួបលើកទី៧៦ នៃការបង្កើតសាធារណរដ្ឋប្រជាមានិតចិន។ សារនោះបានគូសបញ្ជាក់ថា ចំណងមិត្តភាពប្រពៃណីដែលបង្កើតដោយមនុស្សជំនាន់មុនបន្តកាន់តែរឹងមាំតាមរយៈការតស៊ូរួមគ្នាដើម្បីសង្គមនិយម។

លោក គីម ក៏​បាន​ជូនពរ​ដល់​ប្រទេស​ចិន​នូវ​ភាព​ចម្រុងចម្រើន និង​សុភមង្គល​ដល់​ប្រជាជន​ចិនផងដែរ។

សារនេះបានបង្ហាញពីឆន្ទៈរបស់កូរ៉េខាងជើងក្នុងកិច្ចខិតខំប្រឹងប្រែងរួមគ្នាជាមួយប្រទេសចិន ដើម្បីពង្រឹង និងអភិវឌ្ឍន៍ទំនាក់ទំនងមិត្តភាពព្រមទាំងកិច្ចសហប្រតិបត្តិការ និងការពារសន្តិភាព និងស្ថិរភាពក្នុងតំបន់ និងពិភពលោក តាមរយៈការទំនាក់ទំនង និងកិច្ចសហប្រតិបត្តិការជាយុទ្ធសាស្ត្រយ៉ាងជិតស្និទ្ធ៕

ដោយ៖ យា ចិន្តាខន្តី (ប្រភព៖ ស្ពុតនីក)