AKP ភ្នំពេញ ថ្ងៃទី១៧ ខែកញ្ញា ឆ្នាំ២០២៥--សកម្មភាពប្រឹងប្រែងបន្តការអភិវឌ្ឍធនធានមនុស្សរបស់គ្រឹះស្ថានអប់រំរដ្ឋ និងឯកជន ព្រមទាំងវគ្គរដ្ឋបាលកីឡាសិស្សនិស្សិតកម្ពុជា នាពេលនេះ គឺជាការរួមចំណែកយ៉ាងធំធេងជាមួយក្រសួងអប់រំ យុវជន និងកីឡា ជាពិសេសជាមួយរាជរដ្ឋាភិបាល ក្នុងការលើកកម្ពស់វិស័យកីឡា ត្រៀមឆ្ពោះទៅទទួលរៀបចំធ្វើម្ចាស់ផ្ទះ ការប្រកួតកីឡាសាកលវិទ្យាល័យអាស៊ាន លើកទី២៣ (ASEAN University Games) ឆ្នាំ២០២៨ និងកីឡាយុវជនអាស៊ី (ASIAN YOUTH GAMES) ឆ្នាំ២០២៩ ក៏ដូចជាលើកកម្ពស់គុណភាពការបណ្តុះបណ្តាលធនធានរួមចំណែកអភិវឌ្ឍប្រទេសជាតិ ស្របតាមចក្ខុវិស័យរាជរដ្ឋាភិបាលឆ្ពោះទៅឆ្នាំ២០៣០ ដែលប្រទេសកម្ពុជាក្លាយជាប្រទេសមានប្រាក់ចំណូលមធ្យមកម្រិតខ្ពស់។

នេះជាការគូសបញ្ជាក់របស់ឯកឧត្តម ប៉ុន សុខ អគ្គនាយក នៃអគ្គនាយកដ្ឋានកីឡា និងជាអគ្គលេខាធិការ សហព័ន្ធកីឡាសិស្សនិស្សិតកម្ពុជា ក្នុងឱកាសបើកវគ្គរដ្ឋបាលកីឡាសិស្សនិស្សិតកម្ពុជា នៅសាលប្រជុំនាយកដ្ឋានអប់រំកាយនិងកីឡាសិស្សនិស្សិត ព្រឹកថ្ងៃទី១៧ ខែកញ្ញា ឆ្នាំ២០២៥។

ឯកឧត្តម ប៉ុន សុខ បានកោតសរសើរ និងវាយតម្លៃខ្ពស់ចំពោះសមាគមកីឡាគ្រឹះស្ថានមធ្យមសិក្សាចំណេះទូទៅសាធារណៈ និងឯកជន ដែលកន្លងមកបានខិតខំប្រឹងប្រឹងចំណាយពេលវេលា ស្មារតី សម្ភារ និងថវិកាធ្វើសកម្មភាពកីឡាក្រៅម៉ោងសិក្សានៅក្នុងគ្រឹះស្ថានសិក្សា រួមទាំងការរៀបចំ និងចូលរួមប្រកួតនៅថ្នាក់រាជធានី ខេត្ត ថ្នាក់ជាតិ និងថ្នាក់អន្តរជាតិ ជាពិសេសចំពោះគ្រឹះស្ថានឧត្តមសិក្សា និងគ្រឹះស្ថានមធ្យមសិក្សាបច្ចេកទេស ដែលមានគោលនយោបាយលើកទឹកចិត្តបានយកចិត្តទុកដាក់លើការសិក្សា និងការផ្តល់អាហាររូបករណ៍ដល់កីឡាករ កីឡាការិនីដែលជាសិស្ស និងនិស្សិត។ សកម្មភាពទាំងនេះ គឺជាការរួមចំណែកយ៉ាងធំធេងជាមួយក្រសួងអប់រំ យុវជន និងកីឡា ជាពិសេសជាមួយរាជរដ្ឋាភិបាល ក្នុងការលើកកម្ពស់វិស័យកីឡាឆ្ពោះទៅការប្រកួតកីឡាសាកលវិទ្យាល័យអាស៊ានលើកទី២៣ (ASEAN University Games) ឆ្នាំ២០២៨ និងASIAN YOUTH GAMES ឆ្នាំ២០២៩។

