AKP ភ្នំពេញ ថ្ងៃទី២៥ ខែកញ្ញា ឆ្នាំ២០២៥ -- នាយករដ្ឋមន្ត្រីថៃ និងជារដ្ឋមន្ត្រីក្រសួងមហាផ្ទៃ លោក អនុទីន ចាន់វីរៈគុល (Anutin Charnvirakul)បានបញ្ជាឱ្យមានការស៊ើបអង្កេតជាបន្ទាន់ទៅលើការបាក់ដីដ៏ធំ ដែលបានកើតឡើងនៅក្នុងទីក្រុងបាងកក កាលពីព្រឹកថ្ងៃទី២៤ ខែកញ្ញា ឆ្នាំ២០២៥ ម្សិលមិញនេះ។

ការបាក់ស្រុតនេះបានកើតឡើងនៅជិតមន្ទីរពេទ្យវ៉ាជីរ៉ា នៅលើផ្លូវសាមសេន ដែលបណ្តាលមកពីការបាក់ដីនៅការដ្ឋានសាងសង់ផ្លូវរថភ្លើងក្រោមដី (MRT) ខ្សែពណ៌ស្វាយថ្មីមួយ។

គម្រោងសាងសង់ផ្លូវរថភ្លើងក្រោមដីខ្សែពណ៌ស្វាយថ្មីនេះ ជា​ផ្លូវ​ក្រោម​ដី​ខ្នាត​ធំដែល​លាត​សន្ធឹង​ពី​រដ្ឋសភា​កាត់​តាម​ផ្លូវសាមសេន ផ្លូវ​រូង​ក្រោម​ទន្លេ​ចៅប្រាយ៉ា ហើយ​បន្ត​ទៅ​ដល់តំបន់ស៊ុកសាវ៉ាត។ ផ្លូវទំហំ ​៣០​គុណ​៣០​ម៉ែត្រ​នៅ​មុខ​មន្ទីរពេទ្យវ៉ាជីរ៉ា​ស្រាប់តែ​ត្រូវបាក់ស្រុតបង្កើត​ជា​រណ្តៅមួយដែលមាន​ជម្រៅដល់ទៅ ​៥០​ម៉ែត្រ ។

ឧបទ្ទវហេតុនេះបានកើតឡើងនៅចំណុចដ៏ស្មុគស្មាញបំផុតមួយនៅតាមបណ្តោយផ្លូវនេះ ដែលជាផ្លូវរូងក្រោមដីកាត់ជាមួយស្ថានីយ៍មន្ទីរពេទ្យវ៉ាជីរ៉ានាពេលអនាគត។ ដី​បានបាក់ស្រុត​ចូល​ទៅ​ក្នុង​ផ្លូវ​រូង​ក្រោម​ដីដែលបណ្ដាល​ឱ្យ​សំណង់ដែល​នៅ​ជុំវិញត្រូវ​រលំ និង​បាក់​បំពង់​បង្ហូរ​ទឹក​ដ៏​សំខាន់។

បន្ទាប់ពីបានពិនិត្យទីតាំងនោះ លោកនាយករដ្ឋមន្ត្រី អានុទីន បានបញ្ជាក់ថា ហេតុការណ៍នេះមិនមានអ្នកស្លាប់នោះទេ ប៉ុន្តែលោកបានកត់សម្គាល់ថា រណ្តៅលិចទឹកបានធ្វើឱ្យខូចខាតដល់ស្ថានីយ៍ប៉ូលិសមួយហើយបានបង្ខំឱ្យមន្ទីរពេទ្យវ៉ាជីរ៉ាផ្អាកសេវាពិគ្រោះអ្នកជំងឺក្រៅ។

អាជ្ញាធរ​ដឹកជញ្ជូន​រហ័ស​នៃ​ប្រទេស​ថៃ (MRTA) បាន​ផ្អាក​ការ​សាងសង់​​ខ្សែ​រថភ្លើង​ពណ៌​ស្វាយ​ក្នុង​តំបន់​រងគ្រោះនោះ។ ទន្ទឹមនឹងនេះអាជ្ញាធរក្រុងបានកាត់ផ្តាច់ចរន្តអគ្គិសនី និងទឹក ដើម្បីគ្រប់គ្រងហានិភ័យ និងអនុវត្តវិធានការសង្គ្រោះបន្ទាន់ ដូចជាការបិទការលេចធ្លាយនៅក្នុងផ្លូវរូងក្រោមដី ការវាយតម្លៃសុវត្ថិភាពនៃអគារនៅក្បែរនោះ ការត្រួតពិនិត្យចលនាដី និងការគ្រប់គ្រងចរាចរណ៍។

អភិបាលក្រុងបាងកក លោក ឆាដឆាត សិទ្ធិពុន (Chadchart Sittipunt) បានព្រមានថា ភ្លៀងធ្លាក់ខ្លាំងអាចធ្វើឱ្យស្ថានការណ៍កាន់តែអាក្រក់ឡើង។ ក្រុមអ្នកជំនាញត្រូវបានបង្កើតឡើងដើម្បីវាយតម្លៃ និងឆ្លើយតបទៅនឹងហានិភ័យដែលអាចកើតមាន។

មន្ទីរពេទ្យវ៉ាជីរ៉ាបានផ្អាកសេវាកម្មពិគ្រោះអ្នកជំងឺក្រៅរយៈពេលពីរថ្ងៃហើយបានជម្លៀសអ្នកជំងឺក្នុងមន្ទីរពេទ្យប្រហែល ៣.៥០០នាក់ចេញពីអគារដែលនៅជិតកន្លែងបាក់ស្រុតដីនោះ៕

ដោយ៖ យា ចិន្តាខន្តី (ប្រភព៖ VNA)