AKP ភ្នំពេញ ថ្ងៃទី១០ ខែកញ្ញា ឆ្នាំ២០២៥ -- នាយករដ្ឋមន្ត្រីនេប៉ាល់បានលាលែងពីតំណែងកាលពីថ្ងៃអង្គារ ខណៈដែលការតវ៉ាប្រឆាំងនឹងការហាមឃាត់រយៈពេលខ្លីទៅលើប្រព័ន្ធផ្សព្វផ្សាយសង្គមកាន់តែមានអំពើហិង្សា និងបានពង្រីកទៅជាការរិះគន់យ៉ាងទូលំទូលាយលើរដ្ឋាភិបាលរបស់លោក និងការចោទប្រកាន់ពីអំពើពុករលួយក្នុងចំណោមឥស្សរជននយោបាយរបស់ប្រទេសមួយនេះ។

បាតុកម្ម​ដែល​ដឹកនាំ​ដោយ​យុវជនដែលមានការ​ខឹងសម្បា​នឹង​ការ​បិទ​គេហទំព័រ​ប្រព័ន្ធ​ផ្សព្វផ្សាយ​សង្គម​មួយ​ចំនួននោះ ​បាន​កើតឡើងនៅទូទាំង​រដ្ឋធានី​របស់​ប្រទេសនេះនៅ​មួយ​ថ្ងៃ​មុន ហើយ​ប៉ូលិស​បាន​បើក​ការ​បាញ់​ប្រហារ​លើ​ហ្វូង​បាតុករ ដោយ​បាន​សម្លាប់​មនុស្សចំនួន ១៩នាក់​។

ការហាមឃាត់នេះត្រូវបានដកចេញកាលពីថ្ងៃអង្គារ ប៉ុន្តែការតវ៉ានៅតែបន្ត ដោយក្រុមបាតុករបានដុតផ្ទះរបស់មេដឹកនាំកំពូលមួយចំនួនរបស់ប្រទេសនេប៉ាល់ និងអគាររដ្ឋសភា។ អាកាសយានដ្ឋានក្នុងរដ្ឋធានីកាតាម៉ាន់ឌូត្រូវបានបិទ ហើយឧទ្ធម្ភាគចក្រកងទ័ពបានបញ្ជូនរដ្ឋមន្ត្រីមួយចំនួនទៅកាន់កន្លែងមានសុវត្ថិភាព។

នៅពេលដែលមានការតវ៉ាកាន់តែខ្លាំងឡើង នាយករដ្ឋមន្ត្រីនេប៉ាល់ លោក ខាដហ្កា ប្រាសាដ អូលី (Khadga Prasad Oli) បាននិយាយថាលោកនឹងចុះចេញពីតំណែងភ្លាមៗ។

បាតុកម្មដែលហៅថាការតវ៉ារបស់ក្រុមយុវជនជំនាន់ Z (Gen Z) នោះ បានចាប់ផ្តើមកើតឡើងបន្ទាប់ពីរដ្ឋាភិបាលបានបិទវេទិកាផ្សព្វផ្សាយសង្គមមួយចំនួន ដែលរួមមានទាំងហ្វេសប៊ុក (Facebook) អ៊ិច (X) និងយូធូប(YouTube) ជាដើម ដោយរដ្ឋាភិបាលបាននិយាយថា ក្រុមហ៊ុនបណ្តាញផ្សព្វផ្សាយសង្គមទាំងនោះបានបរាជ័យក្នុងការចុះឈ្មោះ និងដាក់ជូននូវការត្រួតពិនិត្យរបស់រដ្ឋាភិបាល។

ប៉ុន្តែ សូម្បីតែបន្ទាប់ពីគេហទំព័រទាំងនោះត្រលប់មកបណ្តាញអ៊ីនធឺណេតវិញហើយក៏ដោយ ក៏ការប្រមូលផ្តុំគ្នានៅតែបន្ត ដែលជំរុញដោយកំហឹងចំពោះការស្លាប់របស់ក្រុមបាតុករដោយស្នាដៃមន្រ្តីប៉ូលិស។

ជាពិសេស ក្រុមយុវជនជាច្រើនមានការខឹងសម្បារដែលកូនរបស់មេដឹកនាំនយោបាយ មួយចំនួនដែលហៅថា កុមារ Nepo ហាក់ដូចជាចូលចិត្តរបៀបរស់នៅបែបប្រណិត និងទទួលបានអត្ថប្រយោជន៍ជាច្រើនខណៈដែលយុវជនភាគច្រើនកំពុងតស៊ូស្វែងរកការងារធ្វើ។ ជាមួយនឹងភាពអត់ការងារធ្វើរបស់យុវជនស្ថិតនៅកម្រិត ២០% កាលពីឆ្នាំមុន ដោយយោងតាមធនាគារពិភពលោក បានឱ្យដឹងថា រដ្ឋាភិបាលនេប៉ាល់ប៉ាន់ប្រមាណថាយុវជនជាង ២.០០០នាក់បានចាកចេញពីប្រទេសជារៀងរាល់ថ្ងៃដើម្បីស្វែងរកការងារនៅមជ្ឈិមបូព៌ា ឬអាស៊ីអាគ្នេយ៍៕

ដោយ៖ យា ចិន្តាខន្តី (ប្រភព៖ កូរ៉េថាមស៍)