AKP ភ្នំពេញ ថ្ងៃទី០១ ខែតុលា ឆ្នាំ២០២៥ -- ក្រុមប្រឹក្សាសហភាពអឺរ៉ុបកាលពីថ្ងៃចន្ទបានប្រកាសថា ខ្លួនកំពុងដាក់ទណ្ឌកម្មលើប្រទេសអ៊ីរ៉ង់ដោយលើកឡើងពីការបរាជ័យរបស់ទីក្រុងតេអេរ៉ង់ក្នុងការអនុវត្តតាមការប្តេជ្ញាចិត្តនុយក្លេអ៊ែររបស់ខ្លួនក្រោមផែនការសកម្មភាពដ៏ទូលំទូលាយរួមឆ្នាំ២០១៥(JCPOA) ។

ទណ្ឌកម្មនេះគ្របដណ្តប់លើការហាមឃាត់ការធ្វើដំណើរ ការបង្កកទ្រព្យសម្បត្តិ និងការរឹតបន្តឹងលើពាណិជ្ជកម្ម ហិរញ្ញវត្ថុ និងការដឹកជញ្ជូន។ពួកគេក៏រួមបញ្ចូលការហាមឃាត់លើការនាំចូលប្រេង ឧស្ម័ន និងគីមីឥន្ធនៈរបស់ប្រទេសអ៊ីរ៉ង់ ការផ្គត់ផ្គង់ឧបករណ៍ផ្នែកថាមពល និងលោហៈមានតម្លៃក៏ដូចជាដែនកំណត់លើធនាគារអ៊ីរ៉ង់ និងជើងហោះហើរដឹកទំនិញ។

ចំណាត់ការរបស់សហភាពអឺរ៉ុបបានធ្វើឡើងបន្ទាប់ពីការត្រលប់មកវិញនៃទណ្ឌកម្មរបស់អង្គការសហប្រជាជាតិ បន្ទាប់ពីចក្រភពអង់គ្លេស បារាំង និងអាល្លឺម៉ង់ (E3) បង្កឱ្យមានយន្តការ «snapback» នៃកិច្ចព្រមព្រៀងកាលពីថ្ងៃទី២៨ ខែសីហា។ នៅក្រោមនីតិវិធីនេះ លុះត្រាតែក្រុមប្រឹក្សាសន្តិសុខអង្គការសហប្រជាជាតិបោះឆ្នោតដើម្បីបន្តការបន្ធូរបន្ថយទណ្ឌកម្មមុនឆ្នាំ២០១៥ នៃការរឹតបន្តឹងរបស់អង្គការសហប្រជាជាតិនឹងបន្តដោយស្វ័យប្រវត្តិក្នុងរយៈពេល ៣០ថ្ងៃ៕

ក្រុមប្រឹក្សាសន្តិសុខអង្គការសហប្រជាជាតិបានបរាជ័យកាលពីថ្ងៃសុក្រក្នុងការអនុម័តដំណោះស្រាយដែលស្វែងរកការបន្តរយៈពេល ៦ខែសម្រាប់កិច្ចព្រមព្រៀងនុយក្លេអ៊ែររវាងប្រទេសអ៊ីរ៉ង់ និងប្រទេសសំខាន់ៗចំនួន ៦ គឺចក្រភពអង់គ្លេស ចិន បារាំង អាល្លឺម៉ង់ រុស្ស៊ី និងសហរដ្ឋអាមេរិក ព្រមទាំងដំណោះស្រាយក្រុមប្រឹក្សាសន្តិសុខលេខ២២៣១ ដែលគាំទ្រកិច្ចព្រមព្រៀងនេះ។

ជាការឆ្លើយតប រដ្ឋមន្ត្រីការបរទេសអ៊ីរ៉ង់ លោក សេយេដ អាប់បាស់ អារ៉ាហ្គជី (Seyed Abbas Araghchi) បាននិយាយកាលពីថ្ងៃអាទិត្យថា យន្ដការ snapback ដែលហៅដោយ E3 និងសហរដ្ឋអាមេរិកគឺ «ទុកជាមោឃៈ»ដោយលោកបានលើកឡើងពីការដកខ្លួនរបស់ទីក្រុងវ៉ាស៊ីនតោនចេញពីផែនការ JCPOA នៅក្នុងឆ្នាំ២០១៨ និងការខកខានរបស់ប្រទេសអឺរ៉ុបក្នុងការបំពេញកាតព្វកិច្ចរបស់ពួកគេក្រោមកិច្ចព្រមព្រៀងនេះ។

លោកបានសង្កត់ធ្ងន់ថា ប្រទេសអ៊ីរ៉ង់នឹងបន្តការពារសិទ្ធិអធិបតេយ្យភាព និងផលប្រយោជន៍ស្របច្បាប់របស់ខ្លួន ហើយនៅតែបើកចំហចំពោះ«ការចរចាពិតប្រាកដនៅលើភាពស្មើគ្នា»៕

ដោយ៖ មូល មិនា (ប្រភព៖ ភីបផលដេលី)