AKP ភ្នំពេញ ថ្ងៃទី១៨ ខែកញ្ញា ឆ្នាំ២០២៥--ឯកឧត្តម យី វាសនា អគ្គលេខាធិការ គណៈកម្មាធិការជាតិអូឡាំពិកកម្ពុជាបានជំរុញលើកទឹកចិត្តឱ្យគ្រូបង្វឹកប៉ារ៉ាឡាំពិកកម្ពុជាទាំងអស់ប្តេជ្ញាចិត្តឱ្យបានខ្ពស់ ក្នុងការបន្តក្រេបជញ្ជក់ចំណេះជំនាញនៅកម្រិតខ្ពស់ៗបន្ថែមទៀត ដើម្បីរួមចំណែកបន្តជួយអភិវឌ្ឍកីឡាជនពិការកម្ពុជាឱ្យកាន់តែរឹងមាំ សក្តានុពល និងរីកចម្រើនបន្ថែមទៀត។

ការជំរុញលើកទឹកចិត្តរបស់ឯកឧត្តម យី វាសនា បានធ្វើឡើងនៅក្នុងឱកាសបិទវគ្គគ្រូបង្វឹកកីឡាប៉ារ៉ាឡាំពិកកម្ពុជា កម្រិតបឋម កាលពីល្ងាចថ្ងៃទី១៧ ខែកញ្ញា ឆ្នាំ២០២៥ នៅមជ្ឈមណ្ឌលជាតិនៃជនពិការតេជោសែន រាជធានីភ្នំពេញ។

ឯកឧត្តម យី វាសនាដែលជាគ្រូឧទ្ទេសប្រចាំវគ្គនេះដែរនោះបានមានប្រសាសន៍ថា បន្ទាប់ពីបញ្ចប់វគ្គគ្រូបង្វឹកកម្រិតបឋមនេះទៅ គណៈកម្មាធិការជាតិប៉ារ៉ាឡាំពិកកម្ពុជានឹងត្រូវបន្តរៀបចំវគ្គគ្រូបង្វឹកកម្រិតធម្យម និងកម្រិតខ្ពស់បន្ថែមទៀត នាពេលខាងមុខ ដើម្បីផ្តល់ឱកាសជូនដល់គ្រូបង្វឹកកីឡាជនពិការកម្ពុជាទទួលបានចំណេះដឹងស៊ីជម្រៅបន្ថែមទៀតពីគ្រូឧទ្ទេសអន្តរជាតិ ដែលធ្លាប់មានបទពិសោធច្រើន ក្នុងការបន្តចែករំលែកចំណេះដឹង និងបច្ចេកទេសហ្វឹកហាត់ជូនដល់កីឡាករ កីឡាការិនីពិការកម្ពុជាឱ្យមានគុណភាពបច្ចេកទេសកាន់តែរឹងមាំបន្ថែមទៀត។

ជាមួយគ្នានេះ ឯកឧត្តមអគ្គលេខាធិការបានបង្ហាញក្តីរីករាយជាខ្លាំង ដែលឃើញលោកគ្រូ អ្នកគ្រូជាសិក្ខាកាមទាំងអស់បានយកចិត្តទុកដាក់ក្នុងសិក្សាស្វែងយល់ និងសំណូមពរឱ្យមានវគ្គបណ្តុះបណ្តាលកម្រិតខ្ពស់ៗជាងនេះបន្ថែមទៀត។ ជាមួយនឹងឆន្ទៈចង់ចេះចង់ដឹងរបស់គ្រូបង្វឹកកីឡាប៉ារ៉ាឡាំពិកកម្ពុជាទាំងអស់ឯកឧត្តមដាក់ការជឿជាក់ថា ពួកគាត់នឹងយកចំណេះដឹងទទួលបានពីគ្រូឧទ្ទេស និងការសួរដេញដោលនេះទៅបង្ហាត់បង្រៀនកីឡាករ កីឡាការិនីរបស់ខ្លួនឱ្យមានចំណេះដឹង និងបច្ចេកទេសកាន់តែល្អប្រសើរបន្ថែមទៀត ដើម្បីជំរុញឱ្យជំនាញវិស័យកីឡាជនពិការកម្ពុជាកាន់តែមានសក្តានុពល និងត្រៀមចូលរួមការប្រកួតអន្តរជាតិ ទាំងកម្រិតតំបន់ កម្រិតទ្វីប និងពិភពលោក នាថ្ងៃខាងមុខឱ្យទទួលបានលទ្ធផលកាន់តែប្រសើរ។

ឯកឧត្តម យី វាសនា បានចាត់ទុកថា តាមរយៈវគ្គគ្រូបង្វឹកកីឡាប៉ារ៉ាឡាំពិកកម្ពុជាដ៏មានសារៈសំខាន់នាពេលនេះនឹងក្លាយជាប្រយោជន៍ ក្នុងការរួមចំណែកកសាងធនធានមនុស្សទាំងគ្រូបង្វឹក និងអត្តពលិកត្រៀមឆ្ពោះទៅទទួលរៀបចំធ្វើម្ចាស់ផ្ទះ ការប្រកួតកីឡាយុវជនអាស៊ីប៉ារ៉ាហ្គេម (Asian Youth Para Games) នាឆ្នាំ២០២៩ ក្រោយបញ្ចប់ការធ្វើម្ចាស់ផ្ទះ កីឡាយុវជនអាស៊ី (Asian Youth Games) ២០២៩ ជាប្រវត្តិសាស្ត្រដំបូងរបស់កម្ពុជា៕

ដោយ ហេង ណាលីន