AKP ភ្នំពេញ ថ្ងៃទី១៩ ខែកញ្ញា ឆ្នាំ២០២៥ -- កាលពីឆ្នាំមុន ទីភ្នាក់ងាររដ្ឋសម្រាប់កិច្ចការពារកុមារ (SACP) របស់ប្រទេសប៊ុលហ្គារី បានទទួលការជូនដំណឹងចំនួន ៦.៤៤០ករណីអំពីទម្រង់ផ្សេងៗនៃការរំលោភបំពានលើកុមារ។ នេះបើយោងតាមរដ្ឋមន្ត្រីក្រសួងការងារ និងគោលនយោបាយសង្គមរបស់ប៊ុលហ្គារី លោក បូរីស្លាវ ហ្គូតសាណូវ (Borislav Gutsanov) បាននិយាយនៅក្នុងសន្និសីទសារព័ត៌មានមួយកាលពីថ្ងៃព្រហស្បតិ៍។ ការរាយការណ៍អំពីឧប្បត្តិហេតុនៃអំពើហឹង្សាដែលបានមើលឃើញ ឬជួបប្រទះដោយកុមារ នឹងត្រូវបានធ្វើឱ្យកាន់តែងាយស្រួលដោយកម្មវិធីទូរស័ព្ទមួយដែលមានឈ្មោះថា Syberkidz Patrol ដែលត្រូវបានគេរំពឹងថានឹងចាប់ផ្តើមអនុវត្តពីខែតុលាខាងមុខនេះ។

កម្មវិធីនេះត្រូវបានបង្កើតឡើងជាផ្នែកមួយនៃយុទ្ធនាការថ្នាក់ជាតិប្រឆាំងនឹងអំពើហឹង្សាប្រឆាំងនឹងកុមារ «Be Brave, Be Good!» ដែលនេះជាឆ្នាំទីពីរហើយដែលយុទ្ធនាការត្រូវបានដាក់ឱ្យដំណើរការកាលពីថ្ងៃព្រហស្បតិ៍។

ប្រធានទីភ្នាក់ងារ SACP លោកស្រី តេអូដូរ៉ា អ៊ីវ៉ាណូវ៉ា (Teodora Ivanova) បាននិយាយថា យុទ្ធនាការចុងក្រោយបង្អស់ត្រូវបានចាប់ផ្តើមអនុវត្ត ដោយសារយោងទៅលើរបាយការណ៍របស់ប្រព័ន្ធផ្សព្វផ្សាយប្រចាំថ្ងៃអំពីអំពើហិង្សាក្នុងចំណោមកុមារ។ លោកស្រីបាននិយាយថា «គោលដៅ គឺសម្រាប់ពួកយើង មនុស្សពេញវ័យ តាមរយៈស្ថាប័នរដ្ឋ អង្គការមិនមែនរដ្ឋាភិបាល និងប្រព័ន្ធផ្សព្វផ្សាយ ដើម្បីជួយដល់កុមារតាមរយៈវិធីថ្មី និងប្រកបដោយនវានុវត្តន៍»។ លោកស្រី អ៊ីវ៉ាណូវ៉ា បានប្រាប់អ្នកសារព័ត៌មានថា ជាញឹកញាប់បំផុត របាយការណ៍នៃអំពើហិង្សា គឺពាក់ព័ន្ធនឹងការរំលោភបំពានផ្លូវចិត្ត ក៏ដូចជាការរំលោភបំពានលើរាងកាយ និងផ្លូវភេទ។

លោក​រដ្ឋមន្ត្រី​បាននិយាយ​ថា ចំនួន​របាយការណ៍​ទៅ​កាន់ទីភ្នាក់ងារ SACP មានមិន​តិច​ទេ​។ លោកបាននិយាយថា ការពិតដែលថាមានរបាយការណ៍ជាច្រើននោះ គឺជាតម្រូវការជាមុនសម្រាប់ការផ្លាស់ប្តូររបៀបគិត និងការរស់នៅរបស់កុមារ ដែលជាមូលហេតុដែលទីភ្នាក់ងារ SACP ត្រូវតែទទួលបានការគាំទ្រពេញលេញពីគ្រប់ស្ថាប័ន។ តាម​ការបញ្ជាក់របស់លោកបានឱ្យដឹងថា វា​ជា​ការ​សំខាន់ណាស់​សម្រាប់​កុមារ​ក្នុង​ការ​ដឹង​ថា​ត្រូវ​ងាក​ទៅ​រក​នរណាឱ្យជួយ ហើយ​សម្រាប់​ឪពុក​ម្ដាយ​ត្រូវ​ដឹង​ថា ​រដ្ឋកំពុង​គាំទ្រ​ដល់ពួកគេ៕

ដោយ៖ យា ចិន្តាខន្តី (ប្រភព៖ BTA)