ផ្អែកលើបរិបទនៃការរីកចម្រើនវិស័យកីឡានៅក្នុងប្រទេសកម្ពុជា ក៏ដូចជានៅក្នុងតំបន់ និងអន្តរជាតិ ក្រសួងអប់រំ យុវជន និងកីឡា បានធ្វើកំណែទម្រង់ការប្រកួតកីឡាគ្រប់កម្រិតក្នុងការរៀបចំឱ្យមានគុណភាពមានលក្ខណៈជាហ្គេម ដូចជា៖ ការប្រកួតកីឡាថ្នាក់ជាតិគ្រប់កម្រិតនានា មកជាការប្រកួតកីឡាថ្នាក់ជាតិជាលក្ខណៈហ្គេម ស្របតាមការប្រកួតកីឡាសិស្សអាស៊ាន ស្របតាមការប្រកួតកីឡាសាកលវិទ្យាល័យអាស៊ាន និងការប្រកួតកីឡាសាកលវិទ្យាល័យពិភពលោករដូវក្តៅផងដែរ។

បន្ថែមលើនេះទៀត ក្រសួងអប់រំ យុវជន និងកីឡា បានដាក់ចេញនូវគោលនយោបាយជាតិស្តីពីការអភិវឌ្ឍវិស័យអប់រំកាយ និងកីឡា និងផែនការមេឆ្ពោះទៅការរៀបចំ ការប្រកួតកីឡាសាកលវិទ្យាល័យអាស៊ានលើកទី២៣ ឆ្នាំ២០២៨ និងការប្រកួតកីឡាយុវជនអាស៊ី ឆ្នាំ២០២៩ ជាពិសេស គឺអនុវត្តតាមអនុសាសន៍ដ៏ខ្ពង់ខ្ពស់របស់ប្រមុខរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត ដែលបានបញ្ជាក់ថា ត្រូវជំរុញផ្សព្វផ្សាយទិសស្លោក “យុវជនម្នាក់លេងកីឡាមួយប្រភេទកីឡាប្រចាំជីវិត” និង “ប្រជាពលរដ្ឋម្នាក់ហាត់កីឡាមួយប្រភេទកីឡាប្រចាំជីវិត”  ដែលត្រូវផ្តើមចេញពីការអនុវត្តកីឡាក្រៅម៉ោងសិក្សានៅក្នុងគ្រឹះស្ថានសិក្សាគ្រប់កម្រិត។

ជាមួយគ្នានេះ ឯកឧត្តមអគ្គនាយកកីឡាបានលើកទឹកចិត្តដល់សិក្ខាកាមជំរុញ និងបន្តផ្សព្វការងារពង្រឹងពង្រីកការចុះឈ្មោះចូលជាសមាជិកភាពជាមួយសហព័ន្ធកីឡាសិស្សនិស្សិតកម្ពុជា ក្នុងគោលបំណងពង្រឹងនិងពង្រីកសមាជិកនៅតាមគ្រឹះស្ថានឧត្តមសិក្សា និងមធ្យមសិក្សាបច្ចេកទេសសាធារណៈ និងឯកជន ដើម្បីធ្វើសកម្មភាពកីឡាឱ្យបានខ្លាំងក្លា ជាពិសេសឆ្ពោះទៅធ្វើម្ចាស់ផ្ទះ ការប្រកួតកីឡាសាកលវិទ្យាល័យអាស៊ានលើកទី២៣ ឆ្នាំ២០២៨ និងការប្រកួតកីឡាយុវជនអាស៊ី ឆ្នាំ២០២៩ ដែលព្រះរាជាណាចក្រកម្ពុជានឹងធ្វើជាម្ចាស់ផ្ទះក្នុងការរៀបចំព្រឹត្តិការណ៍ដ៏មហាអស្ចារ្យ និងជាប្រវត្តិសាស្រ្តមួយនេះ។

គួរបញ្ជាក់ថា វគ្គរដ្ឋបាលកីឡាសិស្សនិស្សិតកម្ពុជាមានសិក្ខាកាមចូលរួម៤៥នាក់ ដោយធ្វើឡើងក្នុងគោលបំណងសំខាន់ៗ ក្នុងការបង្កើនសមត្ថភាព និងជំនាញរបស់គ្រូអប់រំកាយ និងបុគ្គលិកដែលទទួលខុសត្រូវចំពោះកីឡាសិស្សនៅតាមសាលារៀន។ ដើម្បីផ្តល់ចំណេះដឹងលើការធ្វើផែនការ និងការអនុវត្តគោលនយោបាយ និងកម្មវិធីកីឡាសិស្ស និងដើម្បីលើកកម្ពស់ការរៀបចំ និងការគ្រប់គ្រងប្រកបដោយប្រសិទ្ធភាពនៃការប្រកួត និងសកម្មភាពកីឡាសិស្សផងដែរ៕

ដោយ ហេង ណាលីន