AKP ភ្នំពេញ ថ្ងៃទី១១ ខែកញ្ញា ឆ្នាំ២០២៥ -- ប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) ត្រូវបានរំពឹងថានឹងធ្វើការសន្ទនាតាមទូរស័ព្ទជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) នៅក្នុងសប្តាហ៍នេះ ឬនៅដើមសប្តាហ៍ក្រោយ។

លោកបានប្រាប់អ្នកសារព័ត៌មានកាលពីថ្ងៃអង្គារ ដោយសំដៅទៅលើការសន្ទនាតាមទូរសព្ទដែលអាចកើតឡើងបានជាមួយមេដឹកនាំរុស្ស៊ីថា «បាទ! វានឹងកើតឡើង» ដោយលោកបាននិយាយបន្ថែមថា វាអាចនឹងកើតឡើងនៅក្នុង «សប្តាហ៍នេះ ឬដើមសប្តាហ៍ក្រោយ»។ លោក ត្រាំ ក៏​បាន​ធានាផងដែរ​ថា លោក​ប្តេជ្ញា​ដោះស្រាយ​ជម្លោះ​នៅ​អ៊ុយក្រែនឱ្យបាន។

កាលពីថ្ងៃទី០៧ ខែកញ្ញា ឆ្នាំ២០២៥ ប្រធានាធិបតីសហរដ្ឋអាមេរិកបានបញ្ជាក់ថា លោករំពឹងថានឹងជជែកជាមួយមេដឹកនាំរុស្ស៊ីក្នុងរយៈពេលប៉ុន្មានថ្ងៃខាងមុខនេះ។ កាលពីថ្ងៃទី០៤ ខែកញ្ញា លោក ដូណាល់ ត្រាំ ក៏បានបញ្ជាក់ផងដែរថា លោកគ្រោងនឹងធ្វើការសន្ទនាជាមួយលោក ពូទីន នាពេលខាងមុខឆាប់ៗនេះ។

កាលពីថ្ងៃទី១៥ ខែសីហា ប្រធានាធិបតីរុស្ស៊ី និងអាម៉េរិកបានជួបប្រជុំគ្នានៅឯមូលដ្ឋានយោធាក្នុងរដ្ឋអាឡាស្កា។ នៅក្នុង​សេចក្តីថ្លែងការណ៍​មួយ​បន្ទាប់ពី​កិច្ចពិភាក្សា​នោះ លោក ពូ​ទីន បាន​និយាយថា ការដោះស្រាយ​ជម្លោះ​អ៊ុយក្រែន គឺជា​ប្រធានបទ​ដ៏សំខាន់​នៃ​កិច្ចប្រជុំ​កំពូល​។ មេដឹកនាំរុស្ស៊ីបានអំពាវនាវឱ្យបង្វែរទំព័រថ្មីនៅក្នុងទំនាក់ទំនងទ្វេភាគីជាមួយសហរដ្ឋអាមេរិក ហើយត្រលប់ទៅរកកិច្ចសហប្រតិបត្តិការវិញ ហើយលោកក៏បានអញ្ជើញលោក ត្រាំ ទៅទស្សនកិច្ចនៅទីក្រុងម៉ូស្គូផងដែរ៕

ដោយ៖ យា ចិន្តាខន្តី (ប្រភព៖ តាសស៍)