AKP ភ្នំពេញ ថ្ងៃទី១៨ ខែកញ្ញា ឆ្នាំ២០២៥ -- ប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) ត្រូវបានគេរំពឹងថានឹងធ្វើទស្សនកិច្ចទៅកាន់ប្រទេសកូរ៉េខាងត្បូងនៅខែក្រោយដើម្បីចូលរួមកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC)។យោងតាមឯកអគ្គរដ្ឋទូតស្តីទីរបស់សហរដ្ឋអាមេរិកប្រចាំនៅកូរ៉េខាងត្បូងលោក ចូសេប យុន (Joseph Yun) បានឱ្យដឹងថា លោក ត្រាំ ក៏នឹងជួបពិភាក្សាទ្វេភាគីជាមួយប្រធានាធិបតីកូរ៉េខាងត្បូង លោក លី ជែម្យុង (Lee Jae Myung) នៅខាងក្រៅព្រឹត្តិការណ៍នេះដែលនឹងប្រព្រឹត្តទៅនៅទីក្រុងក្យឹងជូផងដែរ។ ទីប្រឹក្សាសន្តិសុខជាតិកូរ៉េខាងត្បូង លោក វី ស៊ុងឡាក (Wi Sung-lac) ក៏បានសម្តែងការរំពឹងទុកដូចគ្នានេះដែរ បើទោះបីជាការបញ្ជាក់ជាផ្លូវការនៅមិនទាន់ត្រូវបានធ្វើឡើងក៏ដោយ។

ដំណើរ​ទស្សន​កិច្ច​ដែលត្រូវ​បាន​រំពឹង​ទុក​នេះ គឺ​បន្ទាប់​ពី​កិច្ច​ប្រជុំ​កំពូល​ទ្វេភាគី​ដែល​ទទួល​បាន​ជោគជ័យ​រវាង​មេដឹកនាំ​ទាំង​ពីរ​កាល​ពី​ខែ​មុន​ក្នុង​ទីក្រុង​វ៉ាស៊ីនតោន ​ដែល​លោក​ប្រធានាធិបតី លី បាន​បន្ត​ការ​អញ្ជើញប្រធានាធិបតីសហរដ្ឋអាមេរិក។ ក្នុងអំឡុងពេលនៃសន្និសីទ ស្តីពីសម្ព័ន្ធភាព លោកឯកអគ្គរដ្ឋទូត យុន បានពណ៌នាអំពីភាពជាដៃគូរវាងសហរដ្ឋអាមេរិក និងកូរ៉េខាងត្បូងថា «មានឥទ្ធិពលជាងពេលណាៗទាំងអស់»។ ទោះជាយ៉ាងណាក៏ដោយ លោកក៏បានសង្កត់ធ្ងន់ផងដែរទៅលើតម្រូវការសម្រាប់សម្ព័ន្ធភាពក្នុងការសម្របខ្លួន និងការផ្លាស់ប្តូរក្នុងការឆ្លើយតបទៅនឹងការគំរាមកំហែងថ្មីៗ និងទិដ្ឋភាពភូមិសាស្ត្រនយោបាយដែលកំពុងវិវត្តន៍។

ការសម្របខ្លួននេះ ហៅថា «ទំនើបភាវូបនីយកម្មនៃសម្ព័ន្ធភាព» ដែលរួមមានការពង្រីកសមត្ថភាពការពារជាតិរបស់កូរ៉េខាងត្បូងលើសពីឧបទ្វីបរបស់ខ្លួន និងការកែសម្រួលសក្តានុពលនៃកងកម្លាំងសហរដ្ឋអាមេរិកដែលឈរជើងនៅក្នុងប្រទេស ដែលជាគំនិតដែលគេស្គាល់ថាជា «ភាពបត់បែនជាយុទ្ធសាស្ត្រ»។ លោក យុន ក៏បានគូសបញ្ជាក់អំពីតួនាទីដ៏សំខាន់នៃការផ្លាស់ប្តូររវាងប្រជាជន និងប្រជាជន ក្នុងការពង្រឹងទំនាក់ទំនងដ៏រឹងមាំរវាងប្រជាជាតិទាំងពីរផងដែរ៕

ដោយ៖ យា ចិន្តាខន្តី (ប្រភព៖ យ៉ុនហាប់)