AKP ភ្នំពេញ ថ្ងៃទី១១ ខែកញ្ញា ឆ្នាំ២០២៥--ឯកឧត្ដមបណ្ឌិតទេសរដ្ឋមន្ត្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា (NOCC) បានទទួលជួប និងពិភាក្សាការងារជាមួយឯកឧត្តម Annatoly Borovik ឯកអគ្គរដ្ឋទូតរុស្ស៊ីប្រចាំកម្ពុជា នៅទីស្នាក់ការ NOCC កាលពីល្ងាចថ្ងៃទី១០ ខែកញ្ញា ឆ្នាំ២០២៥ ដោយជំនួបសវនាការដ៏សំខាន់នេះផ្ដោតលើការកិច្ចសហប្រតិបត្តិការលើចលនាអូឡាំពិក និងប៉ារ៉ាឡាំពិក ក៏ដូចជាទំនាក់ទំនង ការគាំទ្រគ្នាទៅវិញទៅមកនៅលើការងារការទូតកីឡា។

ឯកឧត្តម វ៉ាត់ ចំរើន អគ្គលេខាធិការ NOCC បានផ្តល់ខ្លឹមសារជំនួបសវនាការនេះថា  ជំនួបនេះផ្តោតសំខាន់លើកិច្ចសហប្រតិបត្តិការលើចលនាអូឡាំពិក និងប៉ារ៉ាឡាំពិក ក្នុងកិច្ចគាំទ្រគ្នាទៅវិញទៅមកលើការងារការទូតកីឡា។ ឯកអគ្គរដ្ឋទូតរុស្ស៊ីប្រចាំកម្ពុជាបានរំលេចអំពីការចូលរួមសន្និសីទសេដ្ឋកិច្ចស្ដីពីការទូតកីឡា Eastern Economic Forum-Sport diplomacy នៅទីក្រុង Vladivostok ប្រទេសរុស្ស៊ី កាលពីថ្ងៃទី៣-៦ ខែកញ្ញា ឆ្នាំ២០២៥ ដែលឯកឧត្តម វ៉ាត់ ចំរើន បានចូលរួម ក្នុងនាមតំណាងក្រសួងអប់រំ យុវជន និងកីឡា និងតំណាង NOCC។

អគ្គលេខាធិការ NOCC បានបន្ថែមថា ឯកឧត្តម Annatoly Borovik ឯកអគ្គរដ្ឋទូតរស្ស៊ីសង្កត់ធ្ងន់ថា ប្រទេសរុស្ស៊ីត្រៀមគាំទ្រក្នុងការផ្តល់អាហារូបករណ៍មកដល់និស្សិតកីឡារបស់កម្ពុជា សម្រាប់ការសិក្សាជំនាញវិជ្ជាជីវៈកីឡាឱ្យកាន់តែល្អប្រសើរបន្ថែមទៀត។ ប្រទេសរុស្ស៊ីត្រូវការពង្រឹងកិច្ចសហប្រតិបត្តិការ ដោយសារតែប្រទេសនេះកំពុងចង់បានការគាំទ្រចលនាអូឡាំពិកពីសមាជិកនៃបណ្តាប្រទេសនានាលើឆាកអន្តរជាតិ ទាំងចលនាអូឡាំពិក ទាំងចលនាកីឡាប៉ារ៉ាឡាំពិក (កីឡាជនពិការ)។ កិច្ចការសំខាន់នាពេលនេះ គឺយើងត្រូវការគាំទ្រគ្នាទៅវិញទៅមកលើបញ្ហាការទូតកីឡាលើឆាកអន្តរជាតិ។ ឯកឧត្តមឯកអគ្គរដ្ឋទូតរុស្ស៊ីប្រចាំកម្ពុជាស្នើសុំភាគីកម្ពុជាគាំទ្រចលនាប៉ារ៉ាឡាំពិករុស្ស៊ីផងដែរ ដោយគណៈកម្មាធិការប៉ារ៉ាឡាំពិកអន្តរជាគ្រោងរៀបចំមហាសន្និបាតរបស់ខ្លួន នៅទីក្រុងសេអ៊ូល សាធារណរដ្ឋកូរ៉េ នាចុងខែកញ្ញា ឆ្នាំ២០២៥នេះ។

ឯកឧត្តម វ៉ាត់ ចំរើន លើកឡើងទៀតថា យើងដឹងហើយថា ប្រទេសរុស្ស៊ីមានធនធានមនុស្សផ្នែកកីឡាកម្រិតខ្ពស់ៗណាស់ នៅក្នុងពិភពលោក ហើយកម្ពុជានឹងរៀនសូត្រទាំងទ្រឹស្តី ការអនុវត្ត ទាំងការហ្វឹកហាត់ និងវិទ្យាសាស្ត្រកីឡាពីអ្នកជំនាញរុស្ស៊ីជាបន្តបន្ទាប់ទៀត។ កាលពីអំឡុងទសវត្សរ៍៨០ និង៩០ កម្ពុជាធ្លាប់បញ្ជូននិស្សិតកីឡាកម្ពុជាទៅសិក្សាវិជ្ជាជីវៈកីឡាជាច្រើនរូបផងដែរ ហើយមកដល់ពេលបច្ចុប្បន្ន ពួកគាត់បានក្លាយជាថ្នាក់ដឹកនាំក្នុងវិស័យកីឡា។ ជារួម កិច្ចសហប្រតិបត្តិការកាទូតកីឡាជាអន្តរជាតិពិតជាមានសារៈសំខាន់ ក្នុងការជួយគាំទ្រគ្នាទៅវិញទៅមក មិនថាតែប្រទេសរុស្ស៊ីតែមួយនោះទេ ពោលគឺប្រទេសជឿនលឿនផ្នែកីឡាផ្សេងៗទៀត ក៏កម្ពុជាត្រូវការធ្វើកិច្ចសហការដូចគ្នាដែរ ខណៈប្រទេសធំៗក៏ត្រូវការការគាំទ្រពីប្រទេសតូចៗ ដូចជាកម្ពុជាដូចគ្នាផងដែរ ដោយឯកឧត្តមបណ្ឌិត ថោង ខុន មានប្រសាសន៍ហើយថា ប្រទេសតូច ឬធំ មានសិទ្ធិស្មើគ្នាតាមផ្នែកផ្លូវច្បាប់លើឆាកអន្តរជាតិដូចៗគ្នា។

ឯកឧត្តម វ៉ាត់ ចំរើន បានគូសបញ្ជាក់បន្ថែមថា កិច្ចសហការលើការផ្តល់អាហារូបករណ៍កីឡារបស់រុស្ស៊ីមកដល់កម្ពុជាអំពីវិទ្យាសាស្ត្រកីឡា ដែលមានការសិក្សារយៈពេលយូរអង្វែងមួយ ដែលនឹងជួយជំរុញដល់ការអភិវឌ្ឍធនធានមនុស្សកម្ពុជាឆ្ពោះទៅរកការអភិវឌ្ឍវិស័យកីឡាកម្ពុជា ហើយកិច្ចសហការនេះនឹងជាផ្នែកមួយជួយជំរុញដល់ការអភិវឌ្ឍទៅដល់ការត្រៀមលក្ខណៈឆ្ពោះទៅទទួលរៀបចំធ្វើម្ចាស់ផ្ទះ ការប្រកួតកីឡាយុវជនអាស៊ី នាឆ្នាំ២០២៩ខាងមុខ នៅព្រះរាជាណាចក្រកម្ពុជាផងដែរ៕

ដោយ ហេង ណាលីន (រូបភាព៖ NOCC)