AKP ភ្នំពេញ ថ្ងៃទី១០ ខែកញ្ញា ឆ្នាំ២០២៥ -- រដ្ឋមន្ត្រីក្រសួងការពារជាតិលោក អាន យូប៊ែក (Ahn Gyu-back) បានជួបជាមួយសមភាគីហ្វីលីពីនកាលពីថ្ងៃចន្ទ ដើម្បីពិភាក្សាអំពីវិធីពង្រីកកិច្ចសហប្រតិបត្តិការទ្វេភាគីក្នុងវិស័យការពារជាតិ និងអាវុធ។

យោងតាមក្រសួងការពារជាតិហ្វីលីពីន បានឱ្យដឹងថា លោក អានបានជួបពិភាក្សាជាមួយរដ្ឋមន្ត្រីការពារជាតិហ្វីលីពីន លោក ជីលបឺតូ តេអូដូរ៉ូ (Gilberto Teodoro) នៅខាងក្រៅកិច្ចសន្ទនាការពារជាតិទីក្រុងសេអ៊ូលដែលបានធ្វើឡើងកាលពីព្រឹកមិញ។

ក្នុងជំនួបនោះ លោក អាន បានថ្លែងអំណរគុណដល់ប្រជាជាតិអាស៊ីអាគ្នេយ៍ដែលបានចូលរួមក្នុងសង្គ្រាមកូរ៉េឆ្នាំ១៩៥០-៥៣ ជាប្រទេសដំបូងគេក្នុងចំណោមប្រទេសអាស៊ី និងសម្រាប់ការបន្តតួនាទីជាសមាជិកនៃបញ្ជាការអង្គការសហប្រជាជាតិ។

រដ្ឋមន្ត្រីទាំងពីរក៏បានឯកភាពពង្រីកបន្ថែមទៀតនូវកិច្ចសហប្រតិបត្តិការលើវិស័យការពារជាតិទ្វេភាគីក្រោមភាពជាដៃគូយុទ្ធសាស្ត្រដែលបានបង្កើតឡើងកាលពីឆ្នាំមុន។

លោក អាន និងលោក តេអូដូរ៉ូ បានកត់សម្គាល់ថា ក្រុមហ៊ុនកូរ៉េខាងត្បូងនាំមុខគេបានចូលរួមក្នុងគម្រោងទំនើបកម្មយោធារបស់ប្រទេសហ្វីលីពីន ដែលរួមចំណែកដល់ការពង្រឹងសមត្ថភាពការពាររបស់ប្រទេស។

ទន្ទឹមនឹងនេះ អនុរដ្ឋមន្ត្រីការពារជាតិ លោក លី ឌូហេ (Lee Doo-hee)បានជួបជាមួយសមភាគីតួកគី លោក មូសា ហេយប៊េត (Musa Heybet)ហើយបានប្តេជ្ញាថានឹងពង្រឹងកិច្ចសហប្រតិបត្តិការទ្វេភាគីក្នុងវិស័យជាច្រើនរួមទាំងការបណ្តុះបណ្តាលយោធា ការចែករំលែកព័ត៌មានសម្ងាត់ ការផ្លាស់ប្តូរកម្រិតកំពូល និងបច្ចេកវិទ្យា។

លោក លី ក៏បានអំពាវនាវឱ្យមានការគាំទ្រពីប្រទេសតួកគីឆ្ពោះទៅរកការបង្កើតសន្តិភាពនៅលើឧបទ្វីបកូរ៉េ និងការសម្រេចបាននូវការលុបបំបាត់នុយក្លេអ៊ែររបស់ប្រទេសកូរ៉េខាងជើង។

នៅក្នុងកិច្ចប្រជុំកំពូលជាបន្តបន្ទាប់រវាងលោក លី និងសមភាគីហ្វាំងឡង់ លោក អេសា ភូកគីនេន (Esa Pulkkinen) អនុរដ្ឋមន្ត្រីទាំងពីរបានយល់ព្រមបង្កើនកិច្ចសហប្រតិបត្តិការក្នុងវិស័យវិទ្យាសាស្ត្រ និងបច្ចេកវិទ្យាការពារជាតិ និងឧស្សាហកម្មសព្វាវុធ ដោយភាគីទាំងពីរមើលឃើញពីការកើនឡើងនៃការនាំចេញយន្តហោះចម្បាំងស្វ័យប្រវត្តិ K9 របស់ប្រទេសកូរ៉េខាងត្បូងទៅកាន់ប្រទេសហ្វាំងឡង់ ចាប់តាំងពីឆ្នាំ២០១៧។

ដោយឡែក ប្រធានទីភ្នាក់ងារលទ្ធកម្មអាវុធរបស់ប្រទេសកូរ៉េខាងត្បូងបានជួបជាមួយអនុរដ្ឋមន្ត្រីការពារជាតិកាណាដា លោក ស្តេហ្វានី ប៊ែក (Stefanie Beck) ដើម្បីពិភាក្សាអំពីការពង្រឹងកិច្ចសហប្រតិបត្តិការអាវុធទ្វេភាគី បន្ទាប់ពីក្រុមហ៊ុនកូរ៉េខាងត្បូងមួយត្រូវបានជ្រើសរើសលើគម្រោងនាវាមុជទឹកល្បាតរបស់ប្រទេសកាណាដា៕

ដោយ៖ មូល មិនា (ប្រភព៖ យ៉ុនហាប់)