AKP ភ្នំពេញ ថ្ងៃទី១៥ ខែកញ្ញា ឆ្នាំ២០២៥ -- គណៈប្រតិភូ​ចិន និងសហរដ្ឋ​អាមេរិក​បាន​កោះប្រជុំ​នៅទីក្រុងម៉ាឌ្រីដ​កាលពី​ថ្ងៃអាទិត្យ​ សម្រាប់​កិច្ចពិភាក្សា​អំពី​បញ្ហា​សេដ្ឋកិច្ច និង​ពាណិជ្ជកម្ម​។

អ្នកនាំពាក្យក្រសួងពាណិជ្ជកម្មចិនបាននិយាយកាលពីពេលថ្មីៗនេះថា ក្នុងរយៈពេលប៉ុន្មានថ្ងៃក្នុងសប្តាហ៍នេះ ភាគីទាំងពីរនឹងពិភាក្សាគ្នាអំពីបញ្ហាមួយចំនួន ដូចជាវិធានការពន្ធឯកតោភាគីរបស់សហរដ្ឋអាមេរិក ការរំលោភលើការគ្រប់គ្រងការនាំចេញ និងបណ្តាញសង្គមទីកតុក (TikTok)។

គណៈប្រតិភូ​ចិន​ដឹកនាំ​ដោយ​ឧបនាយករដ្ឋមន្ត្រី​ចិន លោក ហេ លីហ្វេង (He Lifeng) ដែល​ជា​សមាជិក​ការិយាល័យ​នយោបាយ​នៃ​គណៈកម្មាធិការ​មជ្ឈិម​បក្ស​កុម្មុយនិស្ត​ចិន​ផងដែរ។

អ្នកនាំពាក្យរូបនេះបាននិយាយថា គោលជំហររបស់ប្រទេសចិនទៅលើបញ្ហាបណ្តាញសង្គមទីកតុក គឺច្បាស់លាស់ និងជាប់លាប់។ ប្រទេសចិនប្តេជ្ញាយ៉ាងម៉ឺងម៉ាត់ក្នុងការការពារសិទ្ធិ និងផលប្រយោជន៍ស្របច្បាប់របស់សហគ្រាសរបស់ខ្លួន ហើយនឹងដោះស្រាយបញ្ហារបស់បណ្តាញសង្គមទីកតុកស្របតាមច្បាប់ និងបទប្បញ្ញត្តិពាក់ព័ន្ធ៕

ដោយ៖ យា ចិន្តាខន្តី (ប្រភព៖ ស៊ីនហួ)