AKP ភ្នំពេញ ថ្ងៃទី១៨ ខែកញ្ញា ឆ្នាំ២០២៥ -- អនុរដ្ឋមន្ត្រីការបរទេសរុស្ស៊ីលោក ស៊ែរហ្គេយ រីយ៉ាបកូវ (Sergey Ryabkov) បាននិយាយថា ជំនួបរវាងរដ្ឋមន្ត្រីការបរទេសរុស្ស៊ី លោក ស៊ែរហ្គេយ ឡាវរ៉ូវ (Sergey Lavrov) និងរដ្ឋមន្ត្រីការបរទេសសហរដ្ឋអាមេរិក លោក ម៉ាកូ រូប៊ីអូ (Marco Rubio)ទំនងជានឹងប្រព្រឹត្តទៅនៅខាងក្រៅមហាសន្និបាតអង្គការសហប្រជាជាតិ។ទោះបីជាយ៉ាងណាក៏ដោយ លោក រីយ៉ាបកូវ បានកត់សម្គាល់ថា កិច្ចប្រជុំកំពូលត្រីភាគីដែលរួមមានទាំងអ៊ុយក្រែនផងនោះ គឺមិនអាចទៅរួចទេនៅពេលនេះ ព្រោះទីក្រុងគៀវមិនទាន់ឆ្លើយតបនឹងសំណើរបស់រុស្ស៊ីពីជុំមុននៃកិច្ចចរចាសន្តិភាពនៅឡើយ។

លោក រីយ៉ាបកូវ ក៏បាននិយាយផងដែរអំពីការពន្យារពេលម្តងហើយម្តងទៀតនៃជុំទី៤ នៃកិច្ចពិគ្រោះយោបល់ទ្វេភាគីដែលមានសក្តានុពលរវាងរុស្ស៊ី និងសហរដ្ឋអាមេរិក ដោយលោកបានបញ្ជាក់យ៉ាងច្បាស់ថា ការពន្យារពេលនេះគឺជាយុទ្ធសាស្ត្រជាជាងបញ្ហាខាងផ្នែកភស្តុភារ។ លោកបានសង្កត់ធ្ងន់ថា ទីក្រុងម៉ូស្គូស្វែងរកការវិវឌ្ឍយ៉ាងសំខាន់ និងការរៀបចំមូលដ្ឋានសម្រាប់ជំហានបន្ទាប់នាពេលអនាគត ក្នុងគោលបំណងរៀបចំកិច្ចប្រជុំបែបនេះនៅចុងរដូវស្លឹកឈើជ្រុះខាងមុខ។

នៅក្នុងការអត្ថាធិប្បាយដ៏ទូលំទូលាយរបស់លោកចំពោះទំនាក់ទំនងរវាងសហរដ្ឋអាមេរិក និងរុស្ស៊ី លោក រីយ៉ាបកូវ បានពណ៌នាអំពីវិធីសាស្រ្តរបស់សហរដ្ឋអាមេរិកចំពោះអ៊ុយក្រែនថាជាទូទៅ គឺផ្អែកទៅលើ «សុភវិនិច្ឆ័យ» បើទោះបីជាលោកបានរិះគន់ដល់គូប្រជែងរបស់លោក គឺរដ្ឋបាលរបស់លោក ដូណាល់ ត្រាំ (Donald Trump) ចំពោះការប៉ុនប៉ងធ្វើឱ្យប្រទេសរុស្ស៊ីចុះខ្សោយក៏ដោយ។ លោកក៏បានលើកឡើងអំពីការអំពាវនាវរបស់លោកប្រធានាធិបតី ត្រាំ ដែលឱ្យអឺរ៉ុបប្តូរការផ្គត់ផ្គង់ថាមពលរបស់រុស្ស៊ីទៅសហរដ្ឋអាមេរិកវិញ ដោយបង្ហាញពីទំនុកចិត្តលើវិស័យថាមពលរបស់រុស្ស៊ីក្នុងការដោះស្រាយការប្រកួតប្រជែងទីផ្សារផងដែរ៕

ដោយ៖ យា ចិន្តាខន្តី (ប្រភព៖ AA-AKP)