AKP ភ្នំពេញ ថ្ងៃទី១៥ ខែកញ្ញា ឆ្នាំ២០២៥ -- ប្រធានាធិបតីហ្វីលីពីន លោកហ្វឺឌីនែនដ៍ ម៉ាកូស (Ferdinand Marcos) នៅថ្ងៃចន្ទនេះ បានតែងតាំងអតីតចៅក្រមតុលាការកំពូល លោក អេនដ្រេស រ៉េយ៉េស (Andres Reyes) ជាថ្នាក់ដឹកនាំគណៈកម្មការឯករាជ្យមួយសម្រាប់ហេដ្ឋារចនាសម្ព័ន្ធ (ICI) ដែលទើបនឹងបង្កើតថ្មី ដែលនឹងធ្វើការស៊ើបអង្កេតទៅលើអំពើពុករលួយដែលត្រូវបានចោទប្រកាន់ក្នុងការគ្រប់គ្រងគម្រោងទឹកជំនន់ និងគម្រោងពាក់ព័ន្ធនានាក្នុងទសវត្សរ៍កន្លងមក។

សេចក្តីប្រកាសនេះបានកើតឡើងនៅពេលដែលការតវ៉ាតាមដងផ្លូវមានការកំពុងកើនឡើងជុំវិញគម្រោង «ខ្មោច» និងគម្រោងហេដ្ឋារចនាសម្ព័ន្ធដែលមិនមានស្តង់ដារ ជាមួយនឹងការប្រមូលផ្តុំការតវ៉ាដ៏ធំមួយដែលបានកំណត់យកថ្ងៃទី២១ ខែកញ្ញា ឆ្នាំ២០២៥ ខាងមុខនេះ។កងកម្លាំងប្រដាប់អាវុធនៃប្រទេសហ្វីលីពីន បានប្រកាសអាសន្នកម្រិតពណ៌ក្រហមចាប់តាំងពីថ្ងៃទី១២ ខែកញ្ញា ឆ្នាំ២០២៥ មក ដើម្បីគាំទ្រដល់មន្រ្តីប៉ូលិសក្នុងការថែរក្សាសណ្តាប់ធ្នាប់ក្នុងអំឡុងពេលបាតុកម្មទូទាំងប្រទេស។

លោក រ៉េយ៉េស នឹងធ្វើការជាមួយអតីតលេខាធិការសាធារណការលោក រ៉ូជែលីអូ ស៊ីងសុន (Rogelio Singson) និងដៃគូគ្រប់គ្រងប្រទេសSGV & Co. Rossana Fajardo ខណៈដែលអភិបាលក្រុងបាគីអូ លោក បេចាមីន ម៉ាហ្កាឡុង (Benjamin Magalong) ត្រូវបានតែងតាំងជាទីប្រឹក្សាពិសេស។ គណៈកម្មការ ICI មានអំណាចក្នុងការកោះហៅសាក្សី ទទួលបានកំណត់ត្រារបស់រដ្ឋាភិបាល និងផ្តល់យោបល់ទៅលើករណីប្រឆាំងនឹងមន្ត្រី និងអ្នកម៉ៅការដែលមានកំហុស។

សភាកំពុងតែបន្តការស៊ើបអង្កេតទៅលើករណីដែលមានជាប់ពាក់ព័ន្ធនឹងសមាជិកសភាមួយចំនួន អ្នកម៉ៅការ និងវិស្វករការងារសាធារណៈនៅក្នុងគម្រោងដែលត្រូវបានចោទប្រកាន់ថាបានស៊ីសាច់ប្រាក់រាប់ពាន់លានប៉េសូ។ ប្រធានព្រឹទ្ធសភាហ្វីលីពីន លោក ប្រូ ធិមប៉ូ ផេនហ្វីឡូ ឡាកសុន (Pro Tempore Panfilo Lacson) បានពណ៌នាអំពើពុករលួយនៅក្នុងនាយកដ្ឋានសាធារណការ និងផ្លូវហាយវេ ថាជា «ករណីពុករលួយជាប្រព័ន្ធ»៕

ដោយ៖ យា ចិន្តាខន្តី (ប្រភព៖ ស៊ីនហួ)