AKP ភ្នំពេញ ថ្ងៃទី២៩ ខែកញ្ញា ឆ្នាំ២០២៥ -- អាជ្ញាធរហ្វីលីពីនបាននិយាយថា ព្យុះទីហ្វុងប៊ូឡូយ (Bualoi) បានឆក់យកជីវិតមនុស្សចំនួន ១១នាក់នៅក្នុងប្រទេសហ្វីលីពីន គិតត្រឹមព្រឹកថ្ងៃទី២៧ ខែកញ្ញា ហើយវាកំពុងវាយលុកទៅលើប្រទេសវៀតណាម។

ព្យុះនេះបានវាយលុកទៅលើកោះតូចៗនៅកណ្តាលប្រទេសហ្វីលីពីនកាលពីថ្ងៃទី២៦ ខែកញ្ញា ដោយបានបំផ្លិចបំផ្លាញដើមឈើ និងបង្គោលភ្លើងបំផ្លាញដំបូលផ្ទះ ទឹកជំនន់ និងបង្ខំឱ្យប្រជាជន ៤០០.០០០នាក់ត្រូវជម្លៀសចេញ។

ក្នុង​ចំណោម​ការ​រង​គ្រោះ​ដ៏​អាក្រក់​បំផុត​នោះ ​គឺ​កោះ​តូចប៊ីលីរ៉ាន់​(Biliran) ដែល​មានមនុស្ស ​៨​នាក់​បាន​ស្លាប់ និង​ ២​នាក់បាន​បាត់​ខ្លួន។ អ្នក​ដែល​ជម្លៀសខ្លួន​កំពុង​ចាប់​ផ្តើម​វិល​ត្រឡប់​ទៅ​ផ្ទះ​វិញបណ្តើរៗហើយ ខណៈដែល​អាកាស​ធាតុ​មាន​ភាព​ប្រសើរ​ឡើង។

ការិយាល័យការពារជនស៊ីវិលក្នុងទីក្រុងម៉ានីលបានរាយការណ៍នៅពេលមុននេះថា មានមនុស្សស្លាប់ ៣នាក់ផ្សេងទៀតនៅលើកោះម៉ាស់បាតេ (Masbate) និងកោះទីកាវ (Ticao) ដែលនៅក្បែរនោះ រួមទាំងមនុស្ស ២នាក់ទៀតដែលបានស្លាប់ដោយដើមឈើ និងជញ្ជាំងដែលត្រូវខ្យល់បក់ខ្លាំងដួលរលំលើ។

មនុស្ស ១៤នាក់នៅតែបាត់ខ្លួននៅទូទាំងភាគកណ្តាលប្រទេសហ្វីលីពីន ខណៈដែលមនុស្សជាង ២០០.០០០នាក់ស្ថិតនៅក្នុងមជ្ឈមណ្ឌលជម្លៀសខ្លួនដែលជាផ្លូវព្យុះឆ្លងកាត់។

សេវាអាកាសធាតុរដ្ឋរបស់ប្រទេសហ្វីលីពីនបាននិយាយថា ព្យុះត្រូពិចនេះបានបោកបក់កាត់សមុទ្រខាងកើតកាលពីថ្ងៃទី២៧ ខែកញ្ញាដោយមានកម្លាំងខ្យល់ព្យុះទីហ្វុងក្នុងល្បឿន ១២០គីឡូម៉ែត្រក្នុងមួយម៉ោង៕

ដោយ៖ យា ចិន្តាខន្តី (ប្រភព៖ VNA)