AKP ភ្នំពេញ ថ្ងៃទី១៧ ខែកញ្ញា ឆ្នាំ២០២៥--ក្រុមមន្ទីរអប់រំ យុវជន និងកីឡាខេត្តកំពត និងក្រុមខេត្តកណ្តាលប្រជែងបាន៣ពិន្ទុពីគូប្រជែងរៀងៗខ្លួន ខណៈក្រុមភ្នំពេញហ្គាឡាក់ស៊ី និងក្រុមមន្ទីរអប់រំ យុវជន និងកីឡាខេត្តកំពង់ស្ពឺចែកគ្នាម្នាក់១ពិន្ទុ ក្រោយរក្សាលទ្ធផលស្មើគ្នា ២-២ នៅក្នុងការប្រកួតសប្តាហ៍ទី៩ វគ្គសន្សំពិន្ទុក្នុង២ពូលផ្សេងគ្នា កាលពីល្ងាចថ្ងៃទី១៦ ខែកញ្ញា ឆ្នាំ២០២៥ ពានរង្វាន់សម្តេចតេជោ ហ៊ុន សែន ថ្នាក់ខេត្ត លើកទី១៩ រដូវកាល ២០២៥-២០២៦។

ពីរក្រុមដែលរកបាន៣ពិន្ទុដូចគ្នានេះ គឺក្រុមមន្ទីរអប់រំខេត្តកំពតបានយកឈ្នះក្រុមខេត្តកែប ដោយលទ្ធផល ៧-៣ ដែលសន្សំពិន្ទុក្នុងពូល ក។ ជ័យជម្នះនេះបានធ្វើក្រុមមន្ទីរអប់រំខេត្តកំពតទទួលបានពិន្ទុសរុប ៧ពិន្ទុ ក្រោយឆ្លងកាត់៣ប្រកួត ឈ្នះ២ និងស្មើ១ ហើយមន្ទីរអប់រំខេត្តកំពតមាន៧ពិន្ទុស្មើនឹងក្រុមខេត្តព្រះសីហនុ ដែលកំពុងឈរលេខ១ ក្នុងពូល ក។ ចំពោះក្រុមខេត្តកណ្តាលបានយកឈ្នះក្រុមភ្នំដាមមហានគរខេត្តតាកែវ ៣-២ ក្នុងពូល ខ ដោយខេត្តកណ្តាលទទួលបាន៧ពិន្ទុ ក្រោយឆ្លងកាត់៥ប្រកួត ឈ្នះ២ ស្មើ១ និងចាញ់២ មាន៧ពិន្ទុ ខណៈ៥ប្រកួតរបស់ភ្នំដាមមហានគរខេត្តតាកែវ ចាញ់ទាំង៥ប្រកួត ឈរនៅបាតតារាង ក្នុងពូល ខ។

រីឯក្រុមភ្នំពេញហ្គាឡាក់ស៊ី រក្សាលទ្ធផលស្មើគ្នា ២-២ ជាមួយក្រុមមន្ទីរអប់រំខេត្តកំពង់ស្ពឺនោះ គឺធ្វើឱ្យភ្នំពេញហ្គាឡាក់ស៊ីបន្តក្តោបក្តាប់ដំណែងលើកំពូលតារាងក្នុងពូល ខ ក្រោយឆ្លងកាត់៥ប្រកួត ឈ្នះ៤ប្រកួត និងស្មើ១ មាន១៣ពិន្ទុ ខណៈ៥ប្រកួតរបស់ក្រុមមន្ទីរអប់រំខេត្តកំពង់ស្ពឺ ឈ្នះ២ ស្មើ២ និងចាញ់១ មាន៨ពិន្ទុ ឈរលេខ២បណ្តោះអាសន្ន។

គួរបញ្ជាក់ថា គួរបញ្ជាក់ថា ការប្រកួតបាល់ទាត់ពានរង្វាន់សម្តេចតេជោ ថ្នាក់ខេត្ត រដូវកាល ២០២៥-២០២៦ មានក្រុមតំណាងរាជធានីខេត្តចូលរួមប្រកួតប្រជែងសរុប ១៩ក្រុម ដោយចែកចេញជា៥ពូល ហើយដំណើរការប្រកួតវគ្គជម្រុះក្នុងពូលទាំង៥ ចាប់ពីថ្ងៃទី២២ ខែកក្កដា ដល់ថ្ងៃទី១៤ ខែធ្នូ ឆ្នាំ២០២៥។ ក្រុមទាំង១៩ ក្នុងពូលទាំង៥ ត្រូវប្រកួតសន្សំពិន្ទុវិលជុំក្នុងពូលរៀងៗខ្លួន ចំនួន២ជើង ក្នុងដី-ក្រៅដី ដើម្បីស្វែងរកចំណាត់ថ្នាក់លេខ១ និងលេខ២ ក្នុងពូលនីមួយៗឡើងជុំបន្ត នឹងបន្តប្រកួតទៅវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រ។ ក្រុមជ័យលាភីថ្នាក់ខេត្តនឹងត្រូវឡើងទៅប្រកួតជម្រុះបន្តជាមួយក្រុមនានាដែលកំពុងឈរជើងក្នុងក្របខណ្ឌលីគកំពូលកម្ពុជា ឬជម្រើសជើងឯកខេមបូឌានព្រីមៀរលីគ ១១ក្រុម ហៅថា ការប្រកួតពានរង្វាន់សម្តេចតេជោ ហ៊ុន សែន ថ្នាក់ជាតិ៕

ដោយ ហេង ណាលីន (រូបភាព៖ Hun Sen Cup)