AKP ភ្នំពេញ ថ្ងៃទី១៦ ខែកញ្ញា ឆ្នាំ២០២៥-- ឯកឧត្តម ឧត្តមសេនីយ៍ទោ សែម រតនា អនុប្រធានទី១គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព បានសំណូមពរដល់ភាគីអាមេរិកឱ្យផ្តល់ការហ្វឹកហ្វឺនបង្កើនសមត្ថភាពដល់យោធិននារីរក្សាសន្តិភាពទាំងជំនាញ និងភាសាអង់គ្លេសរយៈពេល២ទៅ៣ឆ្នាំ ដើម្បីឆ្លើយតបទៅនឹងសំណូមពររបស់អង្គការសហប្រជាជាតិ ព្រមទាំងបន្តផ្តល់ការគាំទ្រដល់កម្លាំងមួកខៀវកម្ពុជាទៅសិក្សាបន្ថែមនៅតាមបណ្តាប្រទេសដែលជាសមាជិកកម្មវិធី GPOI ពិសេសនៅសរដ្ឋអាមេរិកដើម្បីបង្កើនសមត្ថភាព និងការយល់ដឹងផ្នែករក្សាសន្តិភាព។ សំណូមពរនេះធ្វើឡើងក្នុងឱកាសដែលឯកឧត្តមទទួលជួបសវនាការជាមួយលោកឧត្តមសេនីយ៍ទោ ទីម៉ូធី ជេ.ដុនណេឡេន នាយសេនាធិការ និងជាមេបញ្ជាការរដ្ឋអាយដាហូនៃឆ្មាំជាតិសហរដ្ឋអាមេរិក នាមជ្ឈមណ្ឌលជាតិរក្សាសន្តិភាព កាលពីរសៀលថ្ងៃទី១៦ ខែកញ្ញា ឆ្នាំ២០២៥។

ក្នុងជំនួបនេះ ឯកឧត្តម ឧត្តមសេនីយ៍ទោ សែម រតនា បានជម្រាបជូនលោកឧត្តមសេនីយ៍ទោ ទីម៉ូធី ជេ.ដុនណេឡេន ថា ក្រោមជំនួយឧបត្ថម្ភលើការងារហ្វឹកហ្វឺនពីសហរដ្ឋអាមេរិក បានរួមចំណែកមួយយ៉ាងសំខាន់ក្នុងការកសាងធនធានកម្ពុជា សម្រាប់ទៅចូលរួមក្នុងបេសកកម្មរក្សាសន្តិភាពរបស់អង្គការសហប្រជាជាតិនៅតាមបណ្តាប្រទេសដែលហែកហួរដោយសារសង្គ្រាមមួយចំនួនមានជាអាទិ៍ ស៊ូដង់ ស៊ូដង់ខាងត្បូង លីបង់ ឆាដ សាយប្រឹស ស៊ីរី ម៉ាលី អាហ្វ្រិកកណ្តាល យេមែន និងកុងហ្គោ លើជំនាញបោសសំអាតមីន អាវុធហត្ថ ពេទ្យកំរិត២ កម្ទេចគ្រាប់មិនទាន់ផ្ទុះ វិស្វកម្មព្រលានយន្តហោះ វិស្វកម្មសំណង់ផ្ដេក និងបញ្ឈរ នាយទាហានសេនាធិការ និងនាយទាហានសង្កេតការណ៍។

បន្ថែមពីលើសំណូមពរខាងលើ ឯកឧត្តម ឧត្តមសេនីយ៍ទោ សែម រតនា ក៏បានសុំឱ្យភាគីអាមេរិកផ្តល់ការហ្វឹកហ្វឺនដល់គ្រូបង្គោលកម្ពុជាលើជំនាញបោសសំអាតមីន និងកំទេចគ្រឿងផ្ទុះឱ្យមានអាជ្ញាបណ្ណទទួល ស្គាល់ពីអង្គការសហប្រជាជាតិ ដើម្បីមានលទ្ធភាពផ្តល់ការហ្វឹកហ្វឺនដល់កម្លាំងកម្ពុជាប្តូរវេន និងសិក្ខាកាមអន្តរជាតិ ដែលមកសិក្សានៅកម្ពុជាលើជំនាញខាងលើសម្រាប់ប្រតិបត្តិការសន្តិភាពផងដែរ។

ជាការឆ្លើយតប លោកឧត្តមសេនីយ៍ទោ ទីម៉ូធី ជេ.ដុនណេឡេន នាយសេនាធិការ និងជាមេបញ្ជាការរដ្ឋអាយដាហូនៃឆ្មាំជាតិសហរដ្ឋអាមេរិកថានឹងទទួលយកសំណើទាំងឡាយទៅពិនិត្យ និងពិភាក្សាដើម្បីធ្វើ ការសម្រេច។ ក្នុងឱកាសនេះដែរលោកក៏បានសម្តែងនូវការកោតសរសើរចំពោះកម្ពុជាក្នុងការបញ្ជូនកង កម្លាំងឱ្យទៅចូលរួមក្នុងបេសកកម្មរក្សាសន្តិភាពក្រោមឆ័ត្រអង្គការសហប្រជាជាតិ ដែលធ្វើឱ្យកម្ពុជាបានក្លាយពីប្រទេសដែលធ្លាប់តែទទួលកងកម្លាំងរក្សាសន្តិភាព ទៅជាប្រទេសបញ្ជូនកងកម្លាំងទៅរក្សា សន្តិភាពនៅក្រៅប្រទេសវិញ ហើយថែមទាំងទទួលបានការសរសើរពីអង្គការសហប្រជាជាតិចំពោះ សកម្មភាពនៃការងារមនុស្សធម៌របស់កងកម្លាំងមួកខៀវកម្ពុជាថែមទៀតផង៕

ដោយ៖ ចាន់ សុភឿន