AKP ភ្នំពេញ ថ្ងៃទី៣០ ខែកញ្ញា ឆ្នាំ២០២៥ -- ក្រុមជម្រើសជាតិបាល់ទះបុរសរបស់ប៊ុលហ្គារី បានឈ្នះមេដាយប្រាក់ក្នុងព្រឹត្តិការណ៍ប្រកួតជើងឯកពានរង្វាន់ពិភពលោកបាល់ទះបុរស FIVB ឆ្នាំ២០២៥ បន្ទាប់ពីចាញ់ក្រុមការពារជើងឯកពិភពលោក គឺក្រុមជម្រើសជាតិអ៊ីតាលី ក្នុងលទ្ធផល ១-៣ (២១-២៥, ១៧-២៥, ២៥-១៧, ១០-២៥) ក្នុងការប្រកួតវគ្គផ្តាច់ព្រ័ត្រកាលពីថ្ងៃអាទិត្យ។

វាជាការវិលត្រឡប់ជាប្រវត្តិសាស្ត្ររបស់ក្រុមជម្រើសជាតិប៊ុលហ្គារីក្នុងការចូលទៅកាន់វគ្គផ្តាច់ព្រ័ត្រនៃការប្រកួតជើងឯកពិភពលោកបាល់ទះផ្នែកបុរសបន្ទាប់ពីរយៈពេល ៥៥ឆ្នាំ។ អ៊ីតាលី​ជា​ក្រុម​មួយ​ក្នុង​ចំណោម​ក្រុម​ដែល​បានពានរង្វាន់​ច្រើន​បំផុត​ក្នុង​ប្រវត្តិសាស្ត្រ​កីឡាមួយ​នេះ។

នៅក្នុងការ​ប្រកួត​នេះ មាន​ទស្សនិកជនប្រមាណ​ជាង ​១៥.០០០​នាក់​នៅកីឡដ្ឋាន SM Mall of Asia Arena ក្នុង​ក្រុងប៉ាសាយរបស់ប្រទេស​ហ្វីលីពីន។

នៅក្នុងការប្រកួតជើងឯកពានរង្វាន់ពិភពលោកបាល់ទះបុរសនេះ ចាប់តាំងពីចាប់ផ្តើមការប្រកួតដំបូងរហូត​ដល់​វគ្គ​ផ្ដាច់ព្រ័ត្រ ក្រុមជម្រើសជាតិប៊ុលហ្គារី​មិន​ដែលចាញ់​សោះ​សម្រាប់​ការ​ប្រកួត ​៦​លើក៕

ដោយ៖ យា ចិន្តាខន្តី (ប្រភព៖ BTA)