AKP ភ្នំពេញ ថ្ងៃទី១០ ខែកញ្ញា ឆ្នាំ២០២៥ -- រដ្ឋមន្ត្រីការពារជាតិ លោកអាន យូប៊ែក (Ahn Gyu-back) និងមន្ត្រីយោធាកំពូលនៅអង្គការសន្ធិសញ្ញាអាត្លង់ទិកខាងជើង (NATO) បានពិភាក្សាកាលពីថ្ងៃអង្គារ អំពីវិធីពង្រឹងកិច្ចសហប្រតិបត្តិការទ្វេភាគីក្នុងវិស័យការពារជាតិ និងការផលិតអាវុធ។

ក្រសួងបាននិយាយថា ជំនួបរវាងលោក អាន និងលោកឧត្តមនាវីឯកហ្គីសេប កាវ៉ូ ដ្រាហ្គន់ (Giuseppe Cavo Dragone) ប្រធានគណៈកម្មាធិការយោធារបស់អង្គការ NATO បានធ្វើឡើងនៅក្រៅកិច្ចសន្ទនាការពារជាតិទីក្រុងសេអ៊ូល ដែលបានចាប់ផ្តើមកាលពីថ្ងៃមុនសម្រាប់រយៈពេលបីថ្ងៃ។

ក្នុងអំឡុងពេលនៃកិច្ចពិភាក្សានេះ លោក អាន បានសម្តែងការពេញចិត្តចំពោះការចាប់អារម្មណ៍របស់អង្គការ NATO និងការប្តេជ្ញាចិត្តចំពោះផ្នែកសន្តិសុខនៅលើឧបទ្វីបកូរ៉េ និងនៅក្នុងតំបន់ឥណ្ឌូប៉ាស៊ីហ្វិក។

រដ្ឋមន្ត្រីការពារជាតិក៏បានលើកឡើងពីសារៈសំខាន់នៃកិច្ចសហប្រតិបត្តិការជាមួយអង្គការ NATO ដោយលើកឡើងពីភាពតានតឹងផ្នែកសន្តិសុខពិភពលោកដែលកើនឡើង និងការបង្កើនទំនាក់ទំនងអន្តរសន្តិសុខរវាងសហភាពអឺរ៉ុប និងឥណ្ឌូប៉ាស៊ីហ្វិក។

លោក កាវ៉ូ ដ្រាហ្គន់ បានយល់ស្របនឹងការកត់សម្គាល់របស់លោកអាន និងបានបង្ហាញពីក្តីសង្ឃឹមក្នុងការពង្រីកកិច្ចសហប្រតិបត្តិការកូរ៉េខាងត្បូង-អង្គការ NATO លើវិស័យនានា រួមទាំងវិស័យការពារជាតិ ការផ្លាស់ប្តូរយោធា ការចែករំលែកព័ត៌មានសម្ងាត់ អ៊ីនធឺណិត អវកាស និងបញ្ញាសិប្បនិម្មិត។

មន្ត្រីទាំងពីរក៏បានឯកភាពបន្តការផ្លាស់ប្តូរកម្រិតកំពូលរវាងស្ថាប័នរបស់ពួកគេ ដើម្បីជំរុញកិច្ចសហប្រតិបត្តិការក្នុងលក្ខណៈទៅវិញទៅមក និងទិសដៅអនាគត៕

ដោយ៖ មូល មិនា (ប្រភព៖ យ៉ុនហាប់)