AKP ភ្នំពេញ ថ្ងៃទី០១ ខែតុលា ឆ្នាំ២០២៦--ក្រុមខេត្តបន្ទាយមានជ័យ និងក្រុមឈើតុំខេត្តពោធិ៍សាត់បានចែកគ្នាម្នាក់១ពិន្ទុ ក្រោយរក្សាលទ្ធផលស្មើគ្នា ០-០ ខណៈក្រុមបាត់ដំបងយូណៃធីតប្រជែងបាន៣ពិន្ទុពីក្រុមមន្ទីរអប់រំ យុវជន និងកីឡាខេត្តកំពង់ឆ្នាំង ដោយលទ្ធផល ៣-០ ក្នុងការប្រកួតសន្សំពិន្ទុក្នុងពូល-ឃ ជុំទី២ កាលពីល្ងាចថ្ងៃទី៣០ ខែកញ្ញា ឆ្នាំ២០២៥នៃពានរង្វាន់សម្តេចតេជោ ហ៊ុន សែន ថ្នាក់ខេត្ត រដូវកាល ២០២៥-២០២៦។

ជាមួយនឹងការស្វែងរកបាន១ពិន្ទុបន្ថែមនេះបានធ្វើឱ្យក្រុមខេត្តបន្ទាយមានជ័យបន្តរក្សាតំណែងលើកំពូលតារាងដដែល ក្រោយឆ្លងកាត់៥ប្រកួត ឈ្នះ២ ស្មើ៣ មាន៩ពិន្ទុ ខណៈ៥ប្រកួតរបស់ក្រុមឈើតុំខេត្តពោធិ៍សាត់ ឈ្នះ២ ស្មើ៣ មាន៨ពិន្ទុដែរ ឈរនៅលេខ២ ក្នុងពូល-ឃ។

ចំពោះ១ប្រកួតទៀត ក្នុងពូល-ឃ នេះដែរ គឺក្រុមបាត់ដំបងយូណៃធីតប្រជែងបាន៣ពិន្ទុពីក្រុមមន្ទីរអប់រំ យុវជន និងកីឡាខេត្តកំពង់ឆ្នាំង ដោយលទ្ធផល ៣-០។ នៅវគ្គទី១ ក្រុមទាំងពីររក្សាលទ្ធផលស្មើគ្នា ០-០ ហើយនៅវគ្គទី២ ក្រុមភ្ញៀវ បាត់ដំបងយូណៃធីតរកបាន៣គ្រាប់ ដោយធ្វើសម្រេចបាន២គ្រាប់ដោយកីឡាករ គង់ រាត្រី នៅនាទី ៦០ និងនាទី៩០បូក១ និងកីឡាករ ស្រស់ សុភាព នៅនាទី៧០។ ឆ្លងកាត់៥ប្រកួត បាត់ដំបងយូណៃធីត ឈ្នះ២ ស្មើ២ និងចាញ់១ មាន៨ពិន្ទុ ឈរលេខ៣ ខណៈក្រុមមន្ទីរអប់រំខេត្តកំពង់ឆ្នាំងឆ្លងកាត់៥ប្រកួត គឺចាញ់ទាំង៥ប្រកួតតែម្តង។

គួរបញ្ជាក់ថា ការប្រកួតកីឡាបាល់ទាត់ពានរង្វាន់សម្តេចតេជោ ហ៊ុន សែន ថ្នាក់ខេត្តនេះមានក្រុមតំណាងរាជធានីខេត្តចូលរួមសរុប១៩ក្រុម ដោយចែកពី៥ពូល ដោយដំណើរសន្សំពិន្ទុរហូតដល់ខែធ្នូ ឆ្នាំ២០២៥ ដើម្បីស្វែងរកក្រុមជ័យលាភីថ្នាក់ខេត្តឡើងទៅប្រកួតនៅថ្នាក់ជាតិជាមួយក្រុមនានា ដែលកំពុងឈរជើងនៅក្នុងក្របខ័ណ្ឌលីគកំពូលកម្ពុជា ដែលមាន១១ក្រុម៕

ដោយ ហេង ណាលីន (រូបភាព៖ Hun Sen Cup)