AKP ភ្នំពេញ ថ្ងៃទី០២ ខែតុលា ឆ្នាំ២០២៥--មន្ត្រីជំនាញសហព័ន្ធកីឡាទ្រីយ៉ាត្លុងកម្ពុជាបានចាត់ទុកថា វគ្គសាមគ្គីអូឡាំពិកស្ដីពីគ្រូបង្វឹកកីឡាទ្រីយ៉ាត្លុងកម្រិត១ គឺជាការពង្រីកសក្តានុពលប្រភេទកីឡាអូឡាំពិកមួយនេះរបស់កម្ពុជាឱ្យដើរទាន់បច្ចុប្បន្នភាពនៃការអភិវឌ្ឍរបស់ពិភពលោក។

នេះជាការលើកឡើងរបស់លោក ងិន សុខបញ្ញា អគ្គលេខាធិការ សហព័ន្ធកីឡាទ្រីយ៉ាត្លុងកម្ពុជា។ អគ្គលេខាធិការគូសបញ្ជាក់ថា ដោយទទួលបានការឧបត្ថម្ភគាំទ្រពីអង្គការសាមគ្គីអូឡាំពិក និងមានការសម្របសម្រួលពីគណៈកម្មាធិការជាតិអូឡាំពិកកម្ពុជា-NOCC សហព័ន្ធកីឡាទ្រីយ៉ាត្លុងកម្ពុជាបានរៀបចំវគ្គសាមគ្គីអូឡាំពិក ស្ដីពីគ្រូបង្វឹកកីឡាទ្រីយ៉ាត្លុងកម្រិត១ ដែលមានសិក្ខាកាមចូលរួម ២៥នាក់ នៅទីស្នាក់ការ NOCC ដោយមានការចូលរួមបង្រៀន និងចែករំលែកចំណេះដឹងផ្ទាល់ពីជំនាញការអន្ដរជាតិ មកពីសហព័ន្ធកីឡាទ្រីយ៉ាត្លុងពិភពលោក។

លោក ងិន សុខបញ្ញា អគ្គលេខាធិការសហព័ន្ធកីឡាទ្រីយ៉ាត្លុងកម្ពុជា បានឱ្យដឹងថា វគ្គបណ្ដុះបណ្ដាលគ្រូបង្វឹកកម្រិត១ នេះ មានរយៈពេល ៥ថ្ងៃ ចាប់ពីថ្ងៃទី០១-០៥ ខែតុលា ឆ្នាំ២០២៥។ ក្នុងចំណោមសិក្ខាកាម ២៥នាក់ ក៏មានសិក្ខាកាមជាគ្រូបង្វឹកមកពីសហព័ន្ធកីឡាទ្រីយ៉ាត្លុងវៀតណាម ដែលជាដៃគូអភិវឌ្ឍន៍ចូលរួមរៀនវគ្គនេះចំនួន ៥នាក់ផងដែរ។ រីឯគ្រូឧទ្ទេស គឺជាជំនាញការមកពីសហព័ន្ធកីឡាទ្រីយ៉ាត្លុងពិភពលោកផ្ទាល់ រួមមានលោក Lozada Antony ជនជាតិហ្វីលីពីន និងលោកស្រី Pham Thuy Vi ជនជាតិវៀតណាម។

លោកអគ្គលេខាធិការបន្ដថា វគ្គនេះពិតជាមានសារៈសំខាន់ និងខុសប្លែកពីវគ្គមុនៗ ពីព្រោះថាវគ្គនេះមានគ្រូឧទ្ទេសកម្រិតអន្ដរជាតិមកបង្រៀនដោយផ្ទាល់ ដែលជាឱកាសសម្រាប់សិក្ខាកាមគ្រប់រូបសិក្សារៀនសូត្រនូវចំណេះដឹងថ្មីៗអំពីក្បួនច្បាប់អន្ដរជាតិ សម្រាប់ធ្វើជាទុន ក្នុងការរួមចំណែកបណ្ដុះបណ្ដាលធនធានមនុស្សឆ្ពោះទៅរកការអភិវឌ្ឍ និងពង្រីកសក្ដានុពលកីឡាទ្រីយ៉ាត្លុងក្នុងប្រទេសកម្ពុជា ពិសេសគឺការបណ្ដុះបណ្ដាលធនធានកីឡាករ-កីឡាការិនីវ័យក្មេង សម្រាប់ត្រៀមឆ្ពោះទៅធ្វើម្ចាស់ផ្ទះ ការប្រកួតកីឡាយុវជនអាស៊ី ឆ្នាំ២០២៩ ដែលជាប្រវត្តិសាស្ត្រដំបូងរបស់ព្រះរាជាណាចក្រកម្ពុជា៕

ដោយ ហេង ណាលីន (រូបភាព៖ NOCC